ەلدەگى ەلەۋلى ساياسي توپتار العاشقى كەزدەسۋلەرىن وتكىزىپ ۇلگەردى. ۇكىمەت باسىنداعى پەدرو سانچەستىڭ سوتسياليستەر پارتياسى ۇگىت-ناسيحات جۇمىستارىن مەملەكەتتىڭ وڭتۇستىگىندەگى سەۆيليادان باستادى. سوتسياليستەردىڭ باستى قارسىلاسى سانالاتىن پابلو كاسادا باسقارعان ۇلتتىق كونسەرۆاتورلار پارتياسى دا سايلاۋالدى ۇگىت-ناسيحات جۇمىستارىنا كىرىسىپ كەتتى. بۇل جولى كورول VI فيليپپ مەملەكەت پرەمەر-مينيسترىنە ۇمىتكەر ۇسىنبادى. ونىڭ ايتۋىنشا, ەلدەگى ساياسي پارتيا كوشباسشىلارى ۇكىمەت باسشىسىنا لايىق ەكەنىن دالەلدەي الماعان, وعان قوسا حالىقتىڭ دا قولداۋى از بولىپتى. يسپانيا پارلامەنتىنىڭ تاعدىرى ەندىگى سايلاۋدا شەشىلمەك.
بۇل – يسپانيا ءۇشىن سوڭعى ءتورت جىلداعى ءتورتىنشى پارلامەنتتىك سايلاۋ. كەزەكتەن تىس سايلاۋلارعا كونگرەسمەندەردىڭ ءبىر شەشىمگە كەلە الماۋى مەن كواليتسيا جونىندەگى ءساتسىز كەلىسىمدەرى سەبەپ بولدى. ۇكىمەتتى ۋاقىتشا باسقارىپ وتىرعان پەدرو سانچەس بۇل جاعدايعا ەلدەگى پوپۋليستەردىڭ پودەموس توبى مەن وپپوزيتسيانى كىنالايدى.
كەشە ەلدەگى الەۋمەتتىك زەرتتەۋلەرمەن اينالىساتىن ساراپشىلار الدىن الا جۇرگىزگەن ساۋالداما ناتيجەسىمەن ءبولىسىپ ۇلگەردى. كوپشىلىكتىڭ كوزقاراسىنا قاراساق, بۇل جولى دا سوتسياليستىك-جۇمىسشى پارتياسىنىڭ مەرەيى ۇستەم. دەگەنمەن سايلاۋعا تۇسكەن پارتيالار جەڭىس ەمەس, وڭدى ناتيجەگە تالاساتىنىن ايتىپ جاتىر. ساۋالداماعا سايكەس, كونسەرۆاتورلار بۇل سايلاۋدا ەكىنشى بولادى دەيدى.
10 قاراشادا يسپانيانىڭ 350 ورىندىق پارلامەنتى قالاي وزگەرەتىنى بەلگىلى بولادى. بۇعان دەيىنگى ناتيجەگە كوز سالساق, ساۋىردەگى پارلامەنتتىك سايلاۋدا ەلدىڭ سوتسياليستىك-جۇمىسشى پارتياسى باسىم كوپشىلىكتىڭ داۋىسىمەن جەڭىسكە جەتكەن ەدى. وسىلايشا سوتسياليستەر پارتياسى 350 ورىندىق دەپۋتاتتار كونگرەسىندە 123 مانداتقا يە بولدى. سونىمەن قاتار ساۋىردەگى سايلاۋدا VOX وڭشىلدار پارتياسىنىڭ پارلامەنتتە 24 ورىنعا قول جەتكىزۋى يسپانيالىقتاردىڭ كوپشىلىگى ءۇشىن كۇتپەگەن وقيعا بولدى.
تاريحقا نازار سالساق, يسپانيا قوعامى 1930-جىلداردان بەرى وڭشىل جانە سولشىل قاناتقا بولىنە باستادى. ەلدەگى وڭشىلدار ساناتىندا يسپانيانىڭ حالىقتىق پارتياسى, «ازاماتتار» جانە VOX ۇلتتىق پارتياسى بار. ال سولشىلدار قاتارىندا كوپ داۋىسقا يە بولعان سوتسياليستىك پارتيادان بولەك, كاتالونيانىڭ رەسپۋبليكالىق پارتياسى, پودەموس جانە VOX پارتيالارى بار. سوڭعى پارلامەنتتىك سايلاۋعا تۇسكەن 13 پارتيانىڭ سالماعىن ساندارمەن ساراپتايتىن بولساق, سوتسياليستىك-جۇمىسشى پارتياسى 123 مانداتقا يە بولىپ, وزگەلەردەن وزىپ شىقتى. ال 66 مانداتقا قول جەتكىزگەن يسپانيا حالىقتىق پارتياسى ەكىنشى ورىندا. «ازاماتتار» پارتياسى 57 دەپۋتاتتىق ورىنمەن العاشقى ۇزدىكتى تۇيىندەدى. پارلامەنتتەگى 42 ورىندى پودەموس يەلەندى. 123 ورىندى يەلەنۋ دە ەل سوتسياليستەرىنە بيلىكتى تۇگەلدەي قولعا الۋعا مۇمكىندىك بەرمەدى. دەپۋتاتتاردىڭ ءبىراۋىزدان شەشىمگە كەلە الماۋى حالىقتى تاعى ءبىر رەت سايلاۋ ۋچاسكەلەرىنە جيناۋعا الىپ كەلدى.
ساراپشىلار ۇكىمەتتى ۋاقىتشا قولعا العانىنا دا, وتكەن سايلاۋداعى ۇزدىك ناتيجەسىنە دە قاراماستان, پەدرو سانچەس ۇكىمەت باسىندا قالاتىنىنا كۇمانمەن قارايدى. ويتكەنى مينيسترلەر كابينەتىنىڭ ۋاقىتشا باسشىسى كاتالونياداعى شيەلەنىسكە وڭتايلى شەشىم ۇسىنا الماعان. وقيعا ورىندارىن ارالاپ, زارداپ شەككەندەردىڭ كوڭىلىن سۇراۋمەن عانا شەكتەلگەن ساياساتكەردى حالىق كاتالونيا اۆتونومياسىنىڭ باسشىسى كيم توررامەن كەزدەسپەدى دەپ جازعىرۋدا. سوندىقتان بۇل ايماقتىڭ تاڭداۋى باسقاعا ءتۇسۋى ابدەن مۇمكىن.
مەملەكەتتە شەشىلمەگەن ماسەلەنىڭ سانى كوپ. ەڭ نەگىزگىسى كاتالونيانىڭ تاۋەلسىزدىگى دەسەك, ودان كەم تۇسپەيتىن مەملەكەت كونستيتۋتسياسىن وزگەرتۋ ۇسىنىستارى دا ەل ىشىندەگى تۇراقسىزدىققا سەبەپ. بۇل سايلاۋدىڭ سوڭى دا ناقتى شەشىممەن اياقتالارى انىق ەمەس. ويتكەنى مادريد پەن بارسەلونا اراسىندا ءتۇيىنىن تاپپاعان تەك گەوساياسي عانا ەمەس, ەكونوميكالىق, قارجى, مادەني, ءتىپتى لينگۆيستيكالىق ماسەلەلەر دە بار. ال يسپانيا اقپارات قۇرالدارىنىڭ حابارلارىنا سەنسەك, تارتىسقا تۇسكەن پارتيا باسشىلارى ۇسىنعان باعدارلامالارىنىڭ جارتىسىن دا ورىنداپ ۇلگەرمەگەن. حالىقتىڭ دا كوڭىلىنەن شىعۋ قيىن بولسا كەرەك, پارتيا كوشباسشىسى مادەني نە تاريحي ماسەلەلەردى قولعا السا, كاتالونيا تاۋەلسىزدىگى سياقتى وزەكتى ماسەلەدەن جالتاردى دەپ ايىپتايدى. سونىمەن, 10 قاراشا تەك يسپانيا ءۇشىن ەمەس, تۇتاس ەۋروپالىق وداق, ءتىپتى الەم ءۇشىن دە ماڭىزدى بولماق.
