ەل بىرىنشىلىگىنىڭ 31-تۋر ويىندارىنىڭ شىمىلدىعىن قىزىلوردانىڭ «قايسارى» مەن اتىراۋدىڭ «اتىراۋ» كوماندالارى اشتى. قازاقستان كۋبوگىندا توپ جارعاننان كەيىن «قايسار» ەۋروپا ليگاسىنا جولداما الىپ, ىشكى چەمپيوناتتاعى ميسسياسىن مەرزىمىنەن بۇرىن ورىنداعان سوڭ قالعان كوماندالارعا ۇپاي تاراتا باستادى. وتكەن تۋردا «ەرتىسكە» ۇپاي سىيلاعان قىزىلوردانىڭ كومانداسى بۇل جولى «اتىراۋعا» ءۇش ۇپاي ۇستاتتى. «قايسار» ءوز الاڭىندا وتكىزگەن كەزدەسۋدە قوناقتارعا 0:1 ەسەبىمەن ەسە جىبەردى. ماتچتاعى جالعىز گولدىڭ اۆتورى – گجەلچاك پەتر. پرەمەر-ليگادا جان ساقتاپ قالۋدىڭ قامىنا كىرىسكەن «اتىراۋ» بۇل جەڭىسىنەن كەيىن تۋرنير كەستەسىندە 23 ۇپايمەن 11-ورىندا كەلەدى.
ەۋروپا ليگاسىنا جولداما بەرەتىن ءۇشىنشى ورىننان ءۇمىتى بار شىمكەنتتىڭ «ورداباسى» كومانداسى ءوز الاڭىندا پاۆلوداردىڭ «ەرتىس» كومانداسىن قابىلداپ, 2:0 ەسەبىمەن جەڭىسكە جەتتى. وتە تارتىستى وتكەن ويىندا «ورداباسى» سوڭعى مينۋتتاردا قارسىلاسىنان باسىم ءتۇستى. ماتچتىڭ 78-مينۋتىندا قورعاۋشى سەرگەي مالىي ەسەپتى اشسا, ارادا 6 مينۋت وتكەندە شابۋىلشى ماي ماحلانگۋ كەزدەسۋدىڭ نۇكتەسىن قويدى. ءوز الاڭىندا ماڭىزدى ءۇش ۇپايعا قول جەتكىزگەن «ورداباسى» قولا جۇلدە ءۇشىن كۇرەستى جالعاستىرۋدا. ال «ەرتىستىڭ» باستى ماقساتى ۇزدىك وندىقتىڭ قاتارىنان ءتۇسىپ قالماۋ بولىپ تۇر.
چەمپيوندىقتان نەگىزگى ۇمىتكەرلەردىڭ ءبىرى – الماتىنىڭ «قايراتى» ءوز الاڭىندا وسى ماتچقا دەيىن باس جۇلدەدەن ءۇمىتتى بولعان قوستانايدىڭ «توبىلىن» قابىلدادى. جالپى, بۇل ماتچتى تۋردىڭ ورتالىق ويىنى دەپ ايتۋعا تولىق نەگىز بار. ويتكەنى ەكى كومانداعا دا ءۇش ۇپاي اۋاداي قاجەت بولاتىن. سونداي-اق جەڭىسكە جەتكەن كوماندا چەمپيوندىققا تالاستى ءارى قاراي جالعاستىرا بەرەدى, ال جەڭىلگەن كوماندا التىن جۇلدەدەن ءۇمىتىن ءۇزىپ, قولا مەدال ءۇشىن وينايدى. «ورداباسى» – «ەرتىس» ماتچى سياقتى بۇل ويىندا دا ەكى گول سوعىپ, جەڭىمپاز كوماندانىڭ ەسىمى سوڭعى مينۋتتاردا بەلگىلى بولدى. گەورگي جۋكوۆ 73-مينۋتتا «قايراتتى» ەسەپتە العا شىعارسا, 93-مينۋتتا ارتۋر شۋشەناچەۆ الاڭ يەلەرىنىڭ جەڭىسىن ناقتىلادى. ەندى «قايرات» پەن «استانا» اراسىنداعى چەمپيوندىققا تالاس قىزا تۇسپەك.
سوڭعى جەتى ويىننىڭ بەسەۋىندە قارسىلاستارىنا ەسە جىبەرىپ, تۋرنير كەستەسىندە تومەن سىرعىپ بارا جاتقان قاراعاندىنىڭ «شاحتەرى» سوڭعى ەكى تۋردا ەكىنشى رەت تەڭ وينادى. سايكەسىنشە, كەنشىلەر كومانداسى جەتى تۋردان بەرى جەڭىسكە جەتە الماي كەلەدى. وتكەن تۋردا «تارازبەن» 0:0 ەسەبىمەن تەڭ تارقاسسا, بۇل جولى ءوز الاڭىندا كوكشەتاۋدىڭ «وقجەتپەس» كلۋبىمەن تەڭ وينادى. ويىنداعى قورىتىندى ەسەپ – 2:2. ءبىر-ءبىر ۇپايدى قورجىندارىنا سالعان ەكى كوماندا تۋرنير كەستەسىندە 7-ءشى جانە 8-ورىنداردى ءبولىسىپ تۇر.
تالدىقورعاننىڭ «جەتىسۋى» مەن تارازدىڭ «تاراز» كلۋبىنىڭ اراسىنداعى كەزدەسۋ 0:0 ەسەبىمەن اياقتالدى. «جەتىسۋ» بۇل ويىندا جەڭىلسە دە, جەڭىسكە جەتسە دە تۋرنير كەستەسىندەگى 5-ورىندا قالا بەرەدى. سوندىقتان بۇل ويىن جەتىسۋلىقتار ءۇشىن اسا ماڭىزدى بولعان جوق. ال قوناق كوماندانىڭ ماقساتى قالاي دا ۇپاي ولجالاۋ بولاتىن. سىرت الاڭدا ءبىر ۇپايعا قول جەتكىزگەن «تاراز» 26 ۇپايمەن تۋرنير كەستەسىندە 10-ورىنعا تۇراقتادى.
31-تۋردىڭ شىمىلدىعى ەلوردادا جابىلدى. «استانا» – «اقتوبە» اراسىنداعى ماتچ تۋردىڭ ەڭ كوپ گول سوعىلعان ويىنى بولدى. چەمپيوندىقتان نەگىزگى ۇمىتكەر «استانا» ەۋروپا ليگاسىنىڭ 3-تۋرىندا سىرت الاڭدا نيدەرلاندتىڭ از كومانداسىنان وڭباي جەڭىلگەن سوڭ, ايىبىن جۋىپ-شايۋ ءۇشىن ءوز جانكۇيەرلەرى الدىندا ءىرى ەسەپپەن جەڭىسكە جەتۋى كەرەك ەدى. جانە سولاي بولدى دا. بۇل كەزدەسۋدە «استانا» 5:0 ەسەبىمەن جەڭىسكە جەتسە, مارين توماسوۆتىڭ ءبىر ءوزى 4 گول سوقتى. فۋتبول تىلىمەن ايتقاندا, پوكەر اۆتورى اتاندى. ءبىر قىزىعى, ەل چەمپيوناتىندا سوڭعى رەت ءتورت گولدى 2003 جىلى تۇرىكمەن شابۋىلشىسى ءمۇسلىم اگاەۆ سالعان ەكەن. وسىلايشا 16 جىلدان بەرى مۇرتى بۇزىلماي كەلە جاتقان ستاتيستيكانى حورۆاتيالىق ساڭلاق جاڭارتتى. «استانا» ساپىنداعى بەسىنشى گولدى سەرىكجان مۇجىقوۆ سالعانىن دا ايتا كەتەيىك.
الداعى جەكسەنبى كۇنى 32-تۋر ويىندارى وتەدى. بۇل تۋردا «اقتوبە» – «شاحتەر», «اتىراۋ» – «ورداباسى», «ەرتىس» – «قايرات», «وقجەتپەس» – «جەتىسۋ», «تاراز» – «قايسار» جانە «توبىل» – «استانا» كوماندالارى كەزدەسەدى.
31-تۋردان كەيىن سۇرمەرگەندەر كوشىن 19 گولمەن «استانانىڭ» جارتىلاي قورعاۋشىسى مارين توماسوۆ باستادى. ەكىنشى ورىندا 18 گولمەن «قايرات» شابۋىلشىسى ادەرينسولا ەسەولا تۇرسا, ءۇشىنشى ساتىدا «قايراتتىڭ» تاعى ءبىر ويىنشىسى مارتون ەپپەل ورنالاسقان. ونىڭ ەنشىسىندە 16 گول بار.
