وڭىردەگى 1-4 ارالىعىنداعى باستاۋىش سىنىپ وقۋشىلارىنىڭ مەكتەپ اسحاناسىنان تاماقتانۋىن قامتاماسىز ەتۋ ءۇشىن اتالعان جوبانىڭ باستالعانىن وبلىس اكىمى بولات باقاۋوۆ مەكتەپتەردىڭ قامقورشىلىق كەڭەس وكىلدەرى, اتا-انالار, مۇعالىمدەرمەن كەزدەسۋ بارىسىندا جەتكىزدى.
– بۇل كەزدەسۋدى وتكىزبەس بۇرىن ينستاگرام پاراقشاسىنا مەكتەپتەرگە قاتىستى ءبىر تاۋلىكتىڭ ىشىندە 350-دەن استام ءوتىنىش ءتۇستى. اتا-انالار تاراپىنان مەكتەپ اسحاناسى جونىندە سۇراق كوپ. بارلىق پىكىرلەردى وقىپ, اتا-انالارمەن كەزدەسۋدى ۇيعاردىم, – دەدى وبلىس اكىمى بولات باقاۋوۆ.
شاعىمدار مەن ۇسىنىستار نەگىزىنەن پارتالاردى جاڭارتۋ, كابينەتتەردىڭ تەرەزەلەرىن اۋىستىرۋ, جۇمىس ىستەمەي تۇرعان مەكتەپ باسسەيندەرىن قالپىنا كەلتىرۋ جانە وقۋ ورىندارىنىڭ اۋلالارىن اباتتاندىرۋ سەكىلدى ماسەلەلەردى قامتىعان.
ال مەكتەپ اسحاناسىنا قاتىستى ماسەلەگە كەلسەك, جۋىردا وبلىس ورتالىعىنداعى پاۆلودار اۋىلىنداعى مەكتەپتە وقۋشىلار تاماقتان ۋلانىپ, اۋرۋحاناعا تۇسكەن-ءدى. بۇل وقىس جاعداي بالالارى مەكتەپتەن تاماقتاناتىن اتا-انالاردىڭ الاڭداۋىنا سەبەپ بولدى.
ءبىلىم جانە عىلىم ءمينيسترىنىڭ 2017 جىلعى 27 شىلدەدەگى بۇيرىعى بويىنشا قامقورشىلىق كەڭەس جۇمىسىنىڭ جاڭا ءتارتىبى ەنگىزىلدى. ەندى قامقورشىلىق كەڭەستىڭ مەكتەپتەگى اتقاراتىن جۇمىسى ماڭىزدى. تاماقتانۋ بالالاردىڭ دەنساۋلىعىنا تىكەلەي قاتىستى بولعاندىقتان, قامقورشىلىق كەڭەسى مەكتەپ اسحاناسىنداعى تاماق ساپاسىن قاداعالاۋعا دا قۇزىرەتتى. سونداي-اق مەكتەپتە تاماق ساپاسىن باقىلاۋ بويىنشا مونيتورينگ كوميسسياسى قۇرىلۋى ءتيىس. بۇل شارالاردىڭ بارلىعى تاماق بەرۋدى ساپالى تۇردە ۇيىمداستىرۋعا مۇمكىندىك بەرەدى.
وبلىستىق ءبىلىم بەرۋ باسقارماسىنىڭ وكىلدەرى وتكەن وقۋ جىلىنان باستاپ وڭىردەگى مەكتەپتەردە «قازاق تاماقتانۋ اكادەمياسى» مەن «ۇلتتىق سالاماتتى تاعامتانۋ ورتالىعى» ازىرلەگەن «وقۋشىلاردىڭ تاماقتانۋ راتسيونى بويىنشا بىرىڭعاي ستاندارتتار» ادىستەمەلىك ۇسىنىمدارى بويىنشا جۇمىس ىستەپ جاتقانىن ايتادى.
بىلتىر وبلىستا 7 مىڭ بالا 1-سىنىپقا بارسا, بيىل 14 مىڭعا جەتىپتى.
جيىن بارىسىندا وبلىس ورتالىعىنداعى ۋسولكا شاعىن اۋدانىنداعى №42 ورتا مەكتەپتىڭ اتا-انالارى ءسوز الىپ, بۇل اۋدانعا تاعى ءبىر جاڭا مەكتەپ قاجەت ەكەنىن ايتتى. شاعىن اۋداندا جىل سايىن كوپ قاباتتى ۇيلەر سالىنىپ, پايدالانۋعا بەرىلۋدە, وقۋشىلار سانى دا كوبەيە تۇسكەن.
تاعى ءبىر ماسەلە, بۇكىل قالا مەكتەپتەرىنىڭ وقۋشىلارى سومكەلەرىن ارقالاپ, ساباققا قوعامدىق كولىكتەرمەن قاتىنايدى. بۇل ماسەلە دە قامقورشىلىق كەڭەس مۇشەلەرىنەن قامقورلىق كۇتەتىن جاعداي. قامقورشىلىق كەڭەس مۇشەلەرىنىڭ ايتۋىنشا, قالا ىشىندە 15 جاسقا تولماعان وقۋشىلار قوعامدىق كولىكتەردە 50 پايىز جەڭىلدىكتى پايدالانۋدا. قالعان وقۋشىلار جولاقىسىن تولىق تولەۋگە مىندەتتى.
– ۋسولكا شاعىن اۋدانىندا وقۋشى سانى كوپ ەكەنى بەلگىلى. بىراق ەندى مەكتەپ سالاتىن ورىن جوق. سوندىقتان جاڭا مەكتەپ باسقا جەردەن سالىنادى. ال جولاقى ماسەلەسىنە كەلەتىن بولساق, قوعامدىق كولىكتە 50 پايىز جەڭىلدىك قاراستىرىلاتىن بالالار جاسىن 15 جاستان ۇلعايتۋ قاجەت. ماسەلەنى باقىلاۋعا الامىز, – دەدى ب.باقاۋوۆ.
بۇدان بولەك, اتا-انالار اعىلشىن ءتىلى مەن قازاق ءتىلى پاندەرىنەن ساباق بەرەتىن مۇعالىمدەرگە رەنىشتى. اتا-انالار بۇل پاندەردەن قوسىمشا رەپەتيتور جالداۋدا. سوندىقتان ەندى وسى ەكى ءپاننىڭ مۇعالىمدەرىن اتتەستاتسيادان وتكىزۋ تاپسىرىلدى. قامقورشىلىق كەڭەس وكىلدەرى بۇل جۇمىسقا بەلسەندى ارالاسىپ, ءوز پىكىرلەرىن اشىق بىلدىرمەك.
كەزدەسۋدە اقسۋ قالاسىنداعى №7 مەكتەپتىڭ قوعامدىق كەڭەس مۇشەسى اندرەي راحمەتوۆ مەكتەپ اۋلاسىن اباتتاندىرۋ قاجەتتىگىن, لەنين كەنتى №32 مەكتەپتىڭ قامقورشىلىق كەڭەس مۇشەسى ءۋاليحان نىعمانوۆ مەكتەپ اينالاسىن قورشاۋعا كومەك سۇرادى. ءوڭىر باسشىسى مەكتەپتىڭ اينالاسىن قورشاعاننان گورى, اۋماعىن اباتتاندىرىپ, بەينە-باقىلاۋ قۇرىلعىلارىن ورناتۋدى ۇسىندى.
قالاداعى №35 مەكتەپتىڭ قامقورشىلىق كەڭەس مۇشەسى مايگۇل يمانقۇلوۆا مەكتەپتەگى اسحاناعا شاعىم ءبىلدىردى. كوپ بالالى انا س.شاراپيەۆا مەكتەپ جاسىنداعى 3 بالاسىنىڭ ىستىق تاماعىنا كۇنىنە 900 تەڭگە تولەيتىنىن ايتىپ, كومەك سۇرادى.
سونداي-اق ۋسپەن اۋدانىنداعى №2 مەكتەپتىڭ اتا-انالارى دا اسحانا باعاسىنا رەنىشتى. از قامتىلعان جانە كوپ بالالى وتباسىلاردان شىققان بالالار 350 تەڭگەگە تاماقتانسا, اقىلى نەگىزدە تاماق ىشەتىندەر اسقا كۇندەلىكتى 500 تەڭگە تولەۋگە مىندەتتى.
ال كەرىسىنشە اققۋلى, شارباقتى اۋداندارىندا 1-4-سىنىپ وقۋشىلارى جەرگىلىكتى دەمەۋشىلەر قولداۋىمەن تەگىن تاماقتانادى.
وبلىس ورتالىعىنداعى №19 مەكتەپتىڭ اتا-انالارى مەكتەپ ماڭىنداعى قاپتاعان كولىكتەردى رەتكە كەلتىرۋدى سۇرادى. مەكتەپ «حالىققا قىزمەت كورسەتۋ ورتالىعىنىڭ» جانىندا ورنالاسقان. كولىكتەر كەپتەلىسى قاتار ورنالاسقان №29, №36 مەكتەپتىڭ وقۋشىلارىنا دا بوگەت كەلتىرۋدە. سونداي-اق №41 مەكتەپتىڭ اتا-انالارى باعدارشام ورناتۋدى سۇرادى. قالاداعى №23, №16 بالاباقشالار كۇردەلى جوندەۋدى قاجەت ەتەدى.
كەلەسى كەزەك ەكىباستۇزدىق اتا-انالارعا ءتيدى. ولار قالاداعى №13 مەكتەپتىڭ اتا-انالارى مەكتەپ اۋلاسىن جارىقتاندىرۋدى, سونىمەن بىرگە وزدەرىمەن بىرگە ءبىر عيماراتتا وتىراتىن №35 مەكتەپتىڭ بولۋى سالدارىنان كابينەت سانى جەتكىلىكسىزدىگىن, پارتالار تىم ەسكىرگەنىن, دەنەشىنىقتىرۋ ساباعىندا ءبىر ۋاقىتتا 2-3-سىنىپ دايىندالۋعا ءماجبۇر بولىپ وتىرعانىن جەتكىزدى. ال №36 مەكتەپتىڭ اتا-انالارى وقۋشىلاردىڭ كيىم ىلۋىنە ارنالعان شكافقا بيۋدجەتتەن قارجى ءبولۋدى سۇرادى.
– مەكتەپتەردى شكافپەن قامتۋ ماقساتىندا 100 ميلليون تەڭگە بولدىك. قازىرگى ۋاقىتتا بايقاۋ جاريالاندى. وسى قارجىعا وڭىردەگى 3 مەكتەپتىڭ شكافقا قاجەتتىلىك ماسەلەسى شەشىلمەك, – دەدى ب.باقاۋوۆ.
كەزدەسۋدە جەرگىلىكتى اتا-انالار تاراپىنان تۇسكەن بارلىق ساۋالدى تىڭداعان بولات باقاۋوۆ جاۋاپتى ورىندارعا ناقتى تاپسىرمالار بەردى.
وبلىس اكىمى كەزدەسۋگە كەلگەن اتا-انالار تاراپىنان ءوڭىردىڭ, وبلىس ورتالىعىنىڭ ءبىلىم سالاسىنا قاتىستى كوپتەگەن ماسەلەلەرىن تىڭداپ, قالاداعى №19, №35 مەكتەپتەردى جانە كۇردەلى جوندەۋدى قاجەت ەتەتىن بالاباقشالاردى ارالاپ كوردى.
سونىمەن بىرگە كەزدەسۋ بارىسىندا وبلىس اكىمى اباي اتىنداعى №10 قازاق مەكتەپ-ليتسەيىنىڭ اسحاناسىنا كىرىپ, تاماقتانعانىن دا ايتىپ ءوتتى.
– مەكتەپ اسحاناسىنداعى حابارلاندىرۋلار وزگە تىلدە جازىلعان ەكەن. ەكىنشىدەن, اس مازىرىندە ءبالىش, توقاش باعالارى جوعارى. قامقورشىلىق كەڭەس مۇشەلەرى قايدا قاراپ وتىر؟ اسحانا سورەسىندە شوكولاد پەن ءتاتتى سۋسىندار دا بار. ولاي بولسا, اتا-انالارمەن بىرلەسىپ, تاماق ساپاسىن باقىلاۋ قاجەت-اق, – دەدى ب.باقاۋوۆ.
وبلىس اكىمى اتا-انالارمەن كەزدەسۋدە مەكتەپ اسحاناسىنداعى تاماقتىڭ ساپاسىنا قامقورشىلىق كەڭەس وكىلدەرى جاۋاپتى ەكەنىن اتاپ ءوتتى. وبلىستىق ءبىلىم بەرۋ باسقارماسىنىڭ باسشىسى ءدىنيسلام بولاتحان ۇلىنا مەكتەپ اسحاناسىن ءبىر جىلعا جالعا بەرمەي, ارەندالىق شارتتا 3-5 جىلعا دەيىن ۇزارتۋدى ۇسىندى.
سۇراق تا, ماسەلە دە از ەمەس. وسى كەزدەسۋدەن سوڭ مەكتەپ اسحاناسى, اۋلاسى, باسقا دا كوپتەگەن شارۋاشىلىق ماسەلەلەرى قالالىق, وبلىستىق ءبىلىم بەرۋ سالاسىنىڭ باسشىلارىنىڭ, مەكتەپ ديرەكتورلارىنىڭ, قامقورشىلىق كەڭەس وكىلدەرىنىڭ نازارىنان نەگە تىس قالعان دەگەن وي كەلەدى.
پاۆلودار وبلىسى
