بۇگىنگى تاڭدا وبلىستىڭ تاريحي مەرەيتويىن لايىقتى دەڭگەيدە اتاپ ءوتۋ بارشا جامبىلدىقتار ءۇشىن ۇلكەن جاۋاپكەرشىلىك بولىپ تۇر. جاستاردىڭ بويىندا وتانسۇيگىشتىكتى قالىپتاستىرۋ ماقساتىندا قازىردە ءوڭىردىڭ 80 جىلدىعىن رۋحاني تۇرعىدا اتاپ ءوتۋ قاراستىرىلۋدا. جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆتىڭ ايتۋىنشا, قازىرگى كەزدە ءوڭىر مەرەيتويىنا دايىندىق جوعارى دەڭگەيدە.
بۇگىندە تاراز قالاسىنداعى «بالاساعۇن» ورتالىق كونتسەرت زالىنىڭ الدىندا كەنەن ازىرباەۆ ەسكەرتكىشىن اشۋ, وڭىردەن شىققان ونەر جۇلدىزدارىنىڭ كونتسەرتىن ۇيىمداستىرۋ, ايگىلى رەجيسسەر اسقار توقپانوۆتىڭ ەسكەرتكىشىن اشۋ, وبلىستىق قازاق دراما تەاترىندا بولات بەكجانوۆتىڭ «ايشا ءبيبى» تاريحي دراماسىنىڭ قويىلىمىن ساحنالاۋ, جاڭادان اشىلاتىن كوركەمسۋرەت گالەرەياسىندا قىلقالام شەبەرلەرىنىڭ كورمەسىن وتكىزۋ جانە ىقىلاس دۇكەن ۇلى اتىنداعى قالالىق مادەنيەت ءۇيىنىڭ جانىنان جۇلدىزدار اللەياسىن اشۋ كوزدەلىپ وتىر. الايدا, قۋانا قۇپتارلىق دۇنيە جامبىل وبلىسىنىڭ اكىمى اسقار مىرزاحمەتوۆتىڭ باستاماسىمەن «تاراز مۇرالارى» اتتى كوپتومدىق كىتاپ شىعارۋ ءىسى قولعا الىنعان بولاتىن. ال, بيىل وبلىستىڭ 80 جىلدىعىنا وراي سول كوپتومدىقتىڭ العاشقى 80 تومىن شىعارۋ كوزدەلۋدە ەكەن. «قازىرگى تاڭدا وبلىستىڭ تاريحى مەن تاريحي تۇلعالارىنىڭ شىعارماشىلىعىنا ارنالعان 80 توم كىتاپتىڭ ماتەريالدارى ازىرلەندى. ونىڭ 21 تومى ءوڭىر تاريحىنا ارنالسا, 59 تومى حالىق شىعارماشىلىعى باعىتىندا جارىق كورەتىن بولادى. جيناقتالعان ماتەريالداردىڭ ساپاسى, ءماتىنى, مۇقاباسى, جازىلۋ ءستيلى, سويلەمنىڭ قۇرىلۋى ساراپشىلار توبىمەن تەكسەرىلىپ, 80 توم تولىعىمەن «7Su-Company» باسپاسىنا جىبەرىلدى. باسپا دا ءوز تاراپىنان كىتاپ جارىق كورگەنگە دەيىنگى تۇزەتۋ جۇمىستارىن جۇرگىزىپ, بۇگىنگى كۇنگە 29 توم كىتاپ باسىلىپ جاتىر», دەيدى باسقارما باسشىسى.
جالپى, اۋليەاتا وڭىرىنەن سارباس اقىن, كەنەن ازىرباەۆ, باۋىرجان مومىش ۇلى, شەرحان مۇرتازا, اكىم تارازي جانە وزگە دە كوپتەگەن رۋحاني تۇلعالار شىققان. سونىمەن قاتار شىعىستانۋشى عالىم ءابساتتار دەربىسالىنىڭ مالىمدەۋىنشە, تاراز توپىراعىنان تالاي عۇلاما تارازيلەر وتكەن ەكەن. وسىنداي تاريحي تۇلعالاردىڭ مۇرالارى دا بولاشاقتا كىتاپ بولىپ باسىلىپ, ۇرپاق يگىلىگىنە جارايدى دەگەن سەنىم بار.
