وسى ايتۋلى جوبا اياسىندا شىمكەنت قالاسىنداعى مەكتەپتەردىڭ 6-10-سىنىپ وقۋشىلارى اراسىندا رەسپۋبليكالىق «تۇلپار ءمىنىپ, تۋ العان!» بايقاۋى وتەدى. بۇل تۋرالى قالالىق اكىمدىكتىڭ اقپاراتتىق-كوممۋنيكاتسيا ورتالىعىندا وتكەن ءباسپاسوز بريفينگىندە ايتىلدى.
بايقاۋ قارساڭىندا شىمكەنت قالاسىنداعى س.ەرۋباەۆ اتىنداعى №24 مەكتەپ-ليتسەيدە «تۇلپار ءمىنىپ, تۋ العان!» بايقاۋىنىڭ تانىستىرىلىمى بولدى. جيىنعا قالا مەكتەپتەرىنىڭ قازاق ادەبيەتى ءپانىنىڭ مۇعالىمدەرى مەن سايىس ۇمىتكەرلەرى قاتىستى. بۇگىندە اتالعان دودادا باق سىناۋعا قالاداعى 116 مەكتەپتەن 1094 وقۋشى, 610 مۇعالىم نيەت بىلدىرگەن. بايقاۋدىڭ اۋداندىق ىرىكتەۋ كەزەڭدەرى 28-31 قازان ارالىعىندا, قالالىق كەزەڭ 6 قاراشا كۇنى وتەدى دەپ جوسپارلانۋدا.
«قاتىسۋشىلار جىردى تولىق جاتتاپ, كونەرگەن سوزدەردىڭ ماعىناسىن ءتۇسىندىرۋى ءتيىس. سونداي-اق ادەبيەت پانىنەن قويىلاتىن سۇراقتارعا جاۋاپ بەرەدى. قالالىق كەزەڭدە 4 اۋداننان 3 وقۋشىدان ىرىكتەلىپ, 12 قاتىسۋشى باق سىنايدى. بيىل «تۇلپار ءمىنىپ, تۋ العان» بايقاۋىندا وقۋشىلار 132 بەت, 5206 جولدان تۇراتىن «قوبىلاندى باتىر» جىرىنىڭ ماراباي جىراۋ نۇسقاسىن جاتقا ايتپاق. ءىس-شارانىڭ تانىستىرىلىمىنا كەلگەن ۇمىتكەرلەردىڭ اراسىنان 100 بەتكە دەيىن جاتتاعان وقۋشىلار ىرىكتەلىپ, دايىندىعى پىسىقتالدى», دەدى «Qazaq Epos» قوعامدىق قورىنىڭ شىمكەنت قالاسى بويىنشا ۇيىمداستىرۋ كوميتەتىنىڭ جەتەكشىسى كەنجەباي نۇرداۋلەت.
بيىل جوبا رەسپۋبليكالىق اۋقىمدا وتۋدە. جەڭىمپاز 1 ميلليون تەڭگە جۇلدەگە يە بولادى. 2-ورىنعا – 600 مىڭ, ال 3-ورىنعا 300 مىڭ تەڭگە بەرىلەدى.
وسكەلەڭ ۇرپاقتى حالىق پوەزياسىنا, قازاق حالقىنىڭ رۋحاني اسىل مۇراسىنا دەگەن سۇيىسپەنشىلىككە جانە پاتريوتيزمگە تاربيەلەۋگە شاقىراتىن بايقاۋعا نيەت بىلدىرگەن جاس وسكىندەردىڭ قاتارى جىل وتكەن سايىن ارتىپ كەلەدى. جاس بۋىندى ەلدىك پەن ەرلىك رۋحقا, نامىسشىلدىق, قايسارلىق قاسيەتتەرگە باۋلۋ كەرەك دەيدى ۇيىمداستىرۋشىلار.
شىمكەنت
