كورمەنىڭ ماقساتى – ەلىمىزدىڭ تاريحي-مادەني باي مۇراسىمەن شەتەلدىك كورەرمەندى تانىستىرۋ. وعان ەڭ الدىمەن ەلىمىزدىڭ سيمۆولى – «التىن ادام» قويىلادى.
«قازاق تۋتانحامونى» دەگەن ات بەرىلىپ, «عاسىر جاڭالىعى» دەپ تانىلعان دالا بيلەۋشىسىنىڭ تاجىندەگى قاناتتى التىن پىراق اشەكەيلەرى قازاقستان رەسپۋبليكاسى ەلتاڭباسىنىڭ بولشەگىنە اينالىپ, ال التىن ادامنىڭ ءمۇسىنى الماتىداعى تاۋەلسىزدىك الاڭىنا ورناتىلعان.
جارتى عاسىرعا جۋىق ۋاقىت وتكەننەن كەيىن قازاقستان رەسپۋبليكاسى ۇلتتىق مۋزەيى حالىقارالىق «التىن ادامنىڭ الەم مۋزەيلەرىنە شەرۋى» جوباسىن جاريالادى. اۋقىمدى شارا شەڭبەرىندەگى كورمەلەر بەلارۋس, رەسەي, ازەربايجان, قىتاي, پولشا, وڭتۇستىك كورەيا, وزبەكستان, مالايزيا جانە تۇركيا مۋزەيلەرىندە ۇلكەن جەتىستىكپەن ءوتتى.
افينا ەپيگرافيالىق مۋزەيىندەگى كورمەدەن كيىمى التىن جاپسىرمالى جانە جەبە, قار بارىسى, ارقار, جىلقى جانە قۇس تۇرىندەگى التىن تىلىمشەلەر اشەكەيلەپ تۇرعان كونۋس ءپىشىندى ەرەكشە باس كيىمدى التىن ادامنىڭ رەكونسترۋكتسياسىن جانە وسى جاس ساق جاۋىنگەرىمەن (ارحەولوگتاردىڭ پىكىرلەرى بويىنشا 17-18 جاستار شاماسىندا) بىرگە جەرلەنگەن ەرتە تەمىر عاسىرىنىڭ (ب.د.د V-IV عع.) ارحەولوگيالىق ولجالارىنىڭ كوللەكتسياسىن تاماشالاۋعا بولادى.
كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان بارلىعى 144 زات ۇسىنىلادى.
