اتالعان ءىس-شارانى اقپارات جانە قوعامدىق دامۋ مينيسترلىگىنىڭ قولداۋىمەن «رۋحاني جاڭعىرۋ» قازاقستاندىق قوعامدىق دامۋ ينستيتۋتى جانە م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى بىرلەسىپ ۇيىمداستىردى. دوڭگەلەك ۇستەلدى سولتۇستىك قازاقستان مەملەكەتتىك ۋنيۆەرسيتەتىنىڭ پرورەكتورى, تاريح عىلىمدارىنىڭ دوكتورى, پروفەسسور اقمارال ىبىراەۆا قىسقاشا سوزبەن اشتى. ول قازاقستانداعى ەتنوسارالىق قاتىناستىڭ تاريحىنا قىسقاشا شولۋ جاساپ, قازاقستاندىقتاردى ءبىر ۇلت بولىپ ۇيىستىرۋدا بىرەگەي ينستيتۋت بولعان قازاقستان حالقى اسسامبلەياسىنىڭ ايرىقشا ءرولىن اتاپ ءوتتى. سونىمەن بىرگە قازاقستاندىقتاردى بىرىكتىرۋدە ەڭبەك سىڭىرگەن ەتنوس وكىلدەرىنىڭ دە كوپ ەكەنىن, سونىڭ ءبىرى نەمىس حالقىنىڭ وكىلى, جازۋشى, اۋدارماشى گەرولد بەلگەر ەكەنىن اتاي كەلىپ, وسى شاراعا قاتىسۋشىلار تۇستەن كەيىن وسىناۋ اتاقتى جەرلەسىمىزدىڭ 85 جىلدىعىنا ارنالاتىن مەرەكەلىك شاراعا قاتىساتىندارىن دا ەسكەرتتى.
العاشقى بولىپ ءسوز العان «رۋحاني جاڭعىرۋ» قوعامدىق دامۋ ينستيتۋتى باسقارما توراعاسىنىڭ ورىنباسارى روزا كارىپجانوۆا وسىنداي ءىس-شارانىڭ باسقا جەرلەردە دە وتكىزىپ جاتقانىن جانە ونىڭ باستى ماقساتى – مادەنيەت, ءبىلىم بەرۋ جانە عىلىم سالالارىندا ۇلكەن قىزمەتتەر اتقارىپ, ەلىمىزدىڭ دامۋىنا ەلەۋلى ۇلەس قوسقان قازاقستاندىق ەتنوستار وكىلدەرىنىڭ ورتاق ەلەكتروندى مالىمەتتەر بازاسىن قۇرۋ بويىنشا پىكىر الماسۋ جانە ۇسىنىستار ازىرلەۋ ەكەنىن اتاپ ءوتتى. سونىمەن بىرگە ول بۇگىنگى ديالوگ الاڭىنا نۇر-سۇلتان, پەتروپاۆل, قاراعاندى, قوستاناي, كوكشەتاۋ قالالارىنان تاريحشى, ەتنوگراف عالىمدار, ەتنوسارالىق قاتىناستار سالاسىنىڭ جەتەكشى ماماندارى, سونداي-اق ەتنومادەني بىرلەستىكتەرىنىڭ وكىلدەرى قاتىسىپ وتىرعانىن جەتكىزدى.
مەملەكەت تاريحى ينستيتۋتى ديرەكتورىنىڭ ورىنباسارى, تاريح عىلىمدارىنىڭ كانديداتى, دوتسەنت امانگەلدى قاشقىنباەۆ ءوز ۇجىمدارىنىڭ «رۋحاني جاڭعىرۋ» جالپىۇلتتىق جوباسى اياسىنداعى وزەكتى زەرتتەۋ تاقىرىپتارى» تۋرالى بايانداما جاساپ, ولاردىڭ ماڭىزدىلىعىنا نازار اۋداردى. ينستيتۋت قابىرعاسىنان شىققان زەرتتەۋ ەڭبەكتەردىڭ اراسىندا قازاقستاندىق عۇلاما تاريحشى ە.بەكماحانوۆتى قورعاعان اكادەميك اننا پانكراتوۆا جايلى دا ەڭبەك جازىلعانىن اتاپ ءوتىپ, ونىڭ قازاقستاندىق تاريح عىلىمىنا قوسقان زور ۇلەسى تۋرالى ايتتى. سونىمەن بىرگە عالىم «رۋحاني جاڭعىرۋ» باعدارلاماسىنىڭ شەڭبەرىندە دە كوپ ەڭبەكتەر جازىلعانىن جەتكىزدى.
ال الماتىداعى ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جەتەكشى عىلىمي قىزمەتكەرى, تاريح عىلىمدارىنىڭ كانديداتى التىن ۋالتاەۆا «قازاقستان حالقى» ينتەراكتيۆتى عىلىمي تاريحي كارتاسىن تانىستىردى.
كەلەسى بولىپ ءسوز العان قازاقستان حالقى اسسامبلەياسى توراعاسىنىڭ ورىنباسارى شەرزود پۋلاتوۆ نۇر-سۇلتان قالالىق قحا-نىڭ قىزمەتىندەگى تەندەنتسيالارعا توقتالىپ, كوپتەگەن تاجىريبەلەرىن ورتاعا سالدى. ال پرەزيدەنت مۇراعاتىنىڭ باس ساراپشىسى ەۆگەنيا چيليكوۆا «قازاقستاننىڭ كورنەكتى تۇلعالارىنىڭ ءومىرى مەن شىعارماشىلىعىن زەرتتەۋدەگى مۇراعاتتاردىڭ ءرولى» دەگەن تاقىرىپتا بايانداما جاسادى. قاراعاندى وبلىسى مەملەكەتتىك مۇراعاتىنىڭ ديرەكتورى, تاريح عىلىمدارىنىڭ كانديداتى جاڭاگۇل تۇرسىنوۆا «قاراعاندى وبلىسىنىڭ مەملەكەتتىك مۇراعاتى قورلارىنداعى بەلگىلى عالىمدار تۋرالى قۇجاتتار» دەگەن تاقىرىپتا سويلەپ, تىڭداۋشىلارعا تىڭ دەرەكتەر ۇسىندى.
سولتۇستىك قازاقستان وبلىستىق مەملەكەتتىك مۇراعاتىنىڭ ديرەكتورى, تاريح عىلىمدارىنىڭ كانديداتى ساۋلە مالىكوۆا «سولتۇستىك قازاقستان وبلىسىنىڭ تانىمال جەرلەستەرى» دەگەن تاقىرىپتا بايانداما جاساپ, وبلىس وڭىرىندە تۋىپ, قازاقستاننىڭ الەمگە تانىلۋىنا, ەكونوميكالىق دامۋىنا, مادەني وركەندەۋىنە ۇلەس قوسقان ەتنوس وكىلدەرىن اتاپ ءوتتى. سونىڭ ىشىندە وليمپيادا چەمپيونى ۆ.ۆينوكۋروۆ, جازۋشى يۆان شۋحوۆ جانە ت.ب. ايتىلدى.
ال ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى قادىرجان ابۋەۆ «اقمولا وبلىسىنىڭ تاريحى مەن مادەنيەتىنىڭ قايراتكەرلەرى» اتتى مونوگرافيانىڭ تانىستىرىلىمىن وتكىزدى.
بۇلاردان باسقا دا ءبىرشاما قىزىقتى باياندامالار تىڭدالىپ, دوڭگەلەك ۇستەل سوڭىنان قازاقستان ەتنوستارىنىڭ ەلىمىزدىڭ تاريحي-مادەني دامۋىنا قوسقان ۇلەستەرى زور ەكەنىن قامتىعان قارار قابىلداندى. ال تۇستەن كەيىن قوناقتار اتاقتى جەرلەسىمىز, بارلىق قازاق «گەر-اعاڭ» دەپ اتاپ كەتكەن گ.بەلگەردىڭ 85 جىلدىعىنا ارنالعان رەسپۋبليكالىق عىلىمي-تاجىيبەلىك كونفەرەنتسياعا قاتىستى. وندا الدىمەن «گەرولد بەلگەر تاعدىرىنىڭ جولدارى» اتتى دەرەكتى فيلم كورسەتىلدى. ال بايانداما جاساعاندار گەر-اعاڭنىڭ قازاق ادەبيەتى مەن ونەرىنىڭ دامۋىنا ۇلەس قوسقان ەڭبەكتەرى مەن اۋدارمالارى تۋرالى كەڭىنەن اڭگىمەلەپ, باسقا دا كورنەكتى ەتنوستار وكىلى قاتارىندا ونىڭ ورنى ايرىقشا ەكەندىگىن تىلگە تيەك ەتتى.
پەتروپاۆل
