– 2017 جىلعى 31 مامىردان 2019 جىلعى 25 قازانعا دەيىنگى ارالىقتا ەكىنشى دەڭگەيلى بانكتەر جالپى سالماعى 523,3 كيلو تارتاتىن 13,2 مىڭ التىن قۇيماسىن ساتتى. وعان قوسا ۆاليۋتا ايىرباستاۋ پۋنكتتەرى ارقىلى جالپى سالماعى 118,1 كيلو بولاتىن 4,2 مىڭ قۇيما التىن وتكىزىلدى. وسىلايشا ەل ازاماتتارى ساتىپ العان تازا التىننىڭ سالماعى 641,2 كيلونى قۇرادى, – دەلىنگەن LS تاراتقان اقپاراتتا.
تاياۋدا World Cold Council ءار ەلدەگى التىن قورى مەن ونى حالىق سانىنا شاققانداعى كورسەتكىش تۋرالى دا حابارلاعانىن ايتا كەتەيىك. بۇل تىزىمگە كوز جۇگىرتسەك, التىن قورى 377,3 تونناعا جەتكەن قازاقستان دۇنيە ءجۇزى بويىنشا 13-ورىنعا كوتەرىلدى. ياعني, ەلىمىزدە 18,6 ميلليوننان استام حالىقتىڭ جان باسىنا شاققاندا ءار ازاماتقا 20,2 گرامم التىننان كەلەدى دەگەن ءسوز.
دۇنيە ءجۇزى بويىنشا باعالى مەتالل قورى ەڭ كوپ ەلدەردىڭ كوشىن شۆەيتساريا باستاپ تۇر. شۆەيتساريانىڭ 1040 توننا التىن قورىن جان باسىنا شاققاندا 120,7 گرامنان اسادى. ودان كەيىنگى ورىندا يتاليا, گەرمانيا, پورتۋگاليا سىندى ەلدەر ورنالاسقان.
الەم بويىنشا التىن قورى جان باسىنا شاققاندا ەڭ از كولەمنەن كەلەتىن ەلدەردىڭ ءتىزىمىن جاپونيا (6,03 گرامم), قىتاي (1,35 گرامم), ءۇندىستان (0,45 گرامم) تۇيىندەيدى.
قازاقستاندا التىن قۇيماسىن ساتۋ باعدارلاماسى بويىنشا قۇيمانىڭ 5 ءتۇرى ۇسىنىلعان بولاتىن. 5, 10, 20, 50 جانە 100 گرامم تارتاتىن قۇيمالاردىڭ ىشىندە سانى بويىنشا ەڭ كوپ ساتىلعانى 10 گرامدىق قۇيما – 33 پايىز. ال سالماعىنا كەلەر بولساق, ساتىلعان بارلىق التىننىڭ 59 پايىزى 100 گرامدىق قۇيما.
بانكتەر مەن ايىرباستاۋ پۋنكتتەرىندە ساتىلاتىن ءاربىر قۇيما التىننىڭ بەتى سىرتقى سوققىلاردان قورعايتىن قورعانىش ەلەمەنتپەن جابىلعان. بەتىندە بۇعىنىڭ سۋرەتى, قۇيمانىڭ تازالىعىن بىلدىرەتىن 999,9 دەگەن تسيفر, ۇلتتىق بانكتىڭ لوگوتيپى بەينەلەنگەن.
