سەناتور ميحايل بورتنيك زاڭ جوباسى مەملەكەتتىك قىزمەت كورسەتۋدى جەتىلدىرۋ ماقساتىندا ازىرلەنگەنىن اتاپ ءوتتى.
«قارالىپ وتىرعان زاڭ جوباسى جەكە جانە زاڭدى تۇلعالارعا مەملەكەتتىك قىزمەتتەردى الۋدى وڭايلاتۋ بويىنشا مەملەكەت ساياساتىن جۇزەگە اسىرۋدى قامتاماسىز ەتەدى», - دەدى سەناتور.
سونداي-اق قازاقستان رەسپۋبليكاسىنىڭ تىزىلىمىندە قاراستىرىلعان مەملەكەتتىك قىزمەتتەر سانى ۇنەمى ءوسىپ كەلە جاتقانى ايتىلدى. 2007 جىلدان باستاپ 2019 جىلعا دەيىن بۇل تىزىمدە 740 قىزمەت كورسەتىلگەن, بۇل قىزمەتتەردىڭ 72% ەلەكتروندىق تۇردە كورسەتىلەدى. بۇل جۇيەنى ودان ءارى جەتىلدىرۋ ءۇشىن دەپۋتاتتار توبى 47 زاڭنامالىق اكتىگە تۇزەتۋلەر ازىرلەپ, ەنگىزەتىن بولادى.
زاڭ جوباسىمەن مەملەكەتتىك ورگانداردىڭ ەلەكتروندىق سيپاتتاعى مەملەكەتتىك جاڭا قىزمەتتەردى كورسەتۋ جونىندەگى قۇزىرەتى تولىقتىرىلادى. مەملەكەتتىك الەۋمەتتىك جاردەماقىلار تاعايىنداۋ كەزىندەگى مەملەكەتتىك قىزمەت كورسەتۋ راسىمدەرى ناقتىلانادى, سونداي-اق ازاماتتىق حال اكتىلەرىن مەملەكەتتىك تىركەۋ, زاڭدى تۇلعالاردى تىركەۋ جانە فيليالدار مەن وكىلدىكتەردى ەسەپتىك تىركەۋ قىزمەتتەرى وڭتايلاندىرىلادى.
ودان باسقا, بانك جانە ساقتاندىرۋ قىزمەتتەرى سۋبەكتىلەرىنە, كرەديتتىك بيۋروعا رۇقسات بەرۋ ءتارتىبى مەن مەرزىمدەرىن, سونداي-اق اكتسيالار شىعارىلىمىن تىركەۋ كەزىندە مەملەكەتتىك قىزمەت كورسەتۋ راسىمدەرىن وڭتايلاندىرۋ ۇسىنىلادى.
وتىرىس قورىتىندىسى بويىنشا زاڭ جوباسى سەناتتىڭ قاراۋىنا جىبەرىلدى.
