بەس كۇن بويى قازاقستاننىڭ تۇكپىر-تۇكپىرىنەن 180-نەن استام سپورتشى ۇزدىك اتانۋ ءۇشىن باق سىنادى. اتلەتتەر ءتورت ءپان بويىنشا سىنعا ءتۇستى. اتاپ ايتقاندا سپورتتىق ۆينتوۆكادان اتۋ, 100 مەترگە ەركىن ءجۇزۋ, 60 مەترگە سپرينت جانە 3000 مەترگە شىدامدىلىققا جۇگىرۋ.
جارىس قورىتىندىسى بويىنشا وزدەرىنىڭ جاس توپتارى بويىنشا ارميالىق سپورتشىلار الەكساندر گورباچەۆ (ابسوليۋتتىك ەسەپتە 1 ورىن), الەكساندر يسمايلوۆ (ابسوليۋتتىك ەسەپتە 2 ورىن) جانە اعا لەيتەنانت ماكسيم گۋبارەۆ چەمپيون اتاندى. «كۇمىس» جۇلدەنى ەفرەيتور اعىباي نىعىمەتوۆ قانجىعاسىنا بايلادى. قر قم ارميا ورتالىق سپورت كلۋبىنىڭ سپورتشىلارى قازاقستان قارۋلى كۇشتەرىنىڭ قورجىنىنا ءتورت التىن جانە ەكى كۇمىس مەدال اكەلدى.
«سپورتشىلار اراسىنداعى سايىس تارتىستى ءوتتى. ارميالىق سپورتشىلار دەنە دايىندىعى مەن شەبەرلىكتەرىن, كاسىبيلىگىن كورسەتىپ, لايىقتى ونەر كورسەتتى. چەمپيونات ناتيجەسى بويىنشا ءبىزدىڭ بالالار سپورتتىق كلۋبتار اراسىندا ءبىرىنشى كوماندالىق ورىنعا يە بولدى», دەدى اسكەري كوپسايىس بويىنشا تسسكا كومانداسىنىڭ باستىعى اعا لەيتەنانت ماكسيم گۋبارەۆ.
