قوعام • 05 قاراشا، 2019

10 ميلليون تەڭگەنى قايىرىمدىلىققا جۇمسايدى

242 رەت كورسەتىلدى

«التى ۇل تاپقان انانى حانىم دەسە بولادى» دەگەندەي، بيىل ءبىرىنشى رەت ەلىمىزدە كوپ بالالى ايەلدەر اراسىندا «قازاق حانىمى» حالىقارالىق بايقاۋى ءوتتى. تۇڭعىش رەت الماتىداعى رەسپۋبليكا سارايىنىڭ تورىنە شىققان التىن قۇرساقتى كەلىنشەكتەردىڭ ىشىنەن تالدىقورعاندىق مارجان التىباەۆا توپ جارىپ، 10 ميلليون تەڭگەگە يە بولدى. «قازاق حانىمى» بايقاۋىنىڭ ءتاجىن كيگەن 31 جاستاعى مارجان – ءۇش بالانىڭ اناسى.

العاشقى بايقاۋدى حالىقارالىق دەڭگەيگە كوتەرگەن ونىڭ اۋقىمىن ۇلعايتۋعا دەگەن ۇمتىلىس ەدى. بايقاۋعا ىرىكتەۋ شارالارى ءجۇرىپ جاتقان كەزدە قىرعىزستان، تۇركيا، رەسەي، موڭعوليا ەلدەرىندەگى قازاق دياسپورالارىنىڭ وكىلدەرى بايلانىسقا شىعىپ، قاتىسۋعا وتىنىمدەر بەرگەن. ءوڭىر-وڭىرلەردە وتكەن ىرىكتەۋ بايقاۋلارىن قوسا العاندا، «قازاق حانىمى» جارىسىنا 4036 كەلىنشەك قاتىسقان. ولاردىڭ اراسىندا ون بالالى انالار دا بار. الايدا، اقتىق باي­قاۋعا جولداما العانداردىڭ اراسىنان قىرعىزستاننان جازگۇل ەستەباەۆانىڭ عانا قازاقستانعا جولى ءتۇسىپتى.

وسىلايشا، جەكسەنبىنىڭ كەشىندە الماتى­داعى رەسپۋبليكا سارايىنىڭ تورىندە ەلىمىزدىڭ تۇكپىر-تۇكپىرىنەن كەلگەن 25 كەلىنشەك ونەر­لەرىن ورتاعا سالدى. ءومىردىڭ كوركى، شاڭىراقتىڭ شاتتىعى، وتباسىنىڭ بەرەكەسىمىن دەپ كەلگەن انالاردىڭ بارلىعى دا وزدەرىنىڭ تالانتتارىن كورسەتتى. ءتۇن ورتاسىنا ۇلاسقان بايقاۋدا الدىمەن ونەر جارىسقا ءتۇستى. بۇل – ۇلتتىق ءداستۇر مەن دارىنعا سالتانات قۇرعىزىپ، ءبۇتىن وتباسىن، قازاق ايەلىنىڭ بويىنا جاسىرىنعان سۇلۋلىقتى جارنامالاعان جارىس ەدى.

سالتاناتتى وقيعانى قازىلار القاسى­نىڭ مۇشەسى، پارلامەنت ءماجىلىسى­نىڭ دەپۋتاتى، قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەمو­گرافيالىق ساياسات جونىندەگى ۇلتتىق كوميس­سيانىڭ مۇشەسى باقىتبەك سماعۇل مىنا ءبىر ولەڭ جولدارىمەن اشىپ بەردى:

اق الماستاي جارقىلداعان جانارى،

ءاربىر ءىستىڭ التىن كىلتىن تابادى.

بۇگىن مىنە، ارۋلارى قازاقتىڭ،

تاۋەلسىزدىك كوشىن باستاپ بارادى.

اڭىزدار كوپ ارۋ قىزدار حاقىندا،

ۇلىلىق بار انا دەگەن اتىڭدا.

سەندەرسىڭدەر ۇلى دالا ۇرپاعىن

تەربەتەتىن مىناۋ التىن عاسىردا.

ماڭگىلىك ەل ەتەم دەسەڭ قازاقتى،

وزگەگە ەمەس، وزىڭە قوي تالاپتى.

ايەل – قازىق، ەركەك – ازىق، ءار ۇيدە،

وتباسىنا ەر-ازامات جاۋاپتى.

 

شۋاق شاشىپ، مەيىرىم تۇنعان ىزگى ارىڭ،

جىرلاعانمەن جەتكىزە ءالماس جۇز دارىن.

قۇرمەت تۇتىپ، قۇتتىقتايمىن مەن بۇگىن،

ازات ەلدىڭ اي ديدارلى قىزدارىن!

سونىمەن اۋلەتىنىڭ ابىرويىن اسىرىپ، مىنا الەمدى ءسابيدىڭ بىلدىرىمەن بازارعا بولەگەن زامانا كەلىنشەكتەرى ءان سالىپ، بي بيلەپ، مۋزىكالىق اسپاپتاردىڭ قۇلاعىندا وينادى. ءتۇرلى تەاترالدىق قويىلىمدار ارقىلى جانكۇيەر قاۋىمنىڭ جۇرەگىنە جول ىزدەدى.

جوعارىدا اتاپ وتكەندەي، ءۇش تۋردان تۇراتىن جارىستا جەتىسۋدىڭ سۇلۋى مارجان التىباەۆا «قازاق حانىمى» اتاندى.

– مەن ءالى دە ءوزىمنىڭ جەڭىسكە جەت­كەنىمە سەنبەي تۇرمىن. كادىمگى ءتۇس سياق­تى. شىنىمدى ايتسام، جەڭەمىن دەپ ويلا­عان جوقپىن، بىراق بايقاۋعا بارىم­دى سالىپ دايىندالدىم. بايقاۋدى ۇيىم­­داس­تىرعاندارعا دا، ماعان قولداۋ كور­سەتكەن قالىڭ كوپشىلىككە دە العىسىم شەكسىز. بايقاۋ وتە جاقسى ءوتتى. بۇل مەنىڭ عانا جەڭىسىم ەمەس، وتباسىمىزدىڭ جەڭىسى. بۇل  جەڭىس ماعان ۇلكەن جاۋاپكەرشىلىك جۇك­تەيدى. «قازاق حانىمى» اتاعىن ابىروي­مەن الىپ جۇرۋگە ءتيىستىمىن. ال ماعان بۇيىر­عان قارجىلاي جۇلدەگەن كەلەتىن بولساق، بارلىق سومانى قايىرىمدىلىققا، كوپ بالالى وتباسىلارعا كومەك رەتىندە تاراتامىن، – دەيدى مارجان التىباەۆا.

سونداي-اق ءبىرىنشى ورىن الماتىلىق بايان مۇساەۆاعا بۇيىرسا، ەكىنشى ورىنعا اتىراۋدان كەلگەن 7 بالانىڭ اناسى جانار قادىروۆا، ءۇشىن­شى ورىنعا اقتاۋ حا­نى­مى گۇلنار جايىق لا­يىق­تى دەپ تابىل­دى. جۇلدەلى ورىنداردان كورىنگەن حانىم­­داردىڭ بارلىعى دا قوماق­تى قارا­جات پەن باعالى سىيلىقتاردان قۇر قال­عان جوق. ال ينتەرنەت-داۋىس بەرۋدىڭ ارقا­سىن­­دا ارناۋلى جۇلدەنى جانار قادىروۆا الدى.

قازىلار القاسىنا قازاقستان پرەزي­دەنتى­نىڭ «التىن ساپا» سىيلىعىنىڭ يەگەرى ىرزا تۇرسىنزادا جەتەكشىلىك ەتكەن العاشقى «قازاق حانىمى» بايقاۋىنا باعا بەرۋگە جازۋشى زەينەپ احمەتوۆا، پار­لامەنت ءماجىلىسىنىڭ دەپۋتاتى باقىت­بەك سماعۇل، تولقىن زابيروۆا، الما امان­جولوۆا، كلارا قابىلعازينا، سەكەن تۇرىسبەكوۆ، مارلەن كولباەۆ، داري­عا تۇران­قۇلوۆا، «قازاق حانىمى» حالىق­ارالىق باي­قاۋى جوباسىنىڭ ديرەكتورى ەرجان ايت­قالي سىندى ونەر ادامدارى مەن قوعام قايراتكەرلەرى قوسىلدى.

ءبىر سوزبەن ايتقاندا، «قازاق حانىمى» – وتە قاجەتتى دە تاربيەسى تەرەڭ جوبا. ءوزى­نىڭ كا­­سى­بىمەن قوسا، انالىق مىندەتىن دە ات­قار­ىپ، وتباسىنىڭ تاتۋ­لى­عىن ساقتاعان، زامانعا ساي ءبىلىمى مەن پارا­سات-پايىمى بار، كوركىن ساقتاعان كوپ بالا­لى انالاردىڭ ورنى توردە بولۋ كەرەك، دەيدى ال­عاش­قى بايقاۋدى مارەگە جەتكىزگەن ۇيىمداستىرۋشىلار.

 

الماتى

 

سوڭعى جاڭالىقتار

ۇقساس جاڭالىقتار