سۋرەتتى تۇسىرگەن: رافحات حالەلوۆ
ەكى كۇنگە سوزىلعان انشىلەر كونكۋرسى ەكى كەزەڭنەن تۇردى. العاشقى تۋردا قاتىسۋشىلار باتىس ەۋروپا كومپوزيتورلاردىڭ اريالارىن شىرقاسا, ەكىنشى كەزەڭدە قازاقستان كومپوزيتورلار وداعىنىڭ مۇشەسى, ءانشى-كومپوزيتور ءاشىر مولداعايىنوۆتىڭ شىعارمالارىن ورىندادى.
ماحامبەت ۋنيۆەرسيتەتتىڭ وقۋ-ادىستەمەلىك جۇمىس جونىندەگى پرورەكتورى اسەت تاسماعامبەتوۆتىڭ ايتۋىنشا, جاس انشىلەردىڭ تالانتىن ۇشتاۋعا باعىتتالعان بۇل ونەر سايىسى وسى وقۋ ورنىنىڭ وقىتۋشىسى, دوتسەنت, قازاقستان رەسپۋبليكاسىنىڭ ەڭبەك سىڭىرگەن ءارتىسى جۇماعانىم راحيموۆانىڭ 65 جاس مەرەيتويىنا دا ارنالىپ وتىر ەكەن. «Nur Otan» پارتياسى ورال قالالىق فيليالى توراعاسىنىڭ ءبىرىنشى ورىنباسارى كەنەسارى نۇرشا كەش يەسىن مەرەيلى مەرەكەسىمەن قۇتتىقتادى.
الەم مويىنداعان اقسۇيەك ونەر – كلاسسيكالىق ۆوكالدىق مۋزىكانى كەڭىنەن ناسيحاتتاۋ ماقساتىندا وتكەن كونكۋرستا نۇر-سۇلتان قالاسىنان كەلگەن جاس ءانشى, استانا ونەر اكادەمياسىنىڭ 4 كۋرس ستۋدەنتى ءالىش بەيبارىس بايقاۋدىڭ گران-پري جۇلدەسىنە يە بولدى.
قۇرامىندا قازاقستان رەسپۋبليكاسىنىڭ ەڭبەك سىڭىرگەن ءارتىسى جۇماعانىم راحيموۆا, نۇر-سۇلتان قالاسىنداعى قازاق ۇلتتىق ونەر ۋنيۆەرسيتەتىنىڭ پروفەسسورى روزا تىلەنشيەۆا, سامارا مەملەكەتتىك مۋزىكا ينستيتۋتىنىڭ پروفەسسورى, رەسەي فەدەراتسياسىنىڭ ەڭبەك سىڭىرگەن ءارتيسى نادەجدا يلۆەس, قازانعاپ اتىنداعى قىزىلوردا مۋزىكالىق كوللەدجى جەكە ءان سالۋ كافەدراسىنىڭ مەڭگەرۋشىسى ف.ارعىنباەۆا جانە باسقالارى كىرگەن قازىلار القاسى وزگە قاتىسۋشىلاردى دا ماراپاتسىز قالدىرمادى. بايقاۋدىڭ 1 ورىن جۇلدەسىن الماتى كونسەرۆاتورياسىنىڭ 2 كۋرس ستۋدەنتى ءازيزا ءابدىرايىم مەن استانالىق جاس ماگيستر التىنبەك ءابىلدا ەنشىلەدى. ال ايبەك حايروللا, تالعات اللابيرينوۆ, نۇراي قابىلوۆا سىندى انشىلەردىڭ ونەرى ءىى ورىنعا لايىق دەپ باعالاندى. جۇلدەلى ءىىى ورىن ءنۇرسات الماس, ءمادينا بيتيموۆا, نۇرجاينار ءابىلحايىروۆا, اقبوتا مولداعايىنوۆالارعا بۇيىردى.
سونداي-اق قىزىلوردالىق سالتانات مۇراتقىزى مەن نۇر-سۇلتاندىق كارينا ناجمەددينوۆاعا ج.راحيموۆا اتىنداعى ارنايى جۇلدە مەن ديپلوم, نۇر-سۇلتاندىق ايبەك اللابيرينوۆ پەن ميراس ابديعا ءا.مولداعايىنوۆ اتىنداعى ارنايى جۇلدە مەن ديپلوم, قىزىلوردالىق دياس ومار مەن چينگيس بوزوۆقا «ۆوكال اكادەمياسى» رەسپۋبليكالىق قوعامدىق بىرلەستىگى اتىنان ارنايى جۇلدە تابىستالدى.
وسى كۇندەرى ءانشى جۇماعانىم راحيموۆانىڭ مەرەيتويى اياسىندا «مادەنيەت, ونەر جانە ءبىلىم سالاسىنداعى پەداگوگيكالىق تاجىريبە مەن يننوۆاتسيا» اتتى حالىقارالىق عىلىمي-پراكتيكالىق كونفەرەنتسيا دا ءوتتى. رەسەيدەن جانە قازاقستاننىڭ ءار تۇكپىرىنەن كەلگەن عالىمدار, ۆوكالدىق ءان ونەرى سالاسىنىڭ ماماندارى ءوز تاجىريبەلەرىمەن ءبولىسىپ, ءوزارا پىكىر الماستى. كونفەرەنتسياعا كەلىپ تۇسكەن 83 اۆتوردىڭ عىلىمي بايانداماسى ارنايى جيناق بولىپ جارىق كوردى.
