قوعام • 06 قاراشا، 2019

قىزدار ۋنيۆەرسيتەتىنىڭ جاس عالىمدار كەڭەسى ۇزدىك دەپ تانىلدى

41 رەت كورسەتىلدى

قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى ۇيىمداستىرعان رەسپۋبليكالىق بايقاۋدا قازاق ۇلتتىق قىزدار پەداگوگيكالىق ۋنيۆەرسيتەتىنىڭ جاس عالىمدار كەڭەسى ۇزدىك دەپ تانىلدى. بۇل تۋرالى وقۋ ورنىنىڭ ءباسپاسوز قىزمەتى حابارلادى. 

ءداستۇرلى كونكۋرسقا ەلىمىزدىڭ عىلىمي ۇيىمدارى مەن جوعارى وقۋ ورىندارىنداعى جاس عالىمدار كەڭەستەرى قاتىسقان.

«كونكۋرستىق كوميسسيا جەڭىمپازدى انىقتاۋ بارىسىندا ۇيىمنىڭ بەلسەندىلىگى مەن جۇمىس ناتيجەلىلىگى، كەڭەستىڭ جۇزەگە اسىراتىن شارالارىنىڭ ەرەكشەلىگى مەن ماڭىزدىلىعى سىندى كريتەريلەرگە سۇيەنگەن. كوميسسيا شەشىمى بويىنشا قىزدار ۋنيۆەرسيتەتىنىڭ جاس عالىمدار كەڭەسى بارلىق تالاپتار بويىنشا جوعارى ناتيجە كورسەتىپ، «جۇزدەن – جۇيرىك، مىڭنان – تۇلپار شىقتى»، – دەپ اتاپ ءوتتى ۋنيۆەرسيتەتتىڭ ءباسپاسوز قىزمەتىنىڭ جەتەكشىسى جاندار اسان.

جەڭىمپاز ۇيىم ارنايى ديپلوممەن جانە ءوز قىزمەتىن قولداۋ مەن دامىتۋعا ارنالعان گرانتپەن ماراپاتتالادى. ماراپاتتاۋ ءراسىمى 7 قاراشا كۇنى تاراز قالاسىنداعى م.ح. دۋلاتي اتىنداعى تاراز مەملەكەتتىك ۋنيۆەرسيتەتىندە وتەتىن «قازىرگى قازاقستانداعى يننوۆاتسيالىق دامۋ جانە عىلىمنىڭ قاجەتتىلىگى» اتتى حالىقارالىق عىلىمي كونفەرەنتسيادا وتپەك.

«كونكۋرس جاس عالىمدار كەڭەسىنىڭ قىزمەتىن دامىتۋعا سەپتىگىن تيگىزەدى. بايقاۋدىڭ  ماقساتى – جاس عالىمداردىڭ باستامالارىن قولداۋ، سونداي-اق ولاردىڭ عىلىمي باستامالارى مەن جوبالارىن جۇزەگە اسىرۋعا كومەك كورسەتۋ»، – دەيدى قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ وكىلدەرى.

وسى ورايدا ايتا كەتەيىك، ءمولدىر ابدرايموۆا جەتەكشىلىك ەتەتىن ۋنيۆەرسيتەتتىڭ جاس عالىمدار كەڭەسى ستۋدەنتتەر مەن جاس ىزدەنۋشىلەردىڭ ىرگەلى جانە قولدانبالى زەرتتەۋلەرىنە قولداۋ كورسەتىپ، وقۋ ورنىنىڭ عىلىمي الەۋەتەنىڭ ارتۋىنا سەرپىن بەرىپ كەلەدى.

 

 

الماتى

سوڭعى جاڭالىقتار

ۇقساس جاڭالىقتار