ءا.سمايىلوۆ پەن ۋ. موزەر قازاقستان-امەريكا قاتىناستارىنىڭ دامۋىن جوعارى باعالادى. بۇعان 2018 جىلى ۆاشينگتوندا ەلباسى ن. نازارباەۆتىڭ اقش پرەزيدەنتى د. ترامپپەن كەزدەسۋىنەن كەيىن كەڭەيتىلگەن ستراتەگيالىق سەرىكتەستىكتىڭ ساپالى جاڭا دەڭگەيگە كوتەرىلگەنى وڭ اسەر ەتكەنى انىق.
سونىمەن قاتار پرەمەر-ءمينيستردىڭ ءبىرىنشى ورىنباسارى – قارجى ءمينيسترى قازاقستان رەسپۋبليكاسىنىڭ پرەزيدەنتى ق. توقاەۆتىڭ نيۋ-يوركتەگى بۇۇ باس اسسامبلەياسى اياسىندا اقش-تىڭ ساياسي, ساراپتامالىق جانە ىسكەر توپتارىمەن كەزدەسۋلەرىن اتاپ ءوتتى.
تاراپتار ەكى ەل اراسىنداعى ساۋدا-ەكونوميكالىق جانە ينۆەستيتسيالىق سەرىكتەستىكتىڭ دامۋ قارقىنىن تالقىلادى, سوڭعى ەكى جىلدا وسى سالالارداعى كورسەتكىشتەردىڭ ايتارلىقتاي وسكەنىن اتاپ ءوتتى. مۇنىمەن قوسا, قازىرگى جاھاندىق ورتادا قازاقستاننىڭ قارجى جۇيەسىن دامىتۋ تۋرالى پىكىر الماسىپ, سالىق جۇيەسىن مودەرنيزاتسيالاۋ, مۇنايعا تاپشىلىقتى ازايتۋ جانە ۇلتتىق قوردان اۋدارىمدار كولەمىن تومەندەتۋ, سونداي-اق مەملەكەتتىك ساتىپ الۋ جۇيەسىن دامىتۋ ماسەلەسىن ءسوز ەتتى.
ءا. سمايىلوۆ اقش-تىڭ سانكتسيالار ساياساتى اياسىندا ەكى ەل ۇكىمەتىنىڭ قازاقستاننىڭ مۇددەسىن قورعاۋ ءۇشىن ءتيىمدى ءىس-قيمىلىن اتاپ ءوتتى. تاراپتار وسى سالادا ۇنەمى كونسۋلتاتسيالار جۇرگىزۋگە دايىن ەكەندىكتەرىن حابارلادى. سۇحبات بارىسىندا, تاراپتار دجەكسون-ۆەنيك تۇزەتۋلەرىنىڭ قازاقستاننان الىنىپ تاستالۋى قازاقستان مەن امەريكا قۇراما شتاتتارى اراسىنداعى ەكونوميكالىق بايلانىستاردى ودان ءارى نىعايتا تۇسەدى دەگەن پىكىرگە كەلدى.
مۇنىمەن قوسا, پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ بۇۇ-نىڭ قازاقستانداعى تۇراقتى ۇيلەستىرۋشىسى نوريماس شيمومۋرامەن جانە ەلدە تىركەلگەن بۇۇ اگەنتتىكتەرى مەن باعدارلامالارىنىڭ باسشىلارىمەن كەزدەستى.
كەزدەسۋ بارىسىندا 2015 جىلى قازاقستاندا بەكىتىلگەن, تۇراقتى دامۋدىڭ 17 جاھاندىق ماقساتتارى بار 2030 جىلعا ارنالعان تۇراقتى دامۋدىڭ كۇن ءتارتىبىن جۇزەگە اسىرۋ ماسەلەلەرى تالقىلاندى. ءا.سمايىلوۆ ءوز سوزىندە اتاپ وتكەندەي, 2030جىلعا بەكىتىلگەن كۇن ءتارتىبىنىڭ جۇزەگە اسۋى, ادامزاتتى كەدەيلىكتەن قۇتقارۋعا جانە جاھاندى «ساۋىقتىرۋ» سەكىلدى الەمدىك ماسەلەلەردى شەشۋدە ماڭىزدى ءرول اتقارادى.
كەزدەسۋگە قاتىسۋشىلار قازاقستاندا تۇراقتى دامۋ ورتالىعىن ىسكە اسىرۋ جانە لوكاليزاتسيالاۋ بارىسى تۋرالى پىكىر الماستى, قول جەتكىزىلگەن وڭ ناتيجەلەردى اتاپ ءوتتى جانە وسى ماقساتتاردى ودان ءارى ىسكە اسىرۋداعى پروبلەمالاردى ءسوز ەتتى.
وسىعان بايلانىستى, پرەمەر-ءمينيستردىڭ ءبىرىنشى ورىنباسارى – قارجى مينيسترى تۇراقتى دامۋ ماقساتتارىن ىسكە اسىرۋ جونىندەگى ۇيلەستىرۋ كەڭەسى شەڭبەرىندەگى قىزمەتتى جانداندىرۋ قاجەتتىگىن اتاپ ءوتتى, ونىڭ قۇرامىنا مۇددەلى مەملەكەتتىك ورگانداردىڭ وكىلدەرى جانە بۇۇ ەلدەرى توبىنا كىرەدى.
ءسوزىن قورىتىندىلاعان ءا. سمايىلوۆ بۇۇ وكىلدەرىنىڭ بارلىق ۇسىنىستارى مەن ۇسىنىمدارى جان-جاقتى تالدانىپ جانە اعىمداعى قىزمەتتە پايدالانۋ ءۇشىن ءتيىستى مەملەكەتتىك ورگاندارعا جىبەرىلەتىنىن ايتتى.
