پرەزيدەنت جولداۋى – بارشا قازاقستاندىقتاردىڭ ومىرىنە, بولاشاعىنا قاتىستى تاريحي قۇجات: ستراتەگيالىق ماڭىزدىلىعى مەن بەلگىلى ءبىر مەرزىمدە ناقتى مىندەتتەر مەن ماسەلەلەردىڭ شەشىلۋىن قامتاماسىز ەتۋگە باعىتتالعان. جاسامپازدىققا جەتەلەگەن بيىلعى جولداۋ ەلىمىزدىڭ ەڭسەسىن بيىكتەتىپ, عالامدىق وركەنيەت ورىسىنە شىعارماق. مەملەكەت باسشىسى قايناعان تىرشىلىكتىڭ ءبارى ەلدىڭ ەكونوميكاسىنا قاتىستى ەكەنىن باسا ايتتى. ويتكەنى ەلدىڭ دامۋى ەكونوميكامەن تىعىز, تىكەلەي بايلانىستى. باسەكەلەستىك كەڭىستىكتە دامىعان ەل عانا الدىڭعى ورىنعا شىعاتىنىنا كوزىمىز جەتتى.
ەرتەڭگى باعىتىن, جۇرەتىن جولىن, ءوسۋ جولىنداعى مۇراتىن انىق بىلگەن ەلدەردىڭ قانداي جەڭىستەرگە جەتكەنىن تاريحتان بىلەمىز. ەلىمىز تاۋەلسىزدىگىنە ەندى قول جەتكىزىپ جاتقاندا الداعى 30 جىلىن ويلاسا, ەندى ءجۇرىسىن دۇرىستاپ, تىنىسىن جوندەپ العاندا سىندارلى مۇراتتاردى العا قويدى. سىندارلى مۇرات دەگەن حالىقتىڭ جاعدايى, ەلدىڭ ورلەۋى, جارقىن ءومىر.
مەملەكەت باسشىسى قازىرگى ۋاقىتتا بىزگە تاۋەلسىزدىكتىڭ جەتىستىكتەرىن ەسەلەپ, ەلىمىزدى دامۋدىڭ جاڭا ساپالى كەزەڭىنە شىعارۋ مۇمكىندىگى بەرىلىپ وتىرعانىن جەتكىزدى.
ء«بىز بۇعان ەلباسى ساياساتىنىڭ ساباقتاستىعىن ساقتاپ, جۇيەلى رەفورمالار جۇرگىزۋ ارقىلى قول جەتكىزە الامىز. وزدەرىڭىزگە بەلگىلى, وسىنىڭ ءبارى مەنىڭ سايلاۋالدى باعدارلامامنىڭ نەگىزى بولدى. قازىر مەملەكەتتىك ورگاندار ونى جۇزەگە اسىرۋ ءۇشىن ءتيىستى جۇمىستار جۇرگىزۋدە. مەن حالىققا بەرگەن ۋادەلەرىمدى مىندەتتى تۇردە ورىندايمىن», دەدى پرەزيدەنت.
سونداي-اق پرەزيدەنت حالىققا جولداۋىندا ۇكىمەت مۇشەلەرىنە, مەملەكەتتىك ورگاندار مەن وڭىرلەردىڭ, مەملەكەتتىك كومپانيالاردىڭ جانە مەكەمەلەردىڭ باسشىلارىنا ءتيىستى رەفورمانىڭ جۇزەگە اسىرىلۋى ءۇشىن دەربەس جاۋاپكەرشىلىك جۇكتەلەتىنىن مالىمدەدى جانە قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەۋ تۋرالى ايتتى.
«قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ, ەتنوسارالىق تاتۋلىق پەن دىنارالىق تۇسىنىستىكتى قالىپتاستىرا بەرۋىمىز قاجەت. ءبىزدىڭ ۇستانىمىمىز: ەل بىرلىگى – ونىڭ ارالۋاندىعىندا!» دەدى قاسىم-جومارت توقاەۆ.
سونداي-اق مەملەكەت باسشىسى تامىز كونفەرەنتسياسىندا الداعى ءتورت جىل ىشىندە مۇعالىمدەردىڭ ەڭبەكاقىسىن ەكى ەسە ارتتىرۋدى تاپسىرعانىن ايتا كەلىپ: «بۇل – كەلەسى جىلدان باستاپ ۇستازداردىڭ جالاقىسى 25 پايىزعا وسەدى دەگەن ءسوز», دەدى.
جولداۋدا ايتىلعان تاعى ءبىر ماڭىزدى ماسەلە – ازاماتتىق قوعامعا قولداۋ كورسەتۋ قاجەتتىگى. پرەزيدەنت: «ازاماتتىق قوعامعا قولداۋ كورسەتۋ كەرەك, حالىقتى جالپىمەملەكەتتىك وزەكتى تاپسىرمالاردى تالقىلاۋعا تارتۋ كەرەك. سول ءۇشىن دە ۇلتتىق قوعامدىق سەنىم كەڭەسى قۇرىلدى», دەي كەلىپ, ول كەلەلى ماسەلەلەر كوشەدە ەمەس, پارلامەنتتە شەشىلۋى ءتيىس ەكەنىن قاداپ ايتتى.
سونداي-اق «الدا بولاتىن ءماجىلىس جانە ءماسليحات سايلاۋى ەلدى كوپپارتيالى جۇيەگە اكەلۋى ءتيىس», دەدى پرەزيدەنت.
قاسىم-جومارت توقاەۆ ءتىل ماسەلەسى تۋرالى دا ءسوز قوزعادى. قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەتىنىن, بىراق مۇنداي دارەجەگە جەتۋ ءۇشىن ءبارىمىز داڭعازا جاساماي, جۇمىلا جۇمىس جۇرگىزۋىمىز قاجەتتىگىن باسا ايتتى.
مەملەكەت باسشىسى ەل تاعدىرىنا جانى اشيتىن ءاربىر ازاماتقا زور سەنىم ارتاتىنىن جەتكىزدى.
«قازاقستان – ورتاق شاڭىراعىمىز! مەن ءبارىڭىزدى مەرەيلى مەكەنىمىزدى وركەندەتۋگە ۇلەس قوسۋعا شاقىرامىن! سىندارلى قوعامدىق ديالوگ – تاتۋلىق پەن تۇراقتىلىق نەگىزى», دەدى ول.
حالىق «بىرلىك بار جەردە تىرلىك بار» دەيدى. پرەزيدەنتتىڭ ەلىمىزدى جاۋاپكەرشىلىككە شاقىرا وتىرىپ, جاسامپازدىققا جەتەلەگەن سىندارلى جولداۋى مەملەكەتىمىزدى باياندى بەلەستەرگە باستايدى دەپ سەنەمىز.
ەرلان سىدىقوۆ,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, ۇعا اكادەميگى
