ءمامس جۇيەسىندە ءبىزدىڭ مەديتسينالىق قىزمەت اقىسىز مەديتسينالىق قىزمەتتەردى عانا ەمەس, سونىمەن قاتار مەديتسينالىق كومەكتىڭ كەڭ سپەكترىن قامتيتىن ەكى تولىق پاكەتتى – ساقتاندىرۋ جانە كەپىلدەندىرىلگەن تەگىن مەديتسينالىق كومەكتى ۇسىنا الادى. ساقتاندىرۋ مارتەبەسىنە قاراماستان, ادامدار ۋچاسكەلىك دارىگەرلەرمەن اقىسىز بايلانىسا الادى جانە جەدەل مەديتسينالىق كومەك الا الادى.
جۇرەك-قان تامىرلارى اۋرۋلارى, قوعام ءۇشىن قاۋىپتى اۋرۋلار, اقتق, تۋبەركۋلەز سياقتى امبۋلاتوريالىق-ەپيدەميولوگيالىق نەگىزدە باسقارىلاتىن ينفەكتسيالىق ەمەس سوزىلمالى اۋرۋلارى بار, مىسالى, قانت ديابەتى, استما سياقتى الەۋمەتتىك ءمانى بار ناۋقاستارعا مەديتسينالىق كومەكتىڭ تولىق سپەكترى كورسەتىلەدى. اقىسىز پاكەت حالىقتىڭ كوپ بولىگىن قامتيدى جانە قازىرگى كەزدە بىزدە جوعارى ءولىم مەن مۇگەدەكتىككە دۋشار ەتەتىن بارلىق اۋرۋدى ەمدەۋگە كەپىلدىك بەرەدى. مۇنى ادامگەرشىلىككە, پاتسيەنتكە باعىتتالعان ءتاسىل دەپ سانايمىن جانە قازاقستاندىق مەديتسينالىق ساقتاندىرۋ جۇيەسىنىڭ ۇلكەن ارتىقشىلىعى دەپ بىلەمىن.
ساقتاندىرۋ پاكەتىنە امبۋلاتوريالىق-ەمحانالىق كومەك, باستاپقى مەديتسينالىق-سانيتارلىق كومەك مامانىنىڭ جانە بەيىندى مامانداردىڭ جولداماسى بويىنشا باستاپقى مەديتسينالىق-سانيتارلىق كومەك, كونسۋلتاتسيالىق-دياگنوستيكالىق كومەك كەڭەستەرىنىڭ كەڭ سپەكترى, دارىگەردىڭ رەتسەپتى بويىنشا امبۋلاتوريالىق ءدارى-دارمەكپەن قامتاماسىز ەتۋ, جوسپارلى ستاتسيونارلىق كومەك, جوعارى تەحنولوگيالىق مەديتسينالىق قىزمەتتەردى قوسا العاندا ەمدەۋگە جاتقىزۋ جوسپارلانعان جاعدايلار, شۇعىل كورسەتىمدەر, ستاتسيوناردى الماستىراتىن كومەك, وڭالتۋ قىزمەتتەرى كىرەدى.
تۇرعىندار, بىرىنشىدەن, مىندەتتى الەۋمەتتىك مەديتسينالىق ساقتاندىرۋ ارقىلى تاڭداعان كەز كەلگەن ەمحانادان مەديتسينالىق كومەك الا الادى; ەكىنشىدەن, تەگىن مەديتسينالىق كومەكتىڭ كەپىلدەندىرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ پاكەتتەرى شەڭبەرىندە قاراستىرىلعان مەديتسينالىق كومەككە جۇمسالاتىن قوسىمشا تولەمدەردىڭ بارلىق تۇرىنەن بوساتىلادى; ۇشىنشىدەن, ساپاسىز قىزمەت كورسەتىلگەن نەمەسە مىندەتتى الەۋمەتتىك مەديتسينالىق ساقتاندىرۋعا قاتىسۋشى رەتىندە قۇقىقتارى بۇزىلعان جاعدايدا قور ساقتاندىرىلعان ازاماتتاردىڭ قۇقىقتارى مەن مۇددەلەرىن قورعايدى. تورتىنشىدەن, ءمامس جۇيەسىن ەنگىزۋ كورسەتىلەتىن مەديتسينالىق كومەكتىڭ ساپاسىن جاقسارتۋعا مۇمكىندىك بەرەدى.
«Sana Vita Clinic» جشس مەديتسينالىق مەكەمەسى – الەۋمەتتىك ساقتاندىرۋ قورىنىڭ قىزمەتتەرىن جەتكىزۋشىلەردىڭ ءبىرى. قازاقستاننىڭ بارلىق وڭىرىندە 15 قىركۇيەك پەن 15 قاراشا ارالىعىندا تىركەۋ ناۋقانى وتكىزىلدى. قازىر بۇل مەكەمەنى تاڭداعان ادامدار ايتارلىقتاي كوپ. اتاپ ايتقاندا, كلينيكا بويىنشا تىركەۋدە 11900 ادام تۇرسا, سونىڭ ىشىندە بيىل ءوز ەركىمەن تىركەۋگە تۇرعان ادام سانى – 2493, ەرەسەكتەر – 1078, 18 جاسقا دەيىنگى بالالار سانى – 1415 جاندى قۇرادى.
مەنىڭ اتالعان مەكەمەدە ەڭبەك ەتكەنىمە 12 جىلدان استى, كوپتەگەن وزگەرىستەر كوردىك, قانشاما جۇيەلەرمەن جۇمىس جاسادىق. بۇگىندە ءبىز كەشەندى مەديتسينالىق اقپاراتتىق جۇيەگە اۋىستىق. بۇل پاتسيەنتتەر تۋرالى بارلىق دەرەكتەردىڭ, ولاردىڭ دياگنوزدارى مەن تاعايىندالعان ءدارى-دارمەكتەر مەن پروتسەدۋرالارى بىرىڭعاي دەرەكقوردا ساقتالاتىنىن بىلدىرەدى. وسى ارقىلى ءمامس جۇيەسىن ەنگىزۋ وڭايىراق بولادى دەپ ويلايمىن. قازىر مەديتسينالىق قىزمەتكەرلەرىمىز تمكك جانە ءمامس قىزمەتتەرىن كورسەتۋ ماسەلەلەرى بويىنشا اقپاراتتىق-ءتۇسىندىرۋ جۇمىستارىن تۇراقتى تۇردە جۇرگىزۋدە. ياعني ءمامس جۇيەسىندە جۇمىس ىستەۋگە دايىنبىز دەسەم بولادى. ويتكەنى ءمامس جۇيەسى ەنگىزىلگەن سوڭ, مەديتسينادا كوپ وزگەرىس بولاتىنىنا سەنىمدىمىن. جاڭا جۇيەنىڭ ەنگىزىلۋىمەن مەديتسينالىق قىزمەتتەر نارىعىندا ويىن ەرەجەلەرى وزگەرۋى كەرەك. جۇيەدەگى قاتىناستاردىڭ سيپاتى ءارتۇرلى بولادى: مەملەكەتتىك جانە جەكە كلينيكالار كليەنتتەر ءۇشىن مەديتسينالىق قىزمەتتەردى ساتىپ الۋشىمەن سالىستىرمالى تۇردە تەڭ دارەجەدە باسەكەلەسەدى, سونىمەن قاتار ولاردىڭ ساپاسىن باقىلايدى. ءمامس جۇيەسىن ەنگىزۋدىڭ پايداسىن مەديتسينا قىزمەتكەرلەرى, مەديتسينالىق ۇيىمدار, تۇرعىندار جانە مەملەكەت تە كورەدى دەپ سەنەمىز.
زاۋرە حاراشاەۆا,
نۇر-سۇلتان قالاسىنداعى «Sana Vita Clinic» جشس جەكەمەنشىك كلينيكاسى باسشىسىنىڭ ورىنباسارى
