ءباسپاسوز قىزمەتىنىڭ مالىمەتىنشە, بۇل ءىس-شارانىڭ ماقساتى - تۇرىك ەلىنىڭ ۇزدىك كينو تۋىندىلارىن باۋىرلاس ەلدىڭ كورەرمەنىنە ۇسىنا وتىرىپ, ەكى ەل اراسىنداعى مادەني بايلانىستىڭ دامۋىنا ۇلەس قوسۋ. ەكى باۋىرلاس ەلدى ءبىر-بىرىنە جالعاپ وتىرعان كوپىر ىسپەتتەس تۇرىك كينو ونىمدەرى قازىرگى كۇنى الەمدە وتە تانىمال. قازاق كورەرمەندەرى تۇرىك سەريالدارى مەن كينوفيلمدەرىنە زور ىقىلاس تانىتىپ ءجۇر.
تۇرىك فيلمدەرى اپتاسى اياسىندا ەلوردالىقتاردىڭ نازارىنا سەگىز تۇرىك كينوتۋىندىسى تەگىن كورسەتىلەدى. ولاردىڭ اراسىندا «ۇزىن حيكايا», «كوبەلەكتىڭ ءتۇسى», «ۇمىتسام, سىبىرلا», «ەرتۇعىرىل 1890», «باستىق ءىستىڭ ءساتتى اياقتالعانىن قالايدى», «سيقىرشى», «قىزىل ورامالدى شىنارىم» سياقتى فيلمدەر بار.
