ال, جەلەزين اۋداندىق پوليتسيا ءبولىمى باستىعىنىڭ مىندەتىن اتقارۋشى, پوليتسيا پودپولكوۆنيگى نۇرحان القامبەك ۇلى قۇلماعانبەتوۆتىڭ دە پوليتسيا قىزمەتىندەگى وزىندىك جولى بار.
نۇرحان القامبەك ۇلى ميليتسيا دەپ اتالاتىن قىزمەتكە ەلىمىزدىڭ قۇقىق قورعاۋ ورىندارى ەندى عانا جاڭاشا قۇرىلىپ جاتقان كەزدە, ياعني 1991 جىلى كەلىپتى. قاتارداعى ميليتسيونەر, ۋچاسكەلىك پوليتسيا ينسپەكتورى بولا ءجۇرىپ, قۇقىق قورعاۋ سالاسىنداعى بۇگىنگى قىزمەت دارەجەسىنە جەتكەن.
– قازىر ەسكە السام, قىزمەتتەگى ءار جىلدىڭ قيىندىعى, جەتىستىگى, بارلىعى دا شىدامدىلىققا, ءوز ىسىڭە دەگەن مىندەت پەن جاۋاپكەرشىلىكتەن تۇرادى ەكەن. قاتارداعى ميليتسيونەر, ۋچاسكەلىك پوليتسيا ينسپەكتورى بولسا وزىڭە بەرىلگەن اۋماقتى جەتە ءبىلۋ ماڭىزدى. سول اۋماقتىڭ تىنىشتىعىنا جاۋاپ بەرەسىز, ەكىنشىدەن, ءومىر بويى ساباق بولارلىق ۇلكەن تاجىريبەدەن وتەسىز. ول كەزدە كومپيۋتەر, بەينەباقىلاۋ بولعان جوق. تۇرعىندار بىزگە عانا سەنىم ارتاتىن. قازىر قاۋىپسىزدىكتى ساقتاۋ ءۇشىن ءار جەردە بەينەباقىلاۋ ورناتىلعان. ءتارتىپ بۇزۋشىلىققا مونيتورينگ جۇرگىزىپ, جەدەل جيىننان سوڭ, جۇمىسقا كىرىسەتىنبىز, – دەيدى پوليتسيا پودپولكوۆنيگى.
ءسويتىپ, 2005 جىلى نۇرحان القامبەك ۇلى ىشكى ىستەر مينيسترلىگى جانىنداعى اكادەميانى ءبىتىرىپ شىعادى. اكادەميانى بىتىرگەن سوڭ, ەلگە قايتا ورالىپ, ىشكى ىستەر باسقارماسىنا قاراستى جول پوليتسياسىندا قىزمەت اتقارادى.
وڭىردەگى اقتوعاي, جەلەزين, ەرتىس, تەرەڭكول اۋداندارىنىڭ جول پوليتسيالارى قىزمەتىن باقىلايتىن ءبولىمنىڭ اعا اۆتوينسپەكتورى بولادى. ال 2017 جىلى نۇرحان القامبەك ۇلى اۋداندىق جەرگىلىكتى پوليتسيا ءبولىمىنىڭ باسشىسى بولىپ تاعايىندالادى.
ەلباسى ۇسىنعان ۇلت جوسپارىنىڭ 30 قادامىن جۇزەگە اسىرۋ اياسىندا 2016 جىلى ەلىمىزدە جەرگىلىكتى پوليتسيا قىزمەتى قۇرىلعانى بەلگىلى. جەرگىلىكتى پوليتسيا قىزمەتى ۇساق قۇقىق بۇزۋشىلىققا نولدىك توزىمدىلىك قاعيداتىن ۇستانا وتىرىپ, جۇمىس ىستەيدى. سونىمەن قاتار قۇقىق بۇزۋشىلىقتاردىڭ پروفيلاكتيكاسى, قوعامدىق ءتارتىپتى ساقتاۋ, قىلمىستىق قۇقىق بۇزۋشىلىقتاردىڭ الدىن الۋ جانە جولىن كەسۋ, اكىمشىلىك قۇقىق بۇزۋشىلىق بويىنشا ءىس جۇرگىزۋ, قىلمىستىق تەرىس قىلىقتار بويىنشا حاتتامالىق نىساندا سوتقا دەيىنگى تەرگەپ-تەكسەرۋ شارالارى جۇزەگە اسىرىلادى.
– جەرگىلىكتى پوليتسيا قىزمەتىنىڭ باستى ماقساتى – ەڭ الدىمەن حالىقپەن تىعىز قارىم-كاتىناس ورناتۋ. ولار كوشەلەر مەن باسقا دا قوعامدىق ورىنداردا قۇقىقتىق ءتارتىپتى ساقتاۋ, جول قاۋىپسىزدىگىن قامتاماسىز ەتۋ جانە قۇقىق بۇزۋشىلىقتى وڭالتۋ ارقىلى حالىققا جاقىن بولا تۇسەدى, – دەيدى ن.القامبەك ۇلى.
قازىر پوليتسيا پودپولكوۆنيگى نۇرحان القامبەك ۇلى اۋداندىق پوليتسيا ءبولىمى باستىعىنىڭ مىندەتىن اتقارۋدا. ءوزى قىزمەت اتقاراتىن جەلەزين – ەرەكشە اۋدان. ول رەسەيمەن شەكارالاس, ورماندى, ەرتىس وزەنىنىڭ جاعاسىندا ورنالاسقان. سوندىقتان اۋدان قۇقىق قورعاۋشىلارى ءارتۇرلى باعىتتا تىنىمسىز ەڭبەك ەتۋدە. زاڭسىز بالىق, اڭ اۋلاۋشىلاردىڭ بولماۋىن, قايىڭدى ورماننىڭ ساقتالۋىن, مال ۇرلىعىنىڭ ورىن الماۋىن, ۇيدە قارۋ ساقتاۋشىلاردىڭ ونى ءوز ەرىكتەرىمەن وتكىزۋلەرىن قامتاماسىز ەتۋ باعىتىنا باسىمدىق بەرىلدى.
اۋداندىق پوليتسيا ءبولىمى جەرگىلىكتى حالىقپەن Nur Otan پارتياسى اۋداندىق بولىمىندە قابىلداۋلار وتكىزەدى.
– جۋىردا پياتەرىجسك اۋىلىنان ا.سنەگۋر دەگەن ازامات كەلىپ, جوعالىپ كەتكەن اۋىلشارۋاشىلىق تەحنيكالارى جايىندا حاباردار ەتتى. وسى وقيعا بويىنشا ارىز قابىلداندى. قازىر ىزدەستىرۋ جۇرگىزىلۋدە. قابىلداۋ كۇنىنىڭ جەرگىلىكتى حالىققا تيىمدىلىگى – ارقاشان ەسىك اشىق. تۇرعىندار سەنىمىنەن شىعۋ – ۇلكەن جاۋاپكەرشىلىك, – دەيدى نۇرحان القامبەك ۇلى.
سونىمەن بىرگە اۋدان ورتالىعىنداعى №1 مەكتەپتە اۋداندىق پوليتسيا ءبولىمىنىڭ باسشىلىعىنىڭ, وبلىستىق دەپارتامەنتتىڭ كادر ساياساتى باسقارماسى وكىلدەرىنىڭ قاتىسۋىمەن, ىشكى ىستەر مينيسترلىگى قاراعاندى اكادەمياسىنا وقۋعا تۇسۋگە شاقىرۋ بويىنشا ءىس-شارا ءوتتى.
كەزدەسۋ بارىسىندا اكادەمياعا قابىلداۋ ءتارتىبى, ماماندىقتار بويىنشا دايارلاۋ, مەديتسينالىق كوميسسيادان ءوتۋ, دەنە شىنىقتىرۋ دايارلىعى بويىنشا نورماتيۆتەردى تاپسىرۋ جونىندەگى اقپاراتتار بەرىلگەن.
بۇل كۇندەرى, ياعني وسى جىلدىڭ 15 قىركۇيەك پەن 10 جەلتوقسان ارالىعىنا جوسپارلانعان جەلەزين اۋدانى اۋماعىندا «ۋچاسكە» جەدەل-پروفيلاكتيكالىق شاراسى وتۋدە. جەدەل-پروفيلاكتيكالىق شارا بارىسىندا پوليتسيا قىزمەتكەرلەرى جاڭادان كوشىپ كەلگەن تۇرعىندارمەن تانىسىپ, جەرگىلىكتى تۇرعىندارعا زاڭ جۇيەسىندەگى وزگەرىستەر جايىنداعى بۋكلەتتەر مەن ەسكەرتپەلەر تاراتۋدا.
سول سياقتى «جول بويىنداعى جولاۋشىلار اۆتوبۋسى», «قاۋىپسىز مەكتەپ اۆتوبۋسى» شارالارى دا جالعاسۋدا.
ال نۇرحان القامبەك ۇلىنىڭ وسىنداي تىنىمسىز قىزمەتتە جۇرگەندە وتباسىنا سۇيىكتى جارى – انار قىلىشبايقىزى قارايدى. شاڭىراعىندا ءۇش بالا ءوسىرىپ وتىر.
ۇلدارى ايبەك القامبەك اكە جولىن قۋىپ, قۇقىق قورعاۋ سالاسىن تاڭدادى. ۇيدە مەيىرىمدى, جۇمىستا ادال اكەنىڭ تاربيەسىمەن ءوستى. الماتىداعى ىشكى ىستەر مينيسترلىگىنىڭ اكادەمياسىن ءبىتىردى. ول بۇل كۇندەرى پوليتسيا اعا لەيتەنانتى. وڭىردەگى ەرتىس اۋدانىندا قىزمەت ەتىپ ءجۇر. قىلمىستىق ىستەردى جەدەل ىزدەستىرۋ ءبولىمىنىڭ ۋاكىلى.
– قازىر ىشكى ىستەر ورىندارىنا, جەرگىلىكتى پوليتسيا بولىمدەرىنە جاس ماماندار وتە قاجەت. پوليتسيا جايلى ءارتۇرلى پىكىرلەر ايتىلادى. بىراق, قۇقىق قورعاۋ سالاسىنىڭ كۇندىز-ءتۇنى حالىققا ارناعان قىزمەتى – بۇل جاڭساق پىكىرلەردى تەرىسكە شىعارا الادى. ءبىز جاس پوليتسەيلەرگە سەنىم ارتامىز. ولار دا ءبىز سەكىلدى قىزمەت ەتىپ, جوعارى ءبىلىم الىپ, ەل تىنىشتىعىن ساقتاۋ ءۇشىن جاستاردى قۇقىق قورعاۋ سالاسىندا جۇمىس ىستەۋگە شاقىرامىز, – دەيدى پوليتسيا پودپولكوۆنيگى ن.قۇلماعانبەتوۆ.
پاۆلودار وبلىسى
