سەمينار-ترەنينگتىڭ ماقساتى – ەلىمىزدىڭ ون بەس ايماعىنان ات باسىن بۇرعان وسى ورتالىق جەتەكشىلەرى مەن جاس كوشباسشىلارىنا دۋالدى ءبىلىم بەرۋ, داعدارىستى باسقارۋ, جوبالىق مەنەدجمەنت جانە باسقا دا باعدارلامالار بويىنشا بايىپتى باعدار بەرۋ. قالا مەن اۋىل جاستارىنىڭ ەڭبەك نارىعىنا ەتەنە ارالاسۋىنا ۇيىتقى بولاتىن وسى ورتالىق ماماندارى ەكەنىن ەسكەرسەك, بۇل سەمينار جۇمىسىنىڭ ماڭىزى زور.
– جاستار رەسۋرستىق ورتالىقتارى – ەلىمىزدەگى جاستار ساياساتىن دامىتۋدىڭ نەگىزگى تىرەگى. بۇگىندە رەسپۋبليكا اۋماعىندا وسىنداي 208 ورتالىق جۇيەلى جۇمىس ىستەپ كەلەدى. ورتالىق ماماندارىنا ەرىكتىلەر قىزمەتىن جولعا قويۋ, جاستاردى جۇمىسقا ورنالاستىرۋ, اقىل-كەڭەس بەرۋ, ولاردىڭ جاڭا ماماندىقتى يگەرۋىنە جاردەمدەسۋ سىندى ماڭىزدى مىندەت جۇكتەلىپ وتىر. سوندىقتان بۇل سەمينار ەڭ الدىمەن ورتالىق ماماندارىنىڭ بىلىكتىلىگىن ارتتىرۋعا, تۇيتكىلدى ماسەلەلەرگە قۇلاق ءتۇرىپ, شەشىمىن تابۋعا نەگىزدەلگەن دەر ەدىم. وسى كۇنى ورتالىق ماماندارىنىڭ بىلىكتىلىگىن ارتتىرۋ جۇمىستارى تەك اتىراۋ وبلىسىندا عانا جۇزەگە اسۋدا, – دەدى اقپارات جانە قوعامدىق دامۋ ۆيتسە-ءمينيسترى دانيار ەسين.
ەلىمىزدە جاستاردى جۇمىسپەن قامتۋ ماسەلەسىنە قاتىستى ءتۇرلى باعدارلامالار قولعا الىنعان. سۇرانىس از ماماندىق يەلەرىن قايتا دايارلاۋ, ولاردىڭ سۇرانىس بار وڭىرلەرگە قونىستانۋىنا قولداۋ كورسەتۋ جۇمىستارى دا قولعا الىنعان.
– «ەڭبەك» باعدارلاماسى جونىندە ەستىگەن بولارسىزدار؟ الايدا, ەستۋ مەن بۇل باعدارلامانىڭ ناقتى جۇمىس تەتىگىن ءبىلۋ – ەكى بولەك دۇنيە. وكىنىشكە قاراي, «جۇمىسپەن قامتۋ» ورتالىعىنا تابان تىرەگەن ازامات باعدارلامانىڭ بار مۇمكىندىگىن پايدالانا بىلمەيدى. ايىپ جۇمىس ىزدەۋشىدە ەمەس, مەملەكەتتىك ورگانداردا. ماسەلەن, وسى قىزمەتكە تاعايىندالماس بۇرىن بۇل باعدارلاما تۋرالى ەستىپ-بىلگەن ەمەسپىن. ءتىپتى قازاقستاندا «جۇمىسپەن قامتۋ» ورتالىقتارى بار ەكەنىنەن دە بەيحابار ەدىم. سوندىقتان ءار وتانداسىمىزعا ءتيىمدى باعدارلامالار مەن قولداۋلار بارىن جەتكىزۋ اسا ماڭىزدى, – دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ناريمان مۇقىشەۆ.
ءوز ماماندىعىن جان-تانىمەن ءسۇيىپ, ونى وزگەرتكىسى نەمەسە وزگە وڭىرگە قونىس اۋدارعىسى كەلمەيتىن جۇمىسسىز جاستاردى ەڭبەكپەن قالاي قامتۋعا بولادى؟ مۇنداي جاستارعا ەڭ الدىمەن جەكە كاسىپكەرلىكپەن اينالىسقان ءتيىمدى دەر ەدىك. بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ وكىلى ءۇمىت مەڭداليەۆا:
– «اتامەكەن» ۇلتتىق كاسىپكەرلەر پالاتاسى بىرنەشە جىل كولەمىندە كاسىپكەرلىك نەگىزدەرىن وقىتىپ كەلەدى. العاشقى قادام 2017 جىلى «ەڭبەك» باعدارلاماسى اياسىندا جاسالعان ەدى. سودان بەرى 88 مىڭ وتانداسىمىز بيزنەستىڭ قىر-سىرىن مەڭگەرىپ ۇلگەرسە, بيىل جاستار جىلى اياسىندا 18500 جاس ازامات ءبىلىمىن جەتىلدىردى. سونىڭ 5 مىڭنان استامى ايماقتاردا جوبالارىن ساتىمەن جۇزەگە اسىرۋدا. بۇل رەتتە, جوبالاردىڭ باسىم بولىگى مەملەكەتتىك گرانت نەگىزىندە ىسكە اسقانىن ايتا كەتۋ قاجەت. جالپى, وسى ءۇش جىل ارالىعىندا 23 مىڭ بيزنەس-جوبا قولداۋ تاپتى, – دەدى.
سەمينار جۇمىسى اياسىندا ورتالىق وكىلدەرى وزدەرىن تولعاندىرعان ساۋالدارىن قويىپ, شارا سوڭىندا قاتىسۋشىلارعا سەرتيفيكات تابىستالدى.
راۋان قابيدولدا
