نيدەرلاندى سىرتقى ىستەر مينيسترلىگى باس ديرەكتورىنىڭ ساياسي ىستەر جونىندەگى ورىنباسارى پيتەر-يان كلەيۆەگ دە زۆاانمەن كەزدەسۋ بارىسىندا تاراپتار ەلدەر اراسىنداعى سىندارلى ساياسي ديالوگتى اتاپ ءوتىپ, ەكىجاقتى ىنتىماقتاستىقتىڭ الداعى پەرسپەكتيۆالارىن تالقىلادى.
ر. ۆاسيلەنكو قازاقستان نيدەرلاندىنى ەۋروپاداعى نەگىزگى ساياسي جانە ساۋدا-ەكونوميكالىق سەرىكتەستەردىڭ ءبىرى رەتىندە قاراستىراتىنىن اتاپ ءوتتى. اسا جوعارى جانە جوعارى دەڭگەيدەگى بايلانىستاردىڭ جوعارى قارقىنى, ەكى ەل باسشىلارى ديالوگىنىڭ سەنىمدى سيپاتى, سونداي-اق قازاقستان مەن نيدەرلاندىنىڭ بۇۇ قاۋىپسىزدىك كەڭەسىنە ءبىر مەزگىلدە مۇشە بولۋى بارىسىنداعى ديپلوماتتاردىڭ ءوزارا ءىس-قيمىلىنىڭ وڭ تاجىريبەسى اتاپ ءوتىلدى.
ول قازاقستان پرەمەر-ءمينيسترىنىڭ ساپارى بارىسىندا قول قويىلعان اۋىل شارۋاشىلىعى, تۇرعىن ءۇي-كوممۋنالدىق شارۋاشىلىعى جانە جەردى قاشىقتىقتان زوندتاۋ سالالارىنداعى ىنتىماقتاستىق تۋرالى قۇجاتتاردىڭ ماڭىزدىلىعىن اتاي وتىرىپ, «كورولدىك قازاقستانعا تىكەلەي ينۆەستيتسيالاردىڭ جالپى كولەمى بويىنشا ء«نومىر ءبىرىنشى» ينۆەستور بولىپ تابىلادى جانە بۇل ءۇردىس جالعاسىن تابادى دەپ ۇمىتتەنەمىز», - دەدى.
سونىمەن قاتار, قازاقستاندىق ديپلومات ارىپتەستەرىمەن قازاقستاننىڭ نيدەرلاندىدا «Kazakh Invest» اق ەۋروپالىق ءوفيسىن اشۋ جونىندەگى جوسپارلارى تۋرالى اقپاراتپەن ءبولىستى.
ءوز كەزەگىندە, نيدەرلاندتىق تاراپ قازاقستاندا جۇرگىزىلىپ جاتقان قۇقىق ۇستەمدىگىن ودان ءارى نىعايتۋعا جانە بيزنەس ءۇشىن قولايلى جاعداي جاساۋعا باعىتتالعان ساياسي جانە ەكونوميكالىق رەفورمالاردى قولدايتىنىن اتاپ ءوتتى.
ىنتىماقتاستىقتىڭ قازىرگى جوعارى دەڭگەيىن ەسكەرە وتىرىپ, تاراپتار قازاقستان مەن نيدەرلاندى سىرتقى ساياسي ۆەدومستۆولارى اراسىنداعى ساياسي كونسۋلتاتسيالار فورماتىندا تۇراقتى بايلانىستاردى قولداۋ ماڭىزدى دەپ كەلىستى. نيدەرلاندى ءسىم باس ديرەكتورىنىڭ ورىنباسارى وسىنداي كەلىسسوزدەردى وتكىزۋ ءۇشىن جاۋاپتى ساپارمەن نۇر-سۇلتانعا كەلۋگە دايىن ەكەنىن جەتكىزدى.
اڭگىمەلەسۋ بارىسىندا تاراپتار ەلدەردىڭ كوپجاقتى فورماتتاعى تابىستى ءوزارا ءىس-قيمىلىن جانە نيدەرلاندىنىڭ قازاقستان مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمىن راتيفيكاتسيالاۋىن قاناعاتتانا اتاپ ءوتتى. ديپلوماتتار ەو-نىڭ ورتالىق ازيا بويىنشا جاڭا ستراتەگياسى شەڭبەرىندەگى ىنتىماقتاستىق پەرسپەكتيۆالارىنا, «جۋسان» وپەراتسياسى شەڭبەرىندەگى اسكەري ءىس-قيمىلدار ايماقتارىنان ءوز ازاماتتارىن قايتارۋدىڭ قازاقستاندىق تاجىريبەسىنە, سونداي-اق جاپپاي قىرىپ-جويۋ قارۋىن تاراتپاۋ ماسەلەلەرى بويىنشا ءوزارا ءىس-قيمىلعا ەرەكشە نازار اۋداردى.
قازاقستاندىق تاراپ اعىمداعى جىلدىڭ 26 قاراشاسىندا گااگادا وتەتىن «الەم دارىگەرلەرى يادرولىق سوعىستى بولدىرماۋ ءۇشىن» ۇيىمىنىڭ نيدەرلاندتىق بولىمشەسىنىڭ 50 جىلدىعى اياسىندا وتەتىن «يادرولىق قارۋدان ازات الەمگە شاقىرۋ» حالىقارالىق كونفەرەنتسياسىنا قاتىسۋعا دايىن ەكەندىگىن جەتكىزدى.
گااگادا بولۋ بارىسىندا ر. ۆاسيلەنكو نيدەرلاندى كورولدىگى باس شتاتتارى وكىلدەرى پالاتاسىنىڭ حالىقارالىق ىستەر جونىندەگى كوميتەتىنىڭ مۇشەلەرىمەن دە كەزدەسۋ وتكىزدى.
ءمينيستردىڭ ورىنباسارى ەلىمىزدە بولىپ جاتقان ىشكى ساياسي ۇدەرىستەر جانە قازاقستان پرەزيدەنتى قاسىم-جومارت توقاەۆتىڭ قىركۇيەك ايىنداعى قازاقستان حالقىنا جولداۋىندا اتاپ كورسەتكەن باسىمدىقتارى تۋرالى ەگجەي-تەگجەيلى ايتىپ بەردى.
قازاقستاننىڭ كوپۆەكتورلى ديپلوماتياسى «دەموكراتى 66» پارتياسىنان دەپۋتات شورد شوردسمانىڭ ۇلكەن قىزىعۋشىلىعىن تۋدىردى, ول قازاقستان پرەمەر-ءمينيسترىنىڭ ساپارىن قازاقستان مەن ەو اراسىنداعى ءوزارا ءىس-قيمىلدى نىعايتۋداعى ماڭىزدى قادام رەتىندە اتاپ ءوتتى.
ەۋروپا كەڭەسىنىڭ پارلامەنتتىك اسسامبلەياسىندا نيدەرلاندى اتىنان وكىلدىك ەتەتىن «ەركىندىك پەن دەموكراتيا ءۇشىن» حالىقتىق پارتياسىنان دەپۋتات ەنن ميۋلدەر پارلامەنتارالىق ىنتىماقتاستىقتى ودان ءارى كەڭەيتۋدىڭ ماڭىزدىلىعىن اتاپ ءوتتى. قازاقستاننىڭ ەقىۇ پارلامەنتتىك اسسامبلەياسى جانە ەۋروپا كەڭەسى سياقتى پارلامەنتتىك ينستيتۋتتارمەن ءوزارا ءىس-قيمىلى ماسەلەسى بولەك تالقىلاندى. نيدەرلاندتىق زاڭ شىعارۋشىلار وسى پارلامەنتارالىق قۇرىلىمداردىڭ ءىس-شارالار اياسىندا قازاقستاندىق دەپۋتاتتارمەن ءجيى كەزدەسۋلەر وتكىزۋگە, سونداي-اق ەلىمىزگە ساپارمەن كەلۋگە نيەت تانىتتى.
سونىمەن قاتار كەزدەسۋ بارىسىندا ورتالىق ازياداعى وڭىرلىك ىنتىماقتاستىق ماسەلەلەرى, قازاقستاننىڭ ەاەو-عا جانە «بەلدەۋ مەن جول» باستاماسىنا قاتىسۋى, اۋعانستاندى تۇراقتاندىرۋعا قوسقان ەلىمىزدىڭ ۇلەسى, سونداي-اق تەرروريزم مەن ەكسترەميزمگە قارسى كۇرەس ماسەلەلەرى تالقىلاندى.
