سونىڭ ىشىندە تيميريازەۆ اۋدانىنا ءسابيت مۇقانوۆتىڭ ەسىمىن بەرۋ تۋرالى ۇسىنىسقا وڭ قورىتىندى بەرىلىپ, كوپتەن ايتىلىپ كەلە جاتقان بۇل شەشىم جوعارىعا جولدانىپ وتىر. بۇل حالىقتىڭ كوپتەن كۇتكەن قۋانىشتى جاڭالىعى ەدى. قازاق ادەبيەتى كلاسسيكتەرىنىڭ ءبىرى بولا تۇرا ءسابيت مۇقانوۆقا ءوزى تۋعان اۋداننىڭ اتىن بەرۋ ءتۇرلى سەبەپتەرمەن ۇزاققا سوزىلىپ كەتكەن. ەندى سونى ر.الىشەۆ توراعالىق ەتەتىن وبلىستىق ونوماستيكالىق كوميسسيا قولداپ وتىر. مارقۇمنىڭ تۋعان جەرى وسى اۋداننىڭ اۋماعىنداعى جامانشۇبار دەگەن قىستاۋ ەكەنىن ادەبيەت سۇيەر قاۋىم جاقسى بىلەدى.
سابەڭ ءوز زامانىنىڭ وزىق ويلى, دارىندى ادەبيەتشىلەرىنىڭ ءبىرى بولدى. قازاقتىڭ بىرنەشە بۋىن ۇرپاعى ونىڭ شىعارمالارىنان رۋحاني ءنار الىپ ءوستى. ونىڭ قالامىنان ونداعان پروزالىق شىعارمالار, پوەمالار, درامالار, پۋبليتسيستيكالىق دۇنيەلەر تۋدى. جەرلەستەرىنىڭ مىنا سىيلىعى الدىمىزداعى جىلى ءساۋىر ايىندا كەلەتىن 120 جىلدىق مەرەيتويىنا ۇلكەن سىي بولعالى تۇر.
سونداي-اق ونوماستيكالىق كوميسسيا پەتروپاۆل قالاسىنداعى قازاق مەكتەپ-گيمنازياسىنا ۇلى ابايدىڭ ەسىمىن بەرۋ تۋرالى شەشىمدى دە قولدادى. بۇل - جاڭا جوبامەن سالىنعان مىڭ ورىندىق ەڭ ۇلكەن قازاق مەكتەبى. وعان 175 جىلدىعى قارساڭىندا ۇلى ابايدىڭ ەسىمى بەرىلگەنى وتە ورىندى شەشىم بولدى.
جاڭادان اشىلىپ, «№25 ورتا مەكتەپ» دەگەن اتاۋ العان تاعى ءبىر قازاق مەكتەبىنە اتاقتى جەرلەسىمىز, بەلگىلى مەملەكەت جانە قوعام قايراتكەرى ماحتاي ساعديەۆتىڭ ەسىمىن بەرۋ تۋرالى ۇسىنىستى دا ونوماستيكالىق كوميسسيا قولدادى. ماكەڭنىڭ اتىنا ەسىل اۋدانىنىڭ ورتالىعى ياۆلەنكا سەلوسىنان دا ءبىر كوشە اتىن بەرۋ ۇسىنىلعان ەكەن. بۇل ۇسىنىس تا قولداۋ تاپتى.
بۇدان باسقا بىرنەشە اۋداننىڭ ورتالىقتارى مەن اۋىلدارىنداعى كوشەلەر مەن مەكتەپتەرگە اتاقتى جەرلەستەرىمىزدىڭ ەسىمدەرىن بەرۋ تۋرالى شەشىمدەر ماقۇلداندى. سونىڭ ىشىندە جازۋشى زەينەل-عابي يمانباەۆتىڭ ەسىمى ءوزى تۇرعان شال اقىن اۋدانىنداعى «پريشيمكا» ورتا مەكتەبىنە بەرىلدى. ال ۆاگۋلينو اۋىلىنداعى ءبىر كوشە 100 جىلدىق مەرەيتويىن تويلاعالى جاتقان ەلىمىزدىڭ باس گازەتى «ەگەمەن قازاقستاننىڭ» اتىنا بەرىلدى.
قازاقى اتاۋلاردىڭ اراسىندا ش.ءۋاليحانوۆ, م.جۇماباەۆ, ابىلاي حان, الاش, دوستىق جانە ت.ب. بار. ال نوۆونيكولسكوە اۋىلىنداعى ءبىر كوشە ەڭبەك ەرى, مارقۇم گەننادي زەنچەنكونىڭ اتىمەن اتالاتىن بولدى.
سولتۇستىك قازاقستان وبلىسى
