وتاندىق كينەماتوگرافيا مەن تەاتر ساحناسىندا شوقتىعى بيىك ايەلدەر وبرازىن قالىپتاستىرعان تالانتتى ونەر ساڭلاعىمەن قوشتاسۋعا كەلگەن حالىقتىڭ قاراسى قالىڭ بولدى. قارالى جيىندى اشقان تەاتر ديرەكتورى, قازاقستاننىڭ ەڭبەك سىڭىرگەن قايراتكەرى ازامات ساتىبالدى اياۋلى جانمەن قوشتاسۋعا كەلگەن قاۋىمعا كوڭىل ايتىپ, كورنەكتى اكتريسا تۋرالى از-كەم تولعانىسىن ءبىلدىردى.
«رايسا ماجيتقىزى سانالى عۇمىرىن قازاق ونەرىنە ارنادى, تەاتر مەن كينو كورەرمەندەرى ءۇشىن سۇلۋلىقتىڭ سيمۆولى بولدى. كينودا جاساعان ءاربىر وبرازى كورەرمەننىڭ كوز الدىندا قالدى. ساحناداعى, ەكرانداعى تاماشا بەينەلەرىمەن كورەرمەننىڭ جۇرەگىن جاۋلاي العان سيرەك دارىن يەسى ەكەنىن ونەرسۇيەر قاۋىم تولىق مويىندادى. وسى بەينەلەردى كورىپ وسكەن وزىنەن كەيىنگى بۋىنداعى جاس قىزدار مەن جىگىتتەر وعان ەلىكتەدى, بوي تۇزەدى. ءوزى سۇيىكتى جارى, سەرىگى, بالالارىنىڭ اكەسى بولعان عابيت مۇسىرەپوۆ اتىنداعى تەاتردا تابانىنىڭ ءىزى, جۇرەگىنىڭ ءۇنى قالدى. ونەردە اسقاق بولدى, بيىك بولدى» دەدى تەاتر ديرەكتورى.
بۇدان ارى قاراي ازا تۇتۋ ءراسىمىن نۇر-سۇلتان قالاسىنان ارنايى كەلگەن رەسمي وكىل, بەلگىلى قوعام قايراتكەرى ءمادي ءادي ۇلى جۇرگىزدى. ول الدىمەن پرەزيدەنت قاسىم-جومارت توقاەۆتىڭ كوڭىل ايتۋ جەدەلحاتىن وقىپ بەردى.
«بەلگىلى مادەنيەت قايراتكەرى, تەاتر جانە كينو ءارتىسى رايسا ماجيتقىزى مۇحامەدياروۆانىڭ دۇنيەدەن وتۋىنە بايلانىستى اۋىر قايعىلارىڭىزعا ورتاقتاسىپ, كوڭىل ايتامىن. رايسا ماجيتقىزى ۇزاق جىلدار بويى تەاتردا ونەر كورسەتىپ, كەيىپكەرلەردى اسقان شەبەرلىكپەن ساحناعا شىعارا ءبىلىپ, كورەرمەن قاۋىمنىڭ ىستىق ىقىلاسىنا بولەندى. سونداي-اق كوركەم فيلمدەرگە ءتۇسىپ, كوپتەگەن باستى رولدەردى سومدادى. ونىڭ ەسىمى مەن جارقىن بەينەسى ونەرسۇيەر قاۋىنىڭ جۇرەگىندە ماڭگى ساقتالادى. مارقۇمنىڭ جانى ءجانناتتا, يمانى سالامات بولسىن» دەلىنگەن پرەزيدەنتتىڭ جەدەلحاتىندا.
ءمادي ءادي ۇلى مارقۇمنىڭ تۋعان-تۋىستارى مەن ازالى جيىن قاتىسۋشىلارىنا پارلامەنت سەناتىنىڭ توراعاسى داريعا نازارباەۆانىڭ, مادەنيەت جانە سپورت ءمينيسترى اقتوتى رايىمقۇلوۆانىڭ كوڭىل ايتۋ جەدەلحاتتارىن وقىپ بەردى.
ء«ان شاقىرادى», «مەنىڭ اتىم قوجا», «نايزاتاس باۋرايىندا» سياقتى ەستەن كەتپەس ەلەۋلى فيلمدەرمەن كورەرمەن ماحابباتىنا بولەنگەن اكتريسا بۇدان وزگە دە 30-عا تارتا كينوفيلمگە ءتۇسىپ, ارۋ قىزدار مەن اق جاۋلىقتى انالار وبرازى ارقىلى تانىمال تەاتر تارلانىنا اينالا ءبىلدى. قازاق ونەرىنىڭ دامۋىنا سۇبەلى ۇلەس قوسقان رايسا ماجيتقىزىنىڭ قايتىس بولۋىنا بايلانىستى ونىڭ ونەردەگى ەڭبەگىن زور باعالاي وتىرىپ قايعىلى كوڭىلىن بىلدىرگەن جەدەلحاتتار الماتى جانە نۇر-سۇلتان قالاسىنىڭ اكىمدەرىنەن دە كەلىپ ءتۇستى. الماتى قالاسى اكىمىنىڭ كوڭىل ايتۋ جەدەلحاتىن ءتىل باسقارماسىنىڭ باسشىسى ماماي احەت پەن نۇر-سۇلتان قالاسى اكىمىنىڭ جەدەلحاتىن ق.قۋانىشباەۆ اتىنداعى قازاق مەملەكەتتىك دراما تەاترىنىڭ ديرەكتورى اسحات ماەميروۆ وقىپ بەردى.
قوشتاسۋ راسىمىندە بەلگىلى كينورەجيسسەرلەر ساتىبالدى نارىمبەتوۆ, بولات قالىمبەتوۆ, قازاقستاننىڭ حالىق ءارتىسى روزا اشىربەكوۆا ونەر شەبەرىمەن بىرگە ءجۇرىپ قىزمەت ىستەگەن جىلدارىن ەسكە الىپ, ونىڭ جايساڭ مىنەزى مەن جاقسى قاسيەتى تۋرالى جىلى لەبىزدەرىن ايتتى.
قارالى جيىن سوڭىندا مارقۇمنىڭ دەنەسى «كەڭساي-2» زيراتىنا جەرلەنەتىنى جونىندە حابارلاندى.
الماتى
