«ارالاسپاسا, اعايىن دا جات» دەپ تەككە ايتىلماسا كەرەك. ونىڭ ۇستىنە كورشى ەلدە تۇرىپ جاتقان اعايىندارىمىزدىڭ قاتارى كوپ ەكەنىن ەسكەرسەك, مۇنداي بايلانىستاردىڭ ماڭىزى ولشەۋسىز ەكەنى ايتپاسا دا تۇسىنىكتى. جۋىردا قورعان وبلىسىنا قاراستى ماكۋشين اۋدانىندا العاشقى قازاق سىنىبى اشىلعاندا تاعدىرىن وسى وڭىرمەن بايلانىستىرعان 12 مىڭعا جۋىق قانداسىمىزدىڭ قۋانىشىندا شەك بولماعان. قورعان وبلىسى ۇلتتىق-مادەني اۆتونومياسىنىڭ توراعاسى قايرات ورالوۆتىڭ باستاماسىمەن شاڭىراق كوتەرگەن قازاق سىنىبىنىڭ اشىلۋ سالتاناتىنا قىزىلجار وڭىرىنەن ارنايى دەلەگاتسيا قاتىسىپ, عىلىمي-ادىستەمەلىك وقۋلىقتار مەن كىتاپتار سىيعا تارتقان. مۇندا م. قوزىباەۆ اتىنداعى سقمۋ جانىنداعى كوللەدجدى بىتىرگەن جاس مامان التىناي بەكەشەۆا ۇستازدىق ەتەدى.
ەندى, مىنە, وسى جاڭالىقتىڭ ءىزى سۋىماي جاتىپ تۇمەن تورىنەن جىل قۇسىنداي ساعىندىرعان تاعى ءبىر قۋانىشتى حابار جەتتى. ەكى مىڭداي قازاق تۇراتىن ۋپوروۆو سەلوسىندا قازاق سىنىبىنىڭ تۇساۋى كەسىلدى. اۋدان اكىمشىلىگىنىڭ باسشىسى لەونيد ساۋكوۆ بالالاردىڭ انا تىلىندە الاڭسىز ءبىلىم الۋىنا بارلىق مۇمكىندىكتىڭ تۋدىرىلاتىنىن ايتا كەلىپ, ادىستەمەلىك وقۋ ادەبيەتتەرىن ساتىپ الۋعا ارنايى سەرتيفيكاتتى تابىس ەتتى. ەسەنعالي يبراەۆ جەتەكشىلىك ەتەتىن قازاق اۆتونومياسى ورتالىعى دا قارجىلاي قولداۋ كورسەتتى.
– قازىر 25 وقۋشى ءدارىس الادى. ىنتالارى جاقسى. تەك 1989 جىلى جارىق كورگەن وقۋلىقتاردى پايدالانىپ ءجۇرمىز. قازاقستان جاعىنان پراكتيكالىق كومەكتەر كورسەتىلسە, قۇبا-قۇپ بولار ەدى, – دەيدى باستاۋىش سىنىپ مۇعالىمى مەيرامگۇل ايتقوجينوۆا.
20 مىڭنان استام قانداسىمىز مەكەندەيتىن وبلىستىڭ گولىشمانوۆ اۋدانىندا تاعى ءبىر قازاق سىنىبىن اشۋ جوسپارلانعان.
سولتۇستىك قازاقستان وبلىسى
