ەكونوميكا • 07 قاراشا، 2019

اۋىلدى دامىتۋعا – ايرىقشا نازار

49 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا «بيزنەستىڭ جول كارتاسى-2020» مەملەكەتتىك باعدارلاماسىن ىسكە اسىرۋ قورىتىندىلارى جانە «بيزنەستىڭ جول كارتاسى-2025» باعدارلاماسىنا ۇسىنىلاتىن شارالار قارالدى. سونداي-اق ۇكىمەت وتىرىسىندا «اۋىل – ەل بەسىگى» جوباسىن ىسكە اسىرۋ بارىسى تالقىلاندى.

«بيزنەستىڭ جول كارتاسى-2025» باستالادى

ءبىرىنشى ماسەلە بويىنشا ءسوز العان ۇلتتىق ەكونوميكا ءمينيسترى رۋسلان دالەنوۆ­تىڭ ايتۋىنشا، بيزنەستىڭ جول كارتا­سىنىڭ ەكىنشى بەسجىلدىعىن ىسكە اسى­رۋدا ناقتى ناتيجەلەرگە قول جەتكى­زىلدى. قابىلدانعان شارالاردىڭ نەگىزىندە قا­زاقستان دۇنيەجۇزىلىك بانكتىڭ Doing Business رەيتينگىسىندە 25-ورىنعا يە بولدى. بۇل رەيتينگتە ەلىمىز 2015 جىلمەن سالىستىرعاندا 16 پوزيتسياعا كوتەرىلدى. ىشكى جالپى ونىمدەگى شاعىن جانە ورتا بيزنەستىڭ ۇلەسى 28،4%-عا ۇلعايدى.

«2015 جىلمەن سالىستىرعاندا شاعىن جانە ورتا بيزنەس سۋبەكتىلەرىنىڭ سانى 400 مىڭعا كوبەيىپ، 1،3 ملن-دى قۇرادى. سونداي-اق شوب-تا جۇمىسپەن قامتىلعانداردىڭ سا­نى 300 مىڭعا ءوسىپ، 3،3 ملن ادامعا جەتتى»، دەدى ۇلتتىق ەكونوميكا ءمينيسترى.

باعدارلامانى ىسكە اسىرۋ ءۇشىن بيۋدجەتتەن 282 ملرد تەڭگە ءبولىندى.

«سونىڭ ناتيجەسىندە 16 مىڭنان استام شاعىن جانە ورتا بيزنەس سۋبەكتىلەرى قار­جى­لاندىرىلدى، 100 مىڭنان استام كاسىپكەر وقىتىلدى، 15،5 ترلن تەڭگەنىڭ ءونىمى ءوندىرىلدى، 1 ترلن تەڭگە شاماسىندا سالىق تولەندى»، دەدى ر. دالەنوۆ.

باعدارلاما بيزنەستى دامىتۋعا مۇمكىندىك بەرەدى. وعان قاتىسۋشىلار 7،1%-بەن نەسيە الا الادى. نەسيەنىڭ ەڭ جوعارى قولجەتىمدى سوماسى – 2،5 ملرد تەڭگە. 60 ملن تەڭگەگە دەيىن كەپىلدىك بەرىپ،  3 ملن تەڭگەگە دەيىن وتەۋسىز گرانت ۇسىنىلادى.

«بيزنەستىڭ جول كارتاسى-2020» شارالارى بيىل اياقتالادى. سوندىقتان باعدارلامانىڭ جاڭا جوباسى ازىرلەندى.

ۇلتتىق ەكونوميكا ءمينيسترىنىڭ ايتۋىنشا، جاڭا جوبادا ماقساتتار مەن مىن­دەتتەر ساقتالعان، قولداۋ قۇرالدارى جەتىل­دىرىلگەن. ولاردىڭ تيىمدىلىگى مەن قولجە­تىمدىلىگى ارتا تۇسپەك. ماسەلەن، اينا­لىم قاراجاتىن نەسيەلەۋ كولەمى 60-تان 360 ملن تەڭگەگە دەيىن ۇلعايادى. قار­جى­لاندىرۋدىڭ قولجەتىمدىلىگىن ارتتىرۋ ءۇشىن ميكروقارجى ۇيىم­دارىنىڭ نەسيەلەرىن سۋبسيديالاۋ جانە كەپىلدەندىرۋ ەنگىزىلەدى.

باعدارلاما قاتى­سۋ­شىلارىنا جۇمىسپەن قامتۋ جانە سالىق تۇسىمدەرىن ارتتىرۋ تالابى جەتىلدىرىلدى. كاسىپكەرلەردى ءار ساتىدا قولداۋ كۇشەيتىلەدى. بۇل – وقىتۋ، نەسيە جانە قولداۋ الۋ ءۇشىن ءتيىستى قۇجاتتاردى دا­يىنداۋ جانە تاۋارلاردى وتكىزۋ جولدارىن ۇيىمداستىرۋ.

ر.دالەنوۆتىڭ ايتۋىنشا باعدار­لا­ما­نىڭ كەلەسى كەزەڭىنە 421 ملرد تەڭگە قاراستىرىلعان. قارجىلاندىرۋ وتكەن بەسجىلدىق كەزەڭگە قاراعاندا ءبىر جارىم ەسەگە ۇلعايادى.

«بيزنەستىڭ جول كارتاسى-2025» باع­دار­لاماسىندا نىسانالى ينديكاتورلار كوزدەلگەن. ولار ەلىمىزدىڭ 2025 جىلعا دەيىنگى ستراتەگيالىق دامۋ جوسپارى­نا سايكەس كەلەدى. ءىجو-دەگى شاعىن جانە ورتا بيزنەستىڭ ۇلەسىن كەم دەگەندە 35%-عا، وڭدەۋشى ونەركاسىپتىڭ ۇلەسىن كە­مىندە 13،4%-عا جەتكىزۋ كوزدەلگەن»، دەدى ۇلتتىق ەكونوميكا ءمينيسترى.

ءوز كەزەگىندە «اتامەكەن» ۇكپ باسقار­ما توراعاسى ابىلاي مىرزاحمەتوۆ بيز­نەستى جۇرگىزۋ نەگىزدەرىن وقىتۋ جانە كاسىپكەر­لەرگە كەڭەستەر بەرۋ بويىنشا جۇرگىزى­لىپ جاتقان جۇمىستار تۋرالى باياندادى. ونىڭ ايتۋىنشا قولدانىستاعى بيزنەستى جۇر­گىزۋگە سەرۆيستىك قولداۋ 200 مىڭ­نان استام كاسىپكەرلىك سۋبەكتىلە­رىنە كورسەتىلدى. مۇنىڭ سىرتىندا مونو­قالالاردا، شاعىن قالالاردا جانە اۋدان ورتالىقتارىندا 500 مىڭنان استام كاسىپكەرگە اقپاراتتىق قولداۋ جاسالدى.

«96 مىڭنان استام كاسىپكەر «بيزنەس-مەكتەپ» كومپونەنتتەرى بويىنشا ترەنينگتەن ءوتتى، 174 كاسىپكەر گەرمانيادا ىسكەر­لىك تاعىلىمدامادان ءوتتى. 26 984 كاسىپ­ورىن اشىلدى، 19 553 رۇقسات قۇجاتى دايىندالدى، 649 ملرد تەڭگەگە قارجىلاندىرۋعا كومەك كورسەتىلدى. كا­سىپ­كەرلەردىڭ 45 500 جوباسى سۇيەمەلدەنىپ، 2 ملن ەۋرو سوماسىنا 24 كەلىسىمشارتقا قول قويىلدى. 2015 جىلدان باستاپ 2019 جىلدىڭ ءى توقسانىنا دەيىن 97 147 كاسىپكەر بيۋدجەتكە 811 ملرد تەڭگە سالىق تولەدى»، دەدى ا.مىرزاحمەتوۆ.

 ماسەلەنى پرەمەر-مينيستر قورىتىندىلادى

 «ەلباسى نۇرسۇلتان نازارباەۆتىڭ اتاپ وتكەنىندەي، مىقتى بيزنەس – ەكونوميكانىڭ تۇراق­تىلىعىن قامتاماسىز ەتۋدىڭ ماڭىزدى فاكتورلارىنىڭ ءبىرى. بيىل مامىر ايىندا مەملەكەت باسشىسى قا­سىم-جومارت توقاەۆ ۇلتتىق ينۆەستور­لار كەڭەسىنىڭ وتىرىسىندا شوب-تىڭ ءرولىن كۇشەيتۋ جانە ونىڭ ەل ەكو­نو­ميكاسىنداعى ۇلەسىن 2025 جىلعا قاراي كەم دەگەندە 35%-عا جەتكىزۋ مىندەتىن قويدى. 2050 جىلى ءبىز 50% كورسەتكىشكە جەتۋىمىز كەرەك. وعان قول جەتكىزۋ ءۇشىن اۋقىمدى جۇمىس جۇرگىزىلىپ جاتىر، سونىڭ ىشىندە زاڭناماعا وزگەرىستەر ەنگىزىلۋدە»، دەدى ا. مامين.

ۇكىمەت باسشىسى «بيزنەستىڭ جول كارتاسى-2020» مەملەكەتتىك باعدارلاماسى ءوزىنىڭ تيىمدىلىگىن دالەلدەگەنىن اتاپ ءوتتى. 2010 جىلدان باستاپ ونى ىسكە اسىرۋدىڭ ناتيجەسىندە 342 مىڭنان استام جۇمىس ورنى ساقتالىپ، 94 مىڭنان استام جاڭا جۇمىس ورنى قۇرىلدى. شاعىن جانە ورتا بيزنەستىڭ ءىجو-دەگى ۇلەسى 2015 جىلعى 24،9%-دان 2018 جىلى 28،4%-عا دەيىن ءوستى. شوب ونىمدەرىنىڭ كولەمى 13،3-تەن 23،4 ترلن تەڭگەگە دەيىن ءوستى. سۋبەكتىلەردىڭ سانى 900 مىڭنان 1،3 ملن-عا دەيىن ءوستى. بيىل قازاقستان دۇنيەجۇزىلىك بانكتىڭ Doing Business بيزنەس جۇرگىزۋ جەڭىلدىگى رەيتينگىندە 28-ورىننان 25-ورىنعا كوتەرىلدى.

2015 جىلدان باستاپ مەملەكەتتىك باعدارلامانى جۇزەگە اسىرۋعا 282 ملرد تەڭگە ءبولىندى، جاڭا «بيزنەستىڭ جول كارتاسى-2025» باعدارلاماسى اياسىندا ءبىر جارىم ەسە كوپ قاراجات – 421 ملرد تەڭگە قاراستىرىلعان.

پرەمەر-مينيستر ۇلتتىق ەكونوميكا مينيسترلىگىنە قاراشا ايىنىڭ سوڭىنا دەيىن «بيزنەستىڭ جول كارتاسى-2025» باعدارلاماسىنىڭ قابىلدانۋىن قامتاماسىز ەتۋدى، جىل سوڭىنا دەيىن قاجەتتى نورماتيۆتىك قۇقىقتىق اكتىلەر­دىڭ قابىلدانۋىن قامتاماسىز ەتۋدى، «اتا­مەكەن» ۇكپ جانە «دامۋ» اق-مەن بىرلەسىپ، كاسىپكەرلەر اراسىندا جاڭا باعدارلامانىڭ تاسىلدەرى مەن مۇمكىن­دىكتەرى تۋرالى اقپاراتتىق-ءتۇسىندىرۋ جۇمىستارىن جۇرگىزۋدى تاپسىردى.

 «اۋىل – ەل بەسىگى» جوباسى حالىق ءومىرىن جاقسارتادى

ۇكىمەت وتىرىسىندا قارالعان ەكىنشى ماسەلە – «اۋىل – ەل بەسىگى» جوباسىن ىسكە اسىرۋ بارىسى تۋرالى بايانداعان  پرەمەر-ءمينيستردىڭ ورىنباسارى رومان سكلياردىڭ ايتۋىنشا  قازىر ەلىمىزدەگى 6 443 اۋىلدا 7،7 ملن ادام تۇرادى (بۇل – ەل حالقىنىڭ 42%-ى).

«بۇگىندە اۋىلدىق جەرلەردە بىرقاتار شەشىلمەگەن ماسەلە بار. اۋىلدىڭ جارتىسىنان استامىندا كوشەنى جوندەۋ قاجەت. ينجەنەرلىك جەلىلەر توزۋىنىڭ جوعارى دەڭگەيى بايقالادى. كوپتەگەن اۋىلدا ءبىلىم بەرۋ جانە دەنساۋلىق ساقتاۋ وبەكتىلەرى جوندەۋدى قاجەت ەتەدى. وسىعان بايلانىستى اۋىلدى دامىتۋ ءۇشىن كەشەندى ءتاسىل قولدانۋدى ۇسىنامىز»، دەدى ر. سكليار.

وسى ماقساتتا ءبىرىنشى كەزەكتە قول­دانىس­تاعى مەملەكەتتىك باعدارلامالار مەن «اۋىل – ەل بەسىگى» جوباسى ەسەبىنەن اۋىل ينفراقۇرىلىمى جاڭعىرتىلادى، سونىمەن بىرگە اگ­روونەر­­كاسىپتىك كەشەندى دامىتۋ، «بيزنەس­تىڭ جول كارتاسى-2020»، «ەڭبەك» جانە باس­قا دا قولدانىستاعى باعدارلاما شەڭ­بەرىن­دە كاسىپكەرلىكتى قولداۋ جۇزەگە اسىرىلادى.

قازىر دامۋ الەۋەتى بار 3 477 اۋىل ىرىكتەلىنىپ الىندى، سونىڭ ىشىندە 1 150 تىرەك اۋىل مەن 200 شەكارا ماڭىنداعى اۋىل بار. 2 327 اۋىل سپۋتنيكتىك اۋىل قاتارىنا جاتقىزىلعان. اتالعان  ەلدى مەكەندەردە 6،6 ملن ادام نەمەسە اۋىل حالقىنىڭ 85%-ى تۇرادى. بۇل اۋىلداردى دامىتۋعا باسىمدىق بەرىلمەك.

حالىق سانى ءوسۋىنىڭ، مال شارۋاشىلىعى مەن وسىمدىك شارۋاشىلىعىنىڭ جالپى قوسىلعان قۇننىڭ، حالىقتىڭ جۇمىسپەن قامتىلۋىنىڭ جىل سايىنعى ءوسۋ ديناميكاسى بار وسىنداي اۋىلدار ءىرى ەلدى مەكەندەرگە جاقىن ورنالاسقان.

«بۇل اۋىلدارداعى ماسەلەلەردى كە­شەن­دى شەشۋ ءۇشىن ءبىراز قاراجات قاجەت. الدىن الا ەسەپتەۋلەر بويىنشا 900 ملرد تەڭگە كەرەك. بۇل قارجىنىڭ  70%-ىن نەمەسە 630 ملرد تەڭگەسىن رەسپۋب­ليكالىق بيۋدجەتتەن، ال قالعان 30%-ىن نەمەسە 270 ملرد تەڭگەنى جەرگىلىكتى بيۋدجەتتەن ءبولۋ كوزدەلەدى»، دەدى ر.سكليار.

قازىر شامامەن 700 مىڭ ادام تۇ­را­تىن 53 اۋىلدا 30 ملرد تەڭگەگە 452 ين­فرا­قۇرىلىمدىق جوبا ىسكە اسىرىلۋدا.

بۇلار الەۋمەتتىك جانە ينجەنەرلىك ينفراقۇرىلىمداردى جوندەۋ جانە قايتا جاڭارتۋ جو­نىندەگى جوبالار بولىپ تابىلادى. قارا­جاتتار جوسپارلى تۇردە يگەرىلۋدە.

«سونداي-اق تۇڭعىش پرەزيدەنت – ەلبا­سىنىڭ «رۋحاني جاڭعىرۋ» باعدار­لاماسى اياسىندا تۋعان اۋىلداردى اباتتاندىرۋ بويىنشا ءىرى كاسىپكەرلەردىڭ «كىشى وتانىنا» قامقورلىقپەن قاراۋ مەن مە­تسەناتتىق جاساۋدىڭ جارقىن مىسالدارى بار»، دەدى ر.سكليار.

ينفراقۇرىلىمدى جاڭعىرتۋ بويىنشا بيىل وڭ ناتيجەلەرگە قول جەتكىزىلدى.

«بۇل جۇمىستىڭ باستاماسى عانا. ونى 2020 جىلى جالعاستىرامىز. ەلىمىزدىڭ بارلىق وڭىرلەرىندە اۋىل ينفراقۇرىلىمىن كەڭ اۋقىمدى جاڭعىرتۋ باستالادى. كوزدەلگەن 30 ملرد تەڭگەگە 2020  جىلى قوسىمشا 50 ملرد تەڭگە بولىنەتىن بولادى»، دەدى پرەمەر-ءمينيستردىڭ ورىنباسارى.

جالپى بولىنەتىن قاراجاتقا 250 اۋىلدا 1641 جوبانى ىسكە اسىرۋ جوسپار­لانۋدا. اۋىل حالقىن جۇمىسپەن قام­تۋدى قامتاماسىز ەتۋ جانە ىسكە اسىرى­لىپ جاتقان جوبالارعا جاڭا داعدى الۋ ماق­ساتىندا اۋىل جاستارى تارتىلاتىن بولادى. جۇرگىزىلىپ جاتقان ينفراقۇرىلىمدى جاڭعىرتۋ اۋىل ەكونوميكاسىن دامىتۋعا جاڭا سەرپىن بەرەدى.

ۇسىنىلعان شارالاردى ءتيىمدى ىسكە اسىرۋ ءۇشىن رەسپۋبليكالىق جول كارتا­سى­نىڭ جوباسى ازىرلەندى. تىرەك جانە سپۋتنيكتىك اۋىلداردى 2027 جىلعا دەيىن دامىتۋ كەستەسىن جاساۋ جوسپارلانعان. «اۋىل – ەل بەسىگى» جانە باسقا دا مەملە­كەتتىك باعدارلامالار شەڭبەرىندە ءاربىر اۋىلدى قارجىلاندىرۋ كولەمى مەن كوز­دەرىن انىقتاۋ قاجەت. اۋىل ەكونوميكاسىن دامىتۋ كارتاسىن ازىرلەپ، ءتيىستى جوبالىق قۇجاتتامانى دايىنداۋ كەرەك.

«اۋىل – ەل بەسىگى» جوباسىن ىسكە اسىرۋ 7 جىل ىشىندە 7 ملن حالىقتىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى. 7 مىڭ شاقىرىمنان استام كەنتى­شى­لىك كوشەلەر سالىنىپ، جوندەۋدەن وتكى­زىلەدى. بارلىق اۋىل ساپالى اۋىز سۋمەن قامتىلاتىن بولادى. الەۋمەتتىك نىسانداردى جاڭعىرتۋ بويىنشا كەڭ اۋقىمدى جۇمىستار جۇرگىزىلەدى. جالپى، بارلىق شارالار كەشەنى اۋىلداردى ودان ءارى سەرپىندى دامىتۋدى قامتاماسىز ەتەدى، بۇل ءوز كەزەگىندە ەل ەكونوميكاسىنا وڭ اسەرىن تيگىزەدى.

وسى ماسەلەدەگى وڭىرلەردەگى جاعداي تۋرالى الماتى وبلىسىنىڭ اكىمى اماندىق باتالوۆ، شىعىس قازاقستان وبلىسىنىڭ اكىمى دانيال احمەتوۆ، اقمولا وبلى­سى­نىڭ اكىمى ەرمەك مارجىقپاەۆ باياندادى.

ماسەلەنى قورىتىندىلاعان پرەمەر-مي­نيستر اسقار مامين «اۋىل – ەل بەسىگى» جوباسىن ىسكە اسىرۋ ەلباسىنىڭ 2019 جىلعى 27 اقپاندا Nur Otan پارتيا­سىنىڭ XVIII سەزىندە بەرگەن تاپسىرمالارىنا سايكەس باستالعانىن اتاپ ءوتتى. ەلباسى نۇرسۇلتان نازارباەۆتىڭ جانە پرەزيدەنت قاسىم-جومارت توقاەۆتىڭ تاپسىرمالارى بويىنشا ازىرلەنگەن جوبا اۋدان، قالا مەن وبلىستار بو­يىنشا اۋماقتاردى دامىتۋدىڭ وڭىرلىك باعدارلامالارىنا بەرىك نەگىز بولا الادى.

پرەمەر-مينيستر جوبانى ىسكە اسىرۋ اياسىندا 7 جىل ىشىندە اۋىلداردىڭ بارلىق ينفراقۇرىلىمىن جاڭارتۋ، 7 مىڭ شاقىرىمنان استام جولدى جانە اۋىلىشىلىك كوشەلەردى سالۋ جانە جوندەۋ، تىرشىلىكتى قامتاماسىز ەتەتىن ينجەنەرلىك جەلىلەردى سالۋ، ساپالى اۋىز سۋمەن 100% قامتاماسىز ەتۋ، ءبىلىم بەرۋ، دەنساۋلىق ساقتاۋ، مادەنيەت جانە سپورت وبەكتىلەرىن رەكونسترۋكتسيالاۋ جانە سالۋ، سونىمەن قاتار 130 مىڭ جاڭا جۇمىس ورنىن قۇرۋ ارقىلى 7 ملن-عا جۋىق اۋىل تۇرعىنىنىڭ تۇرمىس ساپاسىن جاقسارتۋ كۇتىلىپ وتىرعانىن اتاپ ءوتتى. ول «اۋىل – ەل بەسىگى» جوباسىن قارجىلاندىرۋدى ۇلعايتۋ تۋرالى ۇسىنىستار ەنگىزۋدى، جىلدار بويىنشا توپتاستىرىپ جانە قاجەتتى قار­جىلاندىرۋ كولەمىمەن تىرەك جانە سپۋت­نيكتىك اۋىلدىق ەلدى مەكەندەردىڭ ءتىزى­مىن قايتا قاراۋدى، سونداي-اق جىل سوڭىنا دەيىن 2020-2026 جىلدارعا ارنالعان جاڭارتىلعان «اۋىل – ەل بەسىگى» جوباسىن دايىنداۋدى تاپسىردى.

 كەلەسى جىلعا جوسپارلانعان زاڭ جوبالارى

كۇن تارتىبىندەگى ءۇشىنشى ماسەلە – ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپارىنىڭ جوباسى  تۋرالى ادىلەت ۆيتسە-ءمينيسترى ناتاليا پان بايانداما جاسادى. ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆو­ارالىق كوميسسيا مۇشەلەرىمەن بىرلەسىپ، ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپار جوباسىن ازىرلەدى.

جوسپار جوباسى پرەزيدەنت پەن مەملە­كەتتىڭ ستراتەگيالىق قۇجاتتارىندا ايقىن­دالعان مىندەتتەر نەگىزىندە ازىرلەنگەن، وندا 16 زاڭ جوباسىن ازىرلەۋ قاراستىرىلعان. ولار الەۋمەتتىك قامسىزداندىرۋ، دە­نە شىنىقتىرۋ جانە سپورت، ارنايى مەم­لەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قا­تى­ناستارى، ەرەكشە تاۋارلاردى باقىلاۋ، كورنەكى اقپارات جانە باسقا دا سالالاردى ودان ءارى دامىتۋعا باعىتتالعان.

الداعى جىلى 2 جاڭا زاڭ جوباسىن ازىر­لەۋ كوزدەلىپ وتىر. بۇل – «ەرەكشە تا­ۋارلاردى باقىلاۋ تۋرالى» جانە «وسىمدىك الەمى تۋرالى» زاڭ جوبالارى. «ەرەكشە تاۋارلاردى باقىلاۋ تۋرالى» زاڭ جوباسىن جاڭا رەداكتسيادا ازىر­لەۋ ۇلتتىق ەكسپورتتىق باقىلاۋ جۇيە­سىن جەتىلدىرۋ، سونداي-اق ۇلتتىق جانە وڭىر­لىك قاۋىپسىزدىكتى قامتاماسىز ەتۋگە باعىت­تالعان. «وسىمدىك الەمى تۋرالى» جاڭا زاڭ جوباسىن ازىرلەۋ وسىمدىكتەر دۇنيەسى وبەك­تىلەرىن قورعاۋ جانە پايدالانۋ سالاسىن­داعى قاتىناستاردى رەتتەۋدى قامتاماسىز ەتۋ، ولاردى ءتيىمدى باسقارۋ ءۇشىن جاعداي جاساۋ ماقساتىندا قاجەت.

 بۇدان باسقا، الداعى جىلى مەملەكەت باسشىسىنىڭ 2019 جىلعى 2 قىركۇيەكتەگى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنان تۋىندايتىن 2 زاڭ جوباسى پارلامەنتكە ەنگىزىلەتىن بولادى. جوسپار جوباسىندا كوزدەلگەن 16 زاڭ جوباسىنىڭ ىشىنەن پارلامەنتكە 2020 جىلدىڭ ءبىرىنشى جارتىجىلدىعىندا – 4، ال ەكىنشى جارتىجىلدىعىندا – 12 زاڭ جوباسىن ەنگىزۋ جوسپارلانۋدا.

يندۋستريا جانە ينفراقۇرىلىمدىق دامۋ مينيسترلىگى 3 زاڭ جوباسىن ازىر­لەيدى. قورعانىس، ۇلتتىق ەكونوميكا، سىرتقى ىستەر، مادەنيەت جانە سپورت، ەكو­لوگيا، گەولوگيا جانە تابيعي رەسۋرستار، ەڭبەك جانە حالىقتى الەۋمەتتىك قور­عاۋ مينيسترلىكتەرى 2 زاڭ جوباسىنان ازىر­لەيدى. قارجى مينيسترلىگى ءبىر زاڭ جوباسىن ۇسىنۋى ءتيىس.

بۇل ماسەلە جونىندە «ادىلەت مينيستر­لىگىنە سالالىق مەملەكەتتىك ورگاندارمەن بىرلەسىپ، ەنگىزىلىپ جاتقان زاڭ جوبا­لارىنىڭ ساپاسىنا ەرەكشە نازار اۋدارۋ كەرەك»، دەگەن ۇكىمەت باسشىسى ءتيىستى تاپسىرمالار بەردى.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار