سوعان وراي بۇگىندە اۋە قورعانىسى كۇشتەرى اسكەري ينستيتۋتىنىڭ ۇشاقتار مەن تىكۇشاقتار پاركى قىسقى كەزەڭدە ۇشۋلاردى ورىنداۋعا دايىندالۋدا. اسكەري ينستيتۋتتا «اقتوبە» جانە «حلەبوداروۆكا» اۆياتسيالىق تەحنيكاسى مەن اەرودرومدارىن كۇزگى-قىسقى پايدالانۋ كەزەڭىنە كوشىرۋ جۇرگىزىلىپ جاتىر.
«اۋا رايى سۋىتقانعا دەيىن اۆياتسيا ماماندار اۋە قورعانىسى كۇشتەرى اسكەري ينستيتۋتىنىڭ اۆياتسيالىق پاركىن قۇرايتىن ۇشاقتار مەن تىكۇشاقتاردى ازىرلەۋى قاجەت. ءبىر اۋە كەمەسىن قىسقا دايىنداۋ جۇمىستارى جەتى كۇنگە دەيىن سوزىلادى, ونىڭ ىشىندە قوزعالتقىشتاردىڭ, باسەڭدەتكىشتەردىڭ مايلارىن اۋىستىرۋ بويىنشا مونتاجداۋ جانە بولشەكتەۋ جۇمىستارى جۇرگىزىلەدى, راديوەلەكتروندىق جابدىقتار تەكسەرىلەدى, سونداي-اق ارقانداردى تارتۋ جانە تاعى دا باسقا جۇمىستار ورىندالادى», دەپ اعا ينجەنەر-ادىسكەر, پودپولكوۆنيك نۇركەن جۇماشەۆ. ول تەحنيكالىق ءىس-شارالاردىڭ ەرەكشەلىكتەرى تۋرالى پىكىرىن ءبىلدىردى.
ونىڭ ايتۋىنشا, مۇندا كابينا شىنىسىنىڭ رەزەڭكە تىعىزداۋىشىنا, امورتيزاتسيالىق تىرەكتەرگە, كۇشتىك تسيليندرلەرگە جانە جۇيەلەردەگى باسقا دا قوسىلىستارعا ەرەكشە كوڭىل بولىنەدى. ەلەكترلىك, راديوتەحنيكالىق جانە ناۆيگاتسيالىق جابدىقتار, سونداي-اق ورتكە قارسى جۇيە اسا نازار اۋدارۋدى تالاپ ەتەدى.
مۇندا قىسقى كەزەڭگە اۆياتسيالىق تەحنيكالاردى عانا ازىرلەپ قويماي, اۋە قورعانىسى كۇشتەرى اسكەري ينستيتۋتىنىڭ وقۋ-اۆياتسيالىق ورتالىعىنىڭ ۇشۋ-نۇسقاۋشى قۇرامىن دا دايارلايدى. ال كۇزگى-قىسقى كەزەڭدەگى دايارلىقتان بارلىق اۆياتسيالىق پەرسونال مىندەتتى تۇردە وتەدى. ۇشقىشتار سىناقتاردى تاپسىرىپ, قيىن مەتەورولوگيالىق جاعدايلاردا, كۇندىز جانە تۇندە, نولدىك كورىنۋ جاعدايىندا ۇشۋلاردى ورىندايدى. تىكۇشاقتاردا كۇزگى-قىسقى كەزەڭدەگى پراكتيكالىق دايارلىعىندا جەردەگى جانە اۋاداعى اپاتتىق جاعدايلار بويىنشا, اسپاپتار ارقىلى ۇشۋ جانە قونۋ, «ەكىنشى اينالىمعا» كەتۋ, «تىكۇشاقتى كۇردەلى جاعدايدان شىعارۋ» پىسىقتالادى. سونداي-اق كۇن سايىن ىزدەستىرۋ-قۇتقارۋدى قامتاماسىز ەتۋ بويىنشا كەزەكشىلىك اتقارىلادى.
