جاس تالانتتار مەن كوشباسشىلاردى قولداۋعا ارنالعان جوبا شاراسىنا قىزىلوردا, اقتوبە, باتىس قازاقستان, ماڭعىستاۋ جانە اتىراۋ وبلىستارىنىڭ 3000-عا جۋىق بەلسەندى جاستارى قاتىستى. بۇل – جەكە تۇلعا رەتىندە جان-جاقتى دامىپ, ءوز ءىسىنىڭ بىلىكتى مامانى بولعان, ەل دامۋىنا ءوز ۇلەسىن قوسىپ جۇرگەن جاستار.
بەردىبەك ساپارباەۆ بەلسەندى جاستارعا العىسىن ءبىلدىردى.
«تاۋەلسىزدىكتىڭ العاشقى كۇنىنەن باستاپ تۇڭعىش پرەزيدەنت - ەلباسى نۇرسۇلتان نازارباەۆ جاستاردى قولداۋ مەن دامىتۋعا ۇلكەن كوڭىل ءبولدى. مەملەكەت باسشىسى قاسىم-جومارت توقاەۆ جاستاردى قولداپ, 2020 جىلدى ەرىكتىلەر جىلى دەپ جاريالادى. بۇگىندە ەلىمىزدە 30 مىڭعا جۋىق دارىندى بالا بار, 100-دەن استام مامانداندىرىلعان مەكتەپتەر مەن ءبىلىم بەرۋ ورتالىقتارى جۇمىس جاسايدى. 11 وبلىستا رەسپۋبليكالىق "دارىن"ورتالىعى جۇمىس ىستەيدى. بيىل مىڭنان استام بالا حالىقارالىق كونكۋرستار مەن وليمپيادالاردىڭ جەڭىمپازدارى مەن جۇلدەگەرلەرى اتاندى. ەلباسىنىڭ «ەل ءۇمىتى» باستاماسى اياسىندا 1000-نان استام دارىندى بالالار ىرىكتەلەتىن بولادى. ولارعا مەملەكەت تاراپىنان قولداۋ كورسەتىلەدى. ەل ۇكىمەتى جاس ۇرپاقتى قولداۋ ءۇشىن بارلىق كۇش-جىگەردى جۇمسادى. ءبىلىمدى, تالانتتى جانە دەنى ساۋ جاستار ‒ ۇلتىمىزدىڭ بولاشاعى», — دەدى بەردىبەك ساپارباەۆ.
مارافونعا جەكە ءوز جولىن باستاپ جاتقان جالىندى جاستارمەن قاتار, ءبىلىم مەن عىلىم, بيزنەس جانە مەديتسينا, مادەنيەت پەن سپورت, ەكونوميكا جانە قوعامدىق ومىردە بيىك بەلەستەرگە جەتكەن, ءوز تاجىريبەسىمەن بولىسە الاتىن جاس ماماندار دا قاتىستى. اقتوبەدەگى مارافون – ەلباسىنىڭ «ەل ءۇمىتى» باستاماسىنىڭ اياسىندا وتكىزىلگەن العاشقى شارالاردىڭ ءبىرى. باستاما تالانتتى بالالار مەن جاستاردى كەشەندى قولداۋدى كوزدەيدى. بۇل ءۇشىن بىرقاتار جوبالاردى جۇزەگە اسىرۋ جوسپارلانىپ وتىر.قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورى اسەت يسەكەشەۆ مارافوننىڭ اشىلۋ سالتاناتىندا «ەل ءۇمىتى» جاستارعا الەۋمەتتىك ليفت بولاتىنىن جەتكىزدى.
ء«بىز الەمنەن ارتتا قالماۋعا ءتيىسپىز. بۇل رەتتە مەملەكەت كوپ نارسە جاساپ جاتىر. «جاس كاسىپكەر», «جاس مامان», «بولاشاق», «دارىن» جانە باسقا دا باعدارلامالار بار. «ەل ءۇمىتى» باستاماسى اياسىندا جاستاردى قولداۋعا ارنالعان بىرقاتار جوبانى قولعا الامىز. ءار بالانىڭ وزىندىك تالانتى بار. ونى تەك اشۋ كەرەك. سوندىقتان, ەڭ الدىمەن, قازىر ءار ايماقتا «دارىن» ورتالىقتارى كۇشەيتىلەتىن بولادى. ءار بالانىڭ الەۋەتىن اشۋ ءۇشىن, قايدا وقي الادى, نەگە كوبىرەك بەيىم ەكەنىن انىقتاۋ ءۇشىن دياگنوستيكا جاسالادى. ودان بولەك تاعى دا باسقا جوبالار بولادى. مىسالى, شەتەلدە ‒ كرەمني القابىنا, سينگاپۋرعا ساپارلار, كەمبريدجگە وقىتۋ تۋرلارى. قازىر بۇل ماسەلەلەردى پىسىقتاپ جاتىرمىز», — دەدى اسەت يسەكەشوۆ.
قازىر قور كوشباسشىلىق باعدارلاماسى, بالالاردىڭ الەۋەتىن انىقتاۋ جۇيەسى, ىنتالاندىرۋ قۇرالدارى (ونىڭ ىشىندە الەمنىڭ جەتەكشى جوو-دا تاجىريبە جيناۋ), وليمپيادا جەڭىمپازدارى مەن دارىندى جاستارعا گرانتتىق قولداۋ كورسەتۋ جۇيەسى سىندى جوبالاردى قاراستىرىپ جاتىر.
«ەل ءۇمىتى» مارافونىنا اقتوبە وبلىسىنان قاتىسقان جاس كاسىپكەردىڭ ءبىرى جاننا التىنباەۆا. ول اقتوبە قالاسىنان 2016 جىلى تۋريستەرگە ارناپ «Nice hostel» حالىقارالىق ستاندارتتارعا ساي كەلەتىن قوناق ءۇي اشقان. 30 جاستاعى اقتوبەلىك بيزنەسمەن اقش-تا تاجىريبە الماسۋ ماقساتىندا كوپتەگەن جەرلەردە جۇمىس جاسادى.
ال, اتىراۋ وڭىرىنەن كەلگەن قاتىسۋشى نۇرلان ازاماتوۆ «Family» وقۋ ورتالىعىنىڭ باسشىسى. 2012 جىلدان بەرى اشىلعان ورتالىق ازاماتتارعا سويلەۋ مانەرىن,ويىن دۇرىس جەتكىزۋ, وراتورلىق ونەردى ۇيتەرۋ ترەنينگىمەن اينالىسادى. جاس ىزدەنىمپاز 2014 جىلى ماسكەۋ قالاسىنداعى ريتوريكا جانە شەشەندىك ونەر ۋنيۆەرسيتەتىندە ءبىلىم العان.
شارا بارىسىندا قاتىسۋشىلار ءوز تاجىريبەلەرىمەن ءبولىستى. ولاردى ەڭبەك ەتىپ, ىزدەنۋگە شاقىردى. مەملەكەت تاراپىنان كورسەتىلىپ جاتقان ءتۇرلى باعدارلامالار مەن قولداۋلار ءۇشىن العىستارىن جەتكىزدى.
ەلباسى نۇرسۇلتان نازارباەۆتىڭ «ەل ءۇمىتى» باستاماسىن قور ۇكىمەت, وبلىس اكىمدىكتەرى مەن بيزنەس-قاۋىمداستىق جانە ۇكىمەتتىك ەمەس ۇيىمدارمەن بىرلەسىپ جۇزەگە اسىرادى.
«قونىس» سپورت سارايىندا وتكەن كەش قازاق ەستراداسى جۇلدىزدارىنىڭ ونەر كورسەتۋىمەن اياقتالدى.
