ەلىمىزدىڭ شەكارالىق ايماقتارىندا حالىق سانىنىڭ جىل سايىن ازايىپ, مەكتەپتەردىڭ جابىلىپ جاتقانىن, مەملەكەت تاراپىنان شۇعىل شارالار قابىلدانباسا شەكارا بويىنا يەن قالۋ قاۋپى ءتونىپ تۇرعاندىعىن گازەتىمىز بۇعان دەيىن بىرنەشە مارتە كوتەرگەن ەدى. جاقىندا مەملەكەت باسشىسى قاسىم-جومارت توقاەۆ شىعىس قازاقستاننىڭ شەكارالىق ايماعىندا ورىن تەپكەن مىڭنان استام تۇرعىنى بار كۇرشىم اۋدانىنىڭ ەڭ وزەكتى ماسەلەسىنە نازار اۋدارىپ, ۇكىمەتكە وبلىس اكىمدىگىمەن بىرگە بۇقتىرما سۋ قويماسىنا كوپىر سالۋ ءۇشىن قارجى ءبولۋ ماسەلەسىن قاراستىرۋدى تاپسىرعان بولاتىن.
شىرايلى ولكە, شۇرايلى مەكەن شىعىس قازاقستاننىڭ كۇرشىم-مارقاكول, كاتونقاراعاي وڭىرلەرىندە سوڭعى 30 جىل مۇعدارىندا حالىق سانى ەكى-ءۇش ەسەگە دەيىن ازايىپ كەتكەنى كوپشىلىككە بەلگىلى. وسى رەتتە كەزىندە تاراپ كەتكەن اۋدانداردى قايتا قالپىنا كەلتىرۋ جونىندە جەرگىلىكتى تۇرعىندار تاراپىنان از ۇسىنىستار ايتىلىپ جۇرگەن جوق. مۇنداي ۇسىنىس كەشە, 28 قازاندا كۇرشىمدىك-مارقاكولدىك اقساقالداردىڭ وبلىس اكىمى دانيال احمەتوۆپەن كەزدەسۋى كەزىندە دە ايتىلعانىمەن ايماق باسشىسى شەكارالىق اۋداندى دامىتۋعا قاتىستى ءوز جوسپارىن فەيسبۋك جەلىسىندەگى پاراقشاسى ارقىلى جەتكىزدى.
«قازىرگى تاڭدا جىل سايىن تۇرعىندارىنىڭ سانى ازايىپ بارا جاتقان شەكارا ماڭىنداعى اۋىلداردىڭ ماسەلەسى وتە وزەكتى ەكەنى بەلگىلى. بۇل جاعداي تارباعاتاي, كاتونقاراعاي اۋداندارىنا دا قاتىستى. بولاشاعى جوق اۋىلدار قاتارى, اسىرەسە, كۇرشىم اۋدانىندا كوپ. اقساقالدار مارقاكول اۋدانىن قايتا قۇرۋدى ۇسىندى. الايدا ول ءۇشىن 9 ملرد.تەڭگە قاجەت. سوندىقتان اۋداندى قالپىنا كەلتىرگەننەن بۇرىن بۇل قاراجاتتى تۇرعىنداردىڭ ءومىر ساپاسىن جاقسارتۋعا جۇمساعان ابزال. ءبىر ايدىڭ ىشىندە ءبىز كۇرشىم اۋدانىنىڭ شەكارا ماڭىنداعى اۋىلدىق وكرۋگتەرىن دامىتۋعا باعىتتالعان بەسجىلدىق باعدارلاما جاسايمىز. ونى اۋدان تۇرعىندارى مەن اقساقالداردىڭ الدىندا قورعايمىز. جوسپارعا ينفراقۇرىلىمدى قالپىنا كەلتىرۋ, اۋىلشارۋاشىلىق, كاسىپكەرلىك, ءبىلىم مەن دەنساۋلىق سالالارىن دامىتۋ جۇمىستارى كىرەدى. سونداي-اق, جاڭا جۇمىس ورىندارى اشىلادى» دەگەن وبلىس باسشىسى جاقىن ارادا ەل ۇكىمەتىندە بۇقتىرما سۋ قويماسى ارقىلى وتەتىن جاڭا كوپىردىڭ قۇرىلىسىنا قاجەتتى بيۋدجەتتى قورعاۋ جوسپارى تۇرعانىن دا تىلگە تيەك ەتتى.
وسكەمەن
