ورتالىق جۇمىسى شامامەن ءبىر جىلدان كەيىن باستالۋعا ءتيىس. بۇل كاۆكاز, ورتالىق ازيا جانە موڭعوليا ايماعىندا توعىز مۇشە مەملەكەتكە الەۋەتتى دامىتۋ بويىنشا قىزمەت كورسەتەدى. سونداي-اق فيسكالدىق ساياسات, ورتالىق بانك وپەراتسيالارى, قارجى سەكتورىن قاداعالاۋ جانە ماكروەكونوميكالىق ستاتيستيكا قامتىلادى دەپ كۇتىلۋدە.
«ورنالاساتىن جەردى تاڭداۋ بارىسىندا كوپتەگەن سالالاردى, سونىڭ ىشىندە قارجىلىق قولداۋدى, رەيستەردىڭ توعىسۋ مۇمكىندىگى مەن كەڭ اكىمشىلىك جانە لوگيستيكالىق باعىتتاردى قامتيتىن ماسەلەلەر مەن ۇسىنىستاردى نازارعا الدىق. ءبىز گرۋزيا, قازاقستان جانە وزبەكستان بيلىكتەرىنە ورتالىق اشۋعا ۇسىنىس جاساعانى ءۇشىن العىس ايتامىز», دەدى ك.گراسسو.
RTAK حالىقارالىق ۆاليۋتا قورىنىڭ قىزمەتىن ايماقتا جوسپارلاۋ, ۇيلەستىرۋ جانە ىسكە اسىرۋمەن اينالىسادى. ول حۆق-نىڭ باسقا دا ورتالىقتارىنىڭ تاجىريبەسىنە سۇيەنەدى.
جۋىردا ۇلتتىق بانك توراعاسى ەربولات دوساەۆ جۇمىس ساپارىمەن ۆاشينگتونعا بارىپ, حۆق-نىڭ جاڭا باسقارۋشى ديرەكتورى كريستالينا گەورگيەۆامەن كەزدەسكەن بولاتىن. كەزدەسۋدە الماتىدا جاڭا ايماقتىق تەحنيكالىق كومەك ورتالىعىن اشۋ تۋرالى كەلىسىمدەردى ىسكە اسىرۋدىڭ تەتىكتەرى جانە ماماندارمەن قامتاماسىز ەتۋ ماسەلەسى تالقىلاندى. الدىن الا قول جەتكەن كەلىسىمدەر بويىنشا الماتىداعى ورتالىقتا قازاقستاندىق ماماندار دا شتاتتىق جۇيەدە جۇمىس ىستەيدى.
ەكونوميست ولجاس تولەۋوۆ RTAK-تىڭ اشىلۋى ۇلتتىق بانك ءۇشىن عانا ەمەس, مەملەكەتتىڭ ەكونوميكالىق جانە قارجىلىق ساياساتى ءۇشىن دە جاعىمدى جاڭالىق ەكەنىن ايتادى. سەبەبى ۇلتتىق بانك پەن ۇكىمەتتىڭ ەكونوميكالىق بلوگى مونەتارلى جانە فيسكالدى ساياسات بويىنشا حالىقارالىق ساراپتامانىڭ كومەگىنە جۇگىنۋگە مۇمكىندىك الادى.
«بۇل ەلىمىزدە ينۆەستيتسيالىق احۋالدى جاقسارتاتىن قوسىمشا فاكتور بولادى. سونداي-اق الماتىنىڭ بيزنەس ورتالىق رەتىندەگى ايماقتاعى ءرولىن كۇشەيتەدى» دەدى و.تولەۋوۆ.
وزبەكستان پرەزيدەنتى شاۆكات ميرزيوەۆتىڭ جۇرگىزگەن رەفورمالارى مەن بارىنشا اشىق بولۋعا ۇمتىلۋىنا قاراپ بىرقاتار ساراپشىلار جاڭادان اشىلاتىن نەمەسە بۇرىننان بار حالىقارالىق قاۋىمداستىقتاردىڭ وكىلدىكتەرى, حالىقارالىق ينستيتۋتتار مەن كومپانيالار كوش باسىن وزبەكستانعا قاراپ تۇزەيدى دەگەن پىكىر بىلدىرگەن ەدى. الايدا حۆق تاڭداۋى ساراپشىلاردىڭ بولجامىنا تاۋەلدى ەمەس ەكەنى بايقالدى. ەندى ساراپشىلار حۆق-عا مۇشە مەملەكەتتەر مەن اگەنتتىكتەر الماتىدا جاڭادان اشىلعان ورتالىققا قولداۋ كورسەتەدى دەپ ۇمىتتەنىپ وتىر.
الماتى
