ورتالىق كوممۋنيكاتسيالار قىزمەتىندە وتكەن بريفينگتە كوميتەت توراعاسى «قازاقستاندىقتار بۇدان بىلاي ءوز اتىنا قانشا ۇيالى بايلانىس ءنومىرى تىركەلگەنىن بىلە الادى. ابونەنتكە تىركەلگەن نومىرلەر سانىن ءبىلۋ ءۇشىن ازاماتتىڭ جسن-ءىن ەنگىزۋ جەتكىلىكتى. بۇل سەرۆيس تىركەلگەن ءنومىر سانىن جانە ۇيالى وپەراتوردى كورسەتىپ بەرەدى. تىركەلگەن نومىرلەردى تەكسەرىپ بەرەتىن سەرۆيس مەملەكەتتىك راديوجيىلىك قىزمەتىنىڭ سايتىندا جانە Egov.kz سايتىندا ورنالاستىرىلعان», دەدى.
ەگەر ۇستاپ جۇرگەن SIM-كارتاڭىز وزگە بىرەۋدىڭ اتىندا بولسا, ءسىز بوتەن ادامنىڭ اتىنان ارەكەت ەتكەن سانالاسىز. تيىسىنشە شىن يەسى انىقتالىپ, ءنومىردى داۋلايتىن بولسا, SIM-كارتاڭىزدان ايىرىلىپ قالۋىڭىز مۇمكىن. ءنومىردىڭ شىن يەسى كەز كەلگەن ۋاقىتتا وپەراتورلىق كەڭسەگە كەلىپ, ءوتىنىش جازىپ, SIM-كارتانى بۇعاتتاي الادى. ءنومىردى بۇعاتتاماسا دا, سمس پەن ينتەرنەت-ترافيكتەردى تەكسەرىپ, نومىردەن كىمگە, قاشان قوڭىراۋ شالىنعانىن دا بىلە الادى. ءتىپتى ونداعى اقشانى باسقا نومىرگە اۋدارا الادى. سەبەبى ناقتى ءنومىردىڭ يەسى دە سول.
«سول سياقتى ءسىزدىڭ اتىڭىزعا تىركەلگەن SIM-كارتانى وزگە بىرەۋ پايدالانىپ, وزگە تۇلعا زاڭعا قايشى ارەكەت ەتۋى مۇمكىن. وندا قۇقىق قورعاۋ ورگاندارىنىڭ قىزمەتكەرلەرى ۇيالى وپەراتورعا ءوتىنىش جىبەرىپ, الدىمەن سىزگە كەلەدى. ويتكەنى ءنومىر ءسىزدىڭ اتىڭىزدا. ءوزىڭىزدىڭ زاڭعا قايشى ارەكەت ەتپەگەنىڭىزدى دالەلدەگەن كۇننىڭ وزىندە بۇل كەلەڭسىزدىك ءسىزدىڭ مازاڭىزدى الادى. ءنومىرىڭىز ارقىلى وزگە بىرەۋ نەسيە الىپ, قايتارماي قويسا, كوللەكتورلىق ۇيىمدار الدىمەن ءسىزدى ىزدەيدى», دەدى ۆ.ياروشەنكو.
ۆ.ياروشەنكونىڭ ايتۋىنشا, 18 ملن حالقى بار قازاقستاندا 42 ملن SIM-كارتا ساتىلعان. «بۇگىندە ءبىر ادامنىڭ اتىنا بىرنەشە ءنومىر تىركەلگەن فاكتىلەر وتە كوپ. كەيبىرەۋىنىڭ اتىندا ءبىر-ەكى ءنومىر, ال ەندى بىرەۋىندە 20-30 نومىرگە دەيىن تىركەلگەن. زاڭدى يەسى ودان ءتىپتى بەيحابار بولۋى ابدەن مۇمكىن. سوندىقتان بارشا قازاقستاندىقتاردى سەرۆيس ارقىلى SIM-كارتالارىن تەكسەرۋگە شاقىرامىن», دەدى كوميتەت توراعاسى ۆ.ياروشەنكو.
