نۇر-سۇلتان قالاسىندا ءوتىپ جاتقان ءىس-شاراعا الەمنىڭ 19 ەلىنەن: اقش, رەسەي, قىتاي, تۇركيا, وڭتۇستىك كورەيا, ەۋروپا جانە يسلام مەملەكەتتەرىنەن 200-دەن استام ماي ونىمدەرىن وڭدەۋشىلەر قاتىسۋدا.
كونفەرەنتسيا جۇمىسىنىڭ اشىلۋىندا ءسوز سويلەگەن اۋىل شارۋاشىلىعى ءمينيسترى س.وماروۆ, قازاقستان مايلى داقىلداردان شيكىزات پەن دايىن ءونىمدى ءوندىرۋ جانە ەكسپورتتاۋ سالاسىندا ەلەۋلى ەڭبەك ەتىپ جاتقانىن ايتىپ, مينيسترلىك تاراپىنان اتالمىش سالانى قولداۋدى تۇراقتى تۇردە جالعاستىراتىنىن اتاپ ءوتتى.
«سوڭعى 10 جىلدا مايلى داقىلدار القابىنىڭ كولەمى 2,5 ەسەگە وسكەن. ءوسىم زىعىر القاپتارى 5 ەسەگە, سويا القاپتارى - 2 ەسەگە, سافلور مايىنىڭ - 39 پايىزعا كەڭەيتۋ ناتيجەسىندە قول جەتكىزگەن. تۇراقتى سۇرانىستىڭ ارقاسىندا مايلى داقىلداردىڭ ەكسپورتى جىل سايىن ارتىپ كەلەدى. بۇگىندە ءبىز مايلى داقىلداردىڭ 40 پايىزىن شيكىزات تۇرىندە ەكسپورتتايمىز. 2018 جىلى شيكىزات ەكسپورتىنىڭ كولەمى 2017 جىلمەن سالىستىرعاندا 21,6 پايىزعا, 2016 جىلمەن سالىستىرعاندا 73,4 پايىزعا ءوسىپ, 1 ملن توننا قۇرادى»- دەدى س. وماروۆ.
بۇگىندە رەسپۋبليكادا جالپى قۋاتى جىلىنا 2,0 ملن.توننا مايلى داقىلداردى وڭدەيتىن 52 كاسىپورىن بار. اعىمداعى جىلدىڭ 9 ايىندا تازارتىلعان جانە تازارتىلماعان مايلاردىڭ ءوندىرىسى وتكەن جىلدىڭ وسى كەزەڭىمەن سالىستىرعاندا 32,4 پايىزعا ارتىپ, 343,5 مىڭ توننانى قۇرادى. سوڭعى 5 جىلدا تازارتىلماعان زىعىر مايىن ءوندىرۋ 34 ەسەگە ارتقان.
اۋىل شارۋاشىلىق مينيسترلىگى الداعى ۋاقىتتا نەگىزى دايىن ونىمدەردى ەكسپورتتاۋ مىندەتى تۇرعانىن, وسى ماسەلەنى شەشۋ ءۇشىن تىڭايتقىشتارعا, تۇقىمدار مەن گەربيتسيدتەرگە جەڭىلدەتىلگەن كرەديت بەرىپ, سونداي-اق سۋبسيديالاردى قارجىلاندىرۋ ارقىلى اتالمىش سالانى قولداۋدى جالعاستىرانىن ايتتى. الەمدىك جانە وتاندىق ماي نارىعىنىڭ جەتەكشى كومپانيالارى, بيزنەس جانە اگرارلىق عىلىم سالاسىنىڭ وكىلدەرى باس قوسقان كونفەرەنتسيانىڭ نەگىزگى ماقساتى بۇگىنگى ماي نارىعىنىڭ دامۋ ۇردىستەرى مەن ەرەكشەلىكتەرى, سالاداعى نارىقتىڭ سوڭعى جاڭالىقتارى, ءوزارا ساۋدا ساتتىقتىڭ كولەمىن ۇلعايتۋ جانە ت.ب. ماسەلەلەردى تالقىلاۋ بولىپ تابىلادى.
كونفەرەنتسيا باعدارلاماسى ءۇش نەگىزگى سەسسيادان تۇرادى: «قازاقستاننىڭ ماي سالاسىن دامىتۋدىڭ قازىرگى جاعدايى جانە بولاشاقتاعى دامىتۋ ستراتەگياسى», «ماي جانە قايتا وڭدەۋ نارىعىنىڭ 2019/2020 جىلعى پەرسپەكتيۆالارى» جانە «ماي داقىلدارى ءوندىرىسىنىڭ بولاشاعى». سونداي-اق «قازاقستان الەمدىك ماي داقىلدارى نارىعىنىڭ نەگىزگى ۇردىستەرى, تۇتىنۋ نارىقتارى» اتتى پىكىر-تالاس الاڭى جۇمىس ىستەۋدە.
كونفەرەنتسيا بارىسىندا ماي نارىعى باعىتىنىڭ وزەكتى ماسەلەلەرىن تالقىلاۋ ءۇشىن بىرقاتار تانىمال قازاقستاندىق جانە شەتەلدىك ساراپشىلار ءسوز سويلەيدى دەپ كۇتىلۋدە.
