«دونورلىق ... ءومىر ساقتاۋ» اتتى اكتسياعا قاتىسۋ ءۇشىن ۇيىم قىزمەتكەرلەرى باس قالاداعى قان ورتالىعىنا تاڭ بوزىنان جينالدى. 22 جاستاعى ايبەك ەربول ۇلى ءۇش جىلدان بەرى ءوز ەركىمەن قان تاپسىرىپ كەلەدى. بۇعان ونىڭ قان قىسىمىنىڭ جوعارى بولۋى سەبەپ بولعان. «قان قىسىمىم جوعارى بولىپ, ءتۇرلى ءدارى-دارمەكتەردى ءىشتىم. تانىستارىم قان تاپسىرۋعا كەڭەس بەردى. ەڭ العاش 19 جاسىمدا دونور بولدىم. قازىر قان قىسىمىم تۇراقتى. ءدارى ءىشۋدى دە توقتاتتىم. بۇگىن قىزمەتتەستەرىممەن بىرگە قان تاپسىرىپ جاتقانىما وتە قۋانىشتىمىن», دەيدى ول.
كەرىسىنشە, كاميلا بەكپەنبەتوۆا قان تاپسىرۋ تۋرالى دۇرىس تۇسىنىكتە بولماعان. «قان تاپسىرۋ وتە اۋىر بولادى دەپ قورقاتىنمىن. بىراق بۇگىن ءبارى جەڭىل ءوتتى. دونور بولۋدىڭ قانشالىقتى ساۋاپتى ءىس ەكەنىن, دەنساۋلىققا پايداسىن ۇقتىم. ەندى اينالامداعىلاردىڭ بارىنە ناسيحاتتاۋعا دايىنمىن», دەيدى ول.
جىل سايىن ەلىمىزدە 200 مىڭداي ادام قان تاپسىرسا, ونىڭ 78 پايىزىن ەرىكتى دونورلار قۇرايدى. ەلوردادا جىلىنا شامامەن 15 مىڭ ادام قان قاجەت ەتسە, 40 مىڭعا جۋىق كىسى كەلىپ قان تاپسىرادى ەكەن. ال ولاردىڭ 90 پايىزى قانىن تەگىن بەرەدى. ماماندار اقىلى دونورلاردىڭ كوپشىلىگى سيرەك كەزدەسەتىن قان توبىنداعىلار ەكەنىن ايتادى.
ء«بىز وسى اكتسيانى ۇيىمداستىرعان «قازاقستان قۇرىلىسشىلار وداعىنا» شەكسىز العىسىمىزدى ايتامىز. بۇل ۇجىمنىڭ باستاماسى كوپكە ونەگە», دەدى قۋانىشىمەن بولىسكەن ترانسفۋزيولوگيا عىلىمي-وندىرىستىك ورتالىعىنىڭ مەيىربيكەسى دامەليا سۇلۋبەكوۆا.
اكتسيا سوڭىندا قاتىسۋشىلار «سترويكلاسس» قۇرىلىس كومپانياسىنا قايىرىمدىلىق ەستافەتاسىن جولدادى. «قازاقستان قۇرىلىسشىلار وداعى» رزتب توراعاسىنىڭ ءبىرىنشى ورىنباسارى اياجان وتەۋوۆا بۇل اكتسيانىڭ قۇرىلىس قىزمەتكەرلەرى تاراپىنان قولداۋ تاۋىپ, ەستافەتانىڭ ءساتتى جالعاساتىنىنا سەنىمدى ەكەنىن ايتتى.
