وتكەن اپتادا قحل كوماندالارى ەۋروتۋر ويىندارى ءوتىپ جاتقان سوڭ 10 كۇندىك قىسقا ۇزىلىسكە شىقتى. باسقا كوماندالاردى قايدام, جەڭىلىستەن باس كوتەرە الماي جاتقان «بارىس» ءۇشىن بۇل ءۇزىلىس ءتيىمدى بولادى دەگەن سەنىمدەمىز. 14 قازاندا ءوز الاڭىمىزدا باستالعان ساتسىزدىكتىڭ سوڭى كورىنەر ەمەس. قازان ايىنىڭ ورتاسىندا «بارىس» ۆلاديۆوستوكتىڭ «ادميرالىنان» وۆەرتايمدا 0:1 ەسەبىمەن ۇتىلدى. نۇر-سۇلتانداعى ماتچ اسا شيەلەنىستى ءوتتى. قوس تاراپ بارىن سالىپ ايقاستى. Əسىرەسە, ايدىن يەلەرىنىڭ قارقىنى كۇشتى بولدى. بيىلعى ماۋسىمدا اتالعان كوماندالار ءوزارا ەكى مəرتە كەزدەسىپ, ەكەۋىندە دە قيىر شىعىستان كەلگەن حوككەيشىلەر باسىم تۇسكەن ەدى. بۇل جولى دا ماركۋس يۋنگتىڭ سوققان شايباسىنىڭ ارقاسىندا «ادميرال» جەڭىسكە جەتتى.
«بارىس» اراعا ەكى كۇن سالىپ «بارىس ارەنادا» ريگانىڭ (لاتۆيا) «دينامو» كومانداسىن قابىلداپ, ەكىنشى رەت وۆەرتايمدا جەڭىلىسكە ۇشىرادى. كەزدەسۋدى تاماشالاۋعا كەلگەن 5 مىڭعا جۋىق جانكۇيەر ءۇش كەزەڭگە سوزىلعان بəسەكەدە 7 گولدىڭ كۋəسى بولدى. ءبىرىنشى كەزەڭدە ەسەپ اشىلماعانىمەن, ەكىنشى جانە ءۇشىنشى كەزەڭدە قوس كوماندانىڭ حوككەيشىلەرى ءۇش-ۇشتەن شايبا سوعىپ, كەزدەسۋ تەڭ ەسەپپەن اياقتالدى. قوسىمشا ۋاقىتتىڭ ءۇشىنشى مينۋتىندا كريستاپس سوتنيەكستىڭ سوققان شايباسىنىڭ ارقاسىندا «دينامو» جەڭىسكە جەتتى.
كەيىنگى ويىندا جەرلەستەرىمىز اۋپىرىمدەپ ءجۇرىپ ەكى ماتچتا جەڭىسكە جەتتى. العاش ەلوردادا وتكەن كەزدەسۋدە «بارىس» ماسكەۋ وبلىسىنىڭ «ۆيتياز» كومانداسىمەن ويناپ, بۇل جولى جەرلەستەرىمىز وۆەرتايمدا 3:2 ەسەبىمەن باسىم ءتۇستى. قوسىمشا ۋاقىتتىڭ 3-مينۋتىندا داستين بويد ماتچتاعى ەكىنشى شايباسىن سوعىپ, كومانداسىنا ماڭىزدى جەڭىس سىيلادى. ەكىنشى ويىندى مينسكىدە وتكىزگەن «بارىس» جەرگىلىكتى «دينامو» كومانداسىنان بۋلليت سەرياسىندا ايلاسىن اسىرىپ كەتتى. نەگىزگى كەزەڭ 1:1 ەسەبىمەن اياقتالىپ, بۋلليتتە جەرلەستەرىمىز 3:1 ەسەبىمەن جەڭىس تويىن تويلادى.
مينسكىدەگى جەڭىستەن كەيىن اندرەي سكابەلكا شاكىرتتەرىن نە قىرسىق شالعانى بەلگىسىز, سوڭعى بەس ويىندا جەڭىلىستەن كوز اشپادى. ياروسلاۆلدە كەزدەسۋ وتكىزگەن «بارىس» ويىنشىلارى جەرگىلىكتى «لوكوموتيۆكە» وۆەرتايمدا ەسە جىبەردى. ەكى شايبا ايىرماشىلىعىمەن الدا تۇرعان «بارىس» ءۇشىنشى كەزەڭ سوڭىندا 2:3 ەسەبىمەن ۇتىلدى. «لوكوموتيۆتەن» جەڭىلگەن سوڭ «بارىس» ويىنشىلارى قازان قالاسىنا ساپار شەگىپ, «شىعىس» كونفەرەنتسياسىندا كوش باستاپ تۇرعان ازۋلى «اق بارىس» كومانداسىمەن كەزدەستى. بۇل كەزدەسۋدە دە جەرلەستەرىمىز قارسىلاستارىنا 3:2 ەسەبىمەن جول بەردى.
اراعا ءۇش كۇن سالىپ «بارىس» ەلوردادا ماگنيتوگوردىڭ «مەتاللۋرگىن» جەڭە المادى. ءبىرىنشى كەزەڭدە قارسىلاس كوماندانىڭ ويىنشىسى دەنيس پارشين ەسەپ اشىپ, كومانداسىن العا سۇيرەگەن. ەكىنشى كەزەڭ بەل ورتاعا جەتكەن تۇستا ايدىن يەلەرى داررەن ءديتستىڭ مەرگەندىگى ارقاسىندا تارازى باسىن تەڭەستىرگەن-ءدى. الايدا, 33-مينۋتتا ماكسيم ماتۋشكين «مەتاللۋرگتى» العا شىعاردى – 2:1. وسىلايشا, جەرلەستەرىمىز قاتارىنان ءۇشىنشى كەزدەسۋدە جەڭىلىستىڭ كەرمەك ءدəمىن تاتتى.
ەكى كۇننەن سوڭ ەكاتەرينبۋرگتىڭ «اۆتوموبيليست» كلۋبىن قابىلداعان «بارىس» بيىلعى بىرىنشىلىكتە بەسىنشى مارتە وۆەرتايمدا وماقاستى. كەزدەسۋ بارىسىندا قوناق كوماندا ءۇش رەت ەسەپتە العا شىققانىنا قاراماستان, جەرلەستەرىمىز لەزدە قارىمتاسىن قايتارىپ وتىردى. وكىنىشكە قاراي كەزىندە «بارىستىڭ» ساپىندا ويناعان نايدجەل دوۋس وۆەرتايمدا جەڭىس گولىن سوقتى. ناتيجەسىندە «بارىس» 3:4 ەسەبىمەن جەڭىلىس تاپتى.
«بارىس» ءۇزىلىس الدىنداعى سوڭعى ويىنىن «باتىس» كونفەرەنتسياسىنىڭ ۇزدىگى ماسكەۋدىڭ تسسكا كومانداسىنا قارسى وتكىزىپ, ءىرى ەسەپپەن ەسە جىبەردى. بوگدان كيسەلەۆيچ, ميحايل گريگورەنكو جانە كيريلل كاپريزوۆ سوققان ءۇش شايباعا جەرلەستەرىمىز جاۋاپ قايتارا الماي, «بارىس ارەناعا» جينالعان 11 مىڭعا جۋىق جانكۇيەردىڭ الدىندا ماسقارا بولدى. وسى 9 ويىندا «بارىس» كومانداسى ءوز قاقپاسىنا 23 شايبا وتكىزىپ السا, قارسىلاستارعا 16 گولمەن جاۋاپ بەرگەن. بۇل ارالىقتاعى ەكى ويىندا ەلوردا ۇجىمى قارسىلاس قوماندانىڭ قاقپاسىنا ساڭىلاۋ تابا المادى.
قاتارىنان بەس ويىندا جەڭىلگەن «بارىس» كومانداسى ءدال قازىرگى ۋاقىتتا «شىعىس» كونفەرەنتسياسىندا 24 ويىننان كەيىن 30 ۇپايمەن التىنشى ورىندا تۇر. وزگە كوماندالارعا قاراعاندا «بارىس» 1-2 ويىن كەم وتكىزگەن. بۇل توپتىڭ كوشىن 25 ويىندا 39 ۇپاي جيناعان قازاننىڭ «اق بارىس» كومانداسى باستاپ تۇر. العاشقى التىلىقتىڭ ۇپاي سانىندا ازداعان الشاقتىق بولعانىمەن, تومەنگى التىلىقتىڭ ۇپايلارى شامالاس. مىسالى, كەستەدە «بارىستان» كەيىن ورنالاسقان «ادميرال» مەن «مەتاللۋرگ» كوماندالارى 29 ۇپايمەن 7-8-ورىنداردى ءبولىسىپ تۇر. ال «كۋنلۋن» مەن «اۆتوموبيليست» 26 ۇپايمەن 9-10-ساتىدا تۇرسا, «تراكتور» مەن «امۋر» 22 ۇپايمەن سوڭعى ەكى ورىنعا جايعاسقان.
«بارىس» الداعى ۋاقىتتا جەڭىسكە جەتىپ, مەيلىنشە ۇپاي توپتاماسا, ۇزدىك سەگىزدىكتەن ءتۇسىپ قالاتىن ءتۇرى بار. ەگەر جەرلەستەرىمىز تۋرنير كەستەسىندە سەگىزدىككە ەنە الماسا, وندا ولار ءۇشىن بيىلعى ماۋسىم اياقتالدى دەي بەرۋگە بولاتىن شىعار. ويتكەنى گاگارين كۋبوگىنا قاتىسۋ ءۇشىن كوماندالار كەم دەگەندە العاشقى سەگىزدىكتىڭ قاتارىندا بولۋى كەرەك.
مامانداردىڭ ايتۋىنشا, «بارىستىڭ» جەڭىلىسىنە ەكى سەبەپ بولۋى مۇمكىن. ءبىرىنشىسى, ترانسفەردەگى ساتسىزدىك, ەكىنشىسى, حوككەيشىلەردىڭ فيزيكالىق تۇرعىدان دايىن بولماي شىعۋى جانە ويىنشىلاردىڭ ۇنەمى جاراقات الۋى. مىسالى, «بارىس» وتكەن ماۋسىمدا استانالىقتاردى ورگە سۇيرەگەن, بۇل كۇندەرى كارەراسىن اياقتاعان برەندون بوچەنسكي مەن ماۋسىمارالىق ترانسفەر كەزەڭىندە كوماندادان كەتكەن پاتريس كورمە, مەتت فرەتتين, اندرە پەتەرسسون سياقتى شابۋىلشىلاردىڭ ورنىن جوقتاتپايتىن لايىقتى ءىزباسار حوككەيشىلەر الماعان.
ال كومانداعا بيىل قوسىلعان شابۋىلشىلاردىڭ ناتيجەسى كوڭىل كونشىتپەيدى. مىسالى, امەريكالىق شابۋىلشى ەريك تانگرادي 17 ويىندا مۇزايدىنعا شىعىپ, ءتورت-اق شايبا سوققان. كانادالىق كوربان نايت 24 ماتچتا بار-جوعى التى رەت مەرگەندىگىمەن كوزگە تۇسكەن. فينليانديالىق يرو پاكارينەن «بارىس» ساپىنداعى 17 ويىندا تەك ءۇش رەت قاقپانى ءدال كوزدەگەن ەكەن. الداعى ۋاقىتتا «بارىس» كوماندانى العا سۇيرەيتىن حوككەيشى الماسا, بيىلعى كۇيدى كەلەسى جىلى دا كەشەتىنى انىق.
سونداي-اق ءدال قازىرگى ۋاقىتتا كوماندا ساپىندا جاراقات الىپ, ەمدەلىپ جاتقان ءۇش بىردەي ويىنشىسى بار. ولار – شۆەتسيالىق ۆيكتور سۆەدبەرگ, فينليانديالىق يرو پاكارينەن جانە قازاقستاندىق تالعات جايلاۋوۆ. باس باپكەردىڭ ايتۋىنشا, اتالعان ويىنشىلار جاڭا جىلعا دەيىن كومانداعا كومەكتەسە المايتىن كورىنەدى.
جۋىردا رەسەيدىڭ «چەمپيونات» ينتەرنەت-باسىلىمى قحل-ءدىڭ 2019/20 جىلعى ماۋسىمداعى كوماندالاردىڭ رەيتينگىن جاساپ شىقتى. باسىلىم رەيتينگى بويىنشا «بارىستىڭ» باس باپكەرى اندرەي سكابەلكا سوڭعى ويىندارداعى ساتسىزدىكتەردەن كەيىن 6-ورىننان 15-ورىنعا ءتۇسىپ قالدى.
10 كۇندىك ۇزىلىسكە شىققان قۇرلىقتىق حوككەي ليگاسىنىڭ كوماندالارى ەرتەڭنەن باستاپ كەزەكتى تۋر ويىندارىن وتكىزەدى. «بارىس» ۇزىلىستەن كەيىنگى العاشقى كەزدەسۋىن 12 قاراشادا سىرت الاڭدا «باتىس» كونفەرەنتسياسىنىڭ 10-ورىندا كەلە جاتقان چەرەپوۆەتس قالاسىنىڭ «سەۆەرستال» كومانداسىمەن شەبەرلىك بايقاسادى.
