ەۋروپا كەڭەسىنە مۇشە 47 مەملەكەتتىڭ, ارىپتەس جانە بايقاۋشى ەلدەردىڭ پارلامەنتتەرىنىڭ باسشىلارى, سونداي-اق بىرقاتار حالىقارالىق پارلامەنتتىك اسسامبلەيالاردىڭ باسشىلارى قاتىسقان فورۋم ەۋروپا كەڭەسىنىڭ قۇرىلعانىنا 70 جىل تولۋىنا ارنالدى. كۇن ءتارتىبى بويىنشا ورتاق ەۋروپالىق ءۇيدىڭ قالىپتاسۋى مەن دامۋى, پارلامەنتتەردىڭ ورنىقتى دامۋ ماقساتتارىنا قوسقان ۇلەسى, سونداي-اق گەندەرلىك تەڭدىك ماسەلەلەرى بويىنشا پىكىرسايىس بولدى.
ا.شاكىروۆ ستراسبۋرگتە بولعان كەزدە ەكپا توراعاسى ليليان موري پاسكەمەن كەلىسسوز جۇرگىزدى. تاراپتار قازاقستاننىڭ وسى ۇيىممەن ءوزارا ءىس-قيمىل جاساۋداعى ءوزارا تۇسىنىستىك پەن سەنىمدى اتاپ ءوتتى. ەكىجاقتى ءوزارا ءىس-قيمىلدىڭ ءىس جۇزىندەگى پارمەندى مىسالدارىنىڭ ءبىرى رەتىندە ۆەنەتسيا كوميسسياسىمەن ءتيىمدى ىنتىماقتاستىق, سونداي-اق ەلىمىزدىڭ GRECO-عا كىرۋى (سىبايلاس جەمقورلىققا قارسى ءىس-قيمىل جاساۋ جونىندەگى مەملەكەتتەردىڭ توپتارى) اتالىپ ءوتىلدى.
ليليان موري پاسكە نۇر-سۇلتان قالاسىندا ەۋروپا كەڭەسىنىڭ ورتالىق ازيا ەلدەرىنە ارنالعان ايماقتىق وكىلدىگىنىڭ اشىلۋىن قولدايتىنىن جەتكىزدى.
توراعا ورىنباسارى سونداي-اق بەلگيا كورولدىگى وكىلدەرى پالاتاسى توراعاسىنىڭ ورىنباسارى ا.فلاومەن كەلىسسوز وتكىزدى, كەلىسسوز بارىسىندا ەكىجاقتى ساۋدا-ەكونوميكا جانە ينۆەستيتسيا سالالارىنداعى ىنتىماقتاستىقتىڭ قارقىندى دامۋى تۋرالى ايتىلدى. بەلگيا پارلامەنتشىلەرى تاياۋ ۋاقىتتا قازاقستان-بەلگيا دوستىعى پارلامەنتارالىق توبىنىڭ سايلاۋدان كەيىنگى جاڭا بەلگيالىق قۇرامى قۇرىلاتىنىن حابارلادى. تاراپتار بۇل تۇرعىدا قازاقستان رەسپۋبليكاسى مەن ەۋروپا وداعى اراسىنداعى كەڭەيتىلگەن ارىپتەستىك تۋرالى كەلىسىمنىڭ كۇشىنە ەنۋى اياسىندا مەملەكەتتەردىڭ زاڭ شىعارۋشى ورگاندارىنىڭ ءوزارا ءتيىمدى ءىس-قيمىلىنىڭ ماڭىزدى ەكەنىن اتاپ ءوتتى.
پارلامەنتارالىق وداقتىڭ توراعاسى گابريەللا كۋەۆاس باررونمەن دە كەزدەسۋ بولدى. كەزدەسۋ بارىسىندا الداعى 2020 جىلى نۇر-سۇلتان قالاسىندا وتەتىن دۇنيەجۇزىلىك ساۋدا ۇيىمى پارلامەنتتىك كونفەرەنتسياسىنىڭ ماسەلەلەرى تالقىلاندى. پارلامەنتارالىق وداقتىڭ باسشىسى وسى شارانىڭ قازاقستاندا وتۋىنە العىسىن ءبىلدىردى.
فورۋم الاڭىندا قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى ەقىۇ پارلامەنتتىك اسسامبلەياسىنىڭ توراعاسى گەورگي تسەرەتەليمەن, ازەربايجاننىڭ, تۇركيانىڭ, كيپردىڭ, ليحتەنشتەيننىڭ جانە شۆەتسيانىڭ, ەۋروپا كەڭەسىنىڭ جانىنداعى ديپلوماتيالىق ميسسيانىڭ دەلەگاتسيالارىنىڭ باسشىلارىمەن دە كەزدەستى.
پارلامەنت توراعالارىنىڭ ءبىرىنشى ەۋروپالىق كونفەرەنتسياسى 1975 جىلى وتكەن بولاتىن. بۇل شارا ەكى جىلدا ءبىر رەت, كەزەكپەن ستراسبۋرگتە جانە ەۋروپا كەڭەسىنە مۇشە مەملەكەتتەردىڭ ءبىرىنىڭ استاناسىندا وتەدى.
