ۆيتسە-مينيستر اتاپ وتكەندەي, ەگەر ازاماتتار قانداي دا ءبىر ەلەكتروندى پروتسەدۋرادان تابىس تاباتىن بولسا, وعان دا سالىق سالىنۋعا ءتيىس. ول سالىقتىڭ مولشەرى دە ءارتۇرلى بولۋى كەرەك. ايتالىق, جەكە كاسىپكەر ەلەكتروندى قارجى اۋدارىمىنان تابىس تاپسا – جەكە تابىس سالىعى سالىنادى. زاڭدى تۇلعا بولسا, تيىسىنشە كورپوراتيۆتىك تابىس سالىعى, قوسىمشا قۇن سالىعى جانە تاعى باسقالارى تولەنۋگە ءتيىس.
– ماسەلەن, ەگەر ءسىز كوممۋنالدىق ەسەپشوتتى تولەدىڭىز دەلىك. ونى تەكسەرۋگە بولادى. اتالعان قارجىنى الۋشى بار, وعان سالىق كوميتەتى مونيتورينگ جۇرگىزەدى. ال ءتۇرلى جەكە تۇلعالاردان تولەم تۇسەتىن بولسا, وندا ول ادام كەنەتتەن تابىس تابا باستادى ما دەگەن ساۋال تۋىندايدى. ارينە ءسىز اكەڭىزگە اقشا جىبەرسەڭىز, ونىڭ كىرىس ەمەس ەكەنى دە تۇسىنىكتى, – دەيدى ب.شولپانقۇلوۆ.
ۆيتسە-مينيستر حالىقتىڭ بىرەۋگە كومەكتەسۋ ءۇشىن قايىرىمدىلىق ماقساتتا جاسالاتىن قاراجات اۋدارىمىنا دا توقتالدى. ب.شولپانقۇلوۆتىڭ ايتۋىنشا, ونىڭ ءبارىن سالىق قىزمەتى تەكسەرىپ وتىرادى.
– ونداي تولەمدەردىڭ ءتۇرىن ايقىنداپ الۋ كەرەك. ايتالىق اقشا اۋدارىمى تاۋارعا نەمەسە قايىرىمدىلىققا اۋدارىلدى دەگەن سياقتى سارالاۋ جۇرگىزىلىپ, بارلىق تولەمدەر بەلگىلەنىپ وتىرۋى كەرەك, – دەدى ۆيتسە-مينيستر.
قارجى مينيسترلىگى Kaspi.kz-پەن بىرلەسىپ قولما-قول ەسەپ ايىرىسۋدىڭ جاڭا زاڭدى جولىن جاساۋدى قولعا الىپ جاتقانىن دا ايتا كەتەيىك. تاياۋدا مينيسترلىك وكىلدەرىنىڭ بريفينگىندە قارجى ۆيتسە-ءمينيسترى رۋسلان ەڭسەباەۆ ەلىمىزدەگى ءىرى بانكتەردىڭ ءبىرىنىڭ كليەنتتەرى قولما-قول اقشاسىز ەسەپ ايىرىسۋدى كوميسسياسىز جۇرگىزەتىنىنە توقتالدى.
– Kaspi Gold قازىر وتە تانىمال قۇرال. تولەم جۇيەلەرى تۋرالى زاڭ تۇرعىسىنان كەلسەك, بارلىق تالاپتارعا ساي. بىراق سالىق كودەكسى مەن فيسكالداندىرۋ تۇرعىسىنان كەلسەك, تالاپقا ساي كەلمەيتىن تۇستارى بار. ءبىز وعان تىيىم سالۋدى ويلاستىرعانبىز, بىراق وندا ەكونوميكاعا كەرى اسەر ەتۋى مۇمكىن. مۇنداي وڭاي قۇرال ءبىرىنشى كەزەكتە تۇتىنۋشىلار ءۇشىن ىڭعايلى. ەكىنشىدەن, قولما-قول اقشاسىز تولەمدەردىڭ ۇلەسىن ايتارلىقتاي كوبەيتتى, – دەدى ول. سول سەبەپتى قازىرگى تاڭدا قارجى مينيسترلىگى مەن Kaspi.kz بىرلەسىپ جۇمىس ىستەيتىن باعدارلاما ازىرلەۋدە.
