كىرەبەرىستەن جوعارىعا كوتەرىلگەن پوليتسيا قىزمەتكەرلەرى ءۇي توبەسىندەگى قاردا قالعان ىزبەن قىزدى وڭاي تاۋىپ الادى. ولار بىردەن ىسكە كىرىسىپ, بالكوننىڭ ۇستىندە اياعىن سالبىراتىپ جىبەرىپ, سەكىرمەككە وقتالىپ وتىرعان قىزعا جىلى سوزدەر ايتىپ, ونى رايىنان قايتارۋعا تىرىسادى. ويلانىپ تۇرۋعا ۋاقىت جوق, ءبىر-ەكى اۋىز تىلدەسكەننەن كەيىن سەرجانت بەكزات وماشەۆ نارتاۋەكەلگە بەل بۋىپ, قىز وتىرعان بالكوننىڭ توبەسىنە سەكىرىپ تۇسەدى. بالكوننىڭ قار باسقان قاڭىلتىر شاتىرىنىڭ تايعاناق بولعانىن ەسكەرسەك, جانىن شۇبەرەككە تۇيگەن پوليتسيا قىزمەتكەرىنىڭ جۇرەك جۇتقان باتىلدىعىنا ەرىكسىز ءتانتى بولاسىز.
سەرجانت بۇل ومىردەن كۇدەرىن ءۇزىپ, ءۇنسىز جىلاپ وتىرعان قىزدى ءوز-وزىنە كەلگەنشە جۇباتۋ سوزدەرىن ايتىپ, بالكون ۇستىندە ءبىراز وتىرادى. سالدەن كەيىن ونىڭ ارىپتەسى – لەيتەنانت ەراسىل مۇرات ءۇي توبەسىنەن قولىن سوزىپ, ەكەۋىن جوعارىعا تارتىپ العان.
ايدىڭ-كۇننىڭ امانىندا جاس ءومىرىن قيا جازداعان ز. ەسىمدى قىزدى قۇتقارعانىمەن, ساقشىلار وزدەرىنىڭ بۇل ءىسىن ەرلىككە بالامايدى. بولعان وقيعا تۋرالى ايتقاندارى دا تىم قىسقا بولدى. ء«بىز ونى سوزگە تارتىپ, اقىلعا كەلۋىن وتىندىك. «ز., سەن ءالى جاسسىڭ جانە ادەمىسىڭ, بار ءومىرىڭ الدا», دەگەندى ايتتىق. ونىڭ كوزدەرى ولەۋسىرەپ, ءۇنسىز جىلاپ وتىردى. ايتەۋىر قارسىلىق كورسەتكەن جوق. مەن بالكوننىڭ توبەسىنە سەكىرىپ ءتۇستىم دە, ونى ۇستاي الدىم. ەكەۋىمىز سول جەردە بىرەر مينۋت تۇردىق. وسى ۋاقىت ىشىندە مەن ونى بارىنشا جۇباتۋعا تىرىستىم», دەيدى كوزسىز ەرلىككە بارعان سەرجانت بەكزات وماشەۆ.
وسى وقيعا تۋرالى پوليتسياعا حابارلاعان الگى ايەل ۇيالى تەلەفونىنىڭ بەينەكامەراسىنا بولعان جايتتى باسىنان اياعىنا دەيىن ءتۇسىرىپ العان ەكەن. اتالعان بەينەكورىنىستى الەۋمەتتىك جەلىدە كورگەن ينتەرنەت قولدانۋشىلار پوليتسيا قىزمەتكەرلەرىنىڭ اتىنا نەبىر ماداق سوزدەر ايتىپ, ەرلىك ىسكە لايىقتى باعالارىن بەرگەن. مىسالى, ولار «انتىنا ادال ازاماتتار!», «جارايسىڭدار, بۇگىنگى كۇننىڭ باتىرلارى!», «قازاقتىڭ جىگىتتەرى وسىنداي بولسا كەرەك-ءتى. قوس باتىردان وزگەلەر دە ۇلگى السىن!», «قازاق پوليتسياسى جاساي بەرسىن, حالىق قورعانى بولا بەرسىن!», دەگەن سۇيسىنىسكە تولى پىكىرلەر قالدىرعان.
سونداي-اق, جەلى قولدانۋشىلارى وقيعانى پوليتسياعا حابارلاپ, بولعان جايتتىڭ ءبارىن بەينە كامەراعا تۇسىرگەن, وزگەنىڭ ومىرىنە ەت جۇرەگى ەزىلە ۋايىم جەگەن مەيىربان ايەلدىڭ اتىنا دا ماقتاۋ ايتادى. «تۇسىرگەن جان دا كەرەمەت, ادام جانىن تۇسىنەتىن قاسيەتى بار, بىرەۋدىڭ ءومىرى ءۇشىن قينالا بىلەتىن ادام ەكەن! سونىڭ ارقاسىندا بۇل ەكى جىگىتتىڭ ەرلىگى ەلگە كورسەتىلدى. راقمەت ساعان ادال جان!», دەگەن جۇرەكجاردى جازبا قالدىردى ولاردىڭ ءبىرى.
كەيىن بەلگىلى بولعانداي, وقيعانى پوليتسياعا حابارلاپ, قۇتقارۋ وپەراتسياسىن بەينەتاسپاعا تارتقان ايەل ناتاليا اينابەكوۆا دەگەن تۇرعىن بولىپ شىقتى. «باسىندا مەن ادرەنالين سەزىمىن باستان كەشۋ ءۇشىن شاتىرعا شىققان ەكسترەمالدار ەكەن دەپ قالدىم. بىراق بەينەكورىنىستى ۇلكەيتكەن كەزدە توعىزىنشى قاباتتىڭ توبەسىندە جۇرگەن جاس قىزدى بايقادىم دا, ءبىر سۇمدىقتىڭ بولارىن جۇرەگىم سەزدى. بىردەن «102» نومىرىنە وقيعا تۋرالى حابارلادىم. مەنىڭ جەدەل جانە ۇيلەسىمدى ارەكەت ەتكەن پوليتسيا قىزمەتكەرلەرىنە دەگەن العىسىم زور. ادامنىڭ ءومىرىن قۇتقارىپ قالدى. باتىرلار ءبىزدىڭ ارامىزدا», دەيدى وزگەنىڭ ومىرىنە نەمقۇرايدى قاراماعان مەيىرىمدى جان ناتاليا اينابەكوۆا.
كاسىبي قىزمەتىنە, بەرگەن انتتارىنا ادالدىق تانىتقان ءتارتىپ ساقشىلارىنىڭ ادام ءومىرىن ساقتاپ قالۋ جولىنداعى ەرلىك ءىسى جوعارى جاقتاعى باسشىلىقتىڭ نازارىن بىردەن اۋداردى. اتاپ ايتقاندا, ىشكى ىستەر ءمينيسترى ەرلان تۇرعىمباەۆ لەيتەنانت ەراسىل مۇرات پەن سەرجانت بەكزات وماشەۆتى «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن ماراپاتتادى.
سالتاناتتى ءراسىم كەزىندە مينيستر پوليتسيا قىزمەتكەرلەرىنىڭ باتىرلىق جاساۋعا اتاق-داڭق ءۇشىن ەمەس, قىزمەتتىك جانە ازاماتتىق بورىشقا ادالدىق تانىتقاندىقتان باراتىنىن ەسكە سالدى. «سىزدەردىڭ ەرلىك ىستەرىڭىز وسىنىڭ دالەلى جانە بۇل جەكە قۇرامنىڭ بارلىعىنا ۇلگى بولادى», دەدى مينيستر ەرلان تۇرعىمباەۆ.
قاراعاندى
