قۇزىرلى ورگانداردىڭ حابارلاۋىنشا, جۇك ماشيناسى ۇلىبريتانياعا زەبريۋگگە دەپ اتالاتىن بەلگيا پورتىنان كەلگەن. كولىك جۇرگىزۋشىسى – 25 جاستاعى سولتۇستىك يرلانديا ازاماتى كىسى ءولتىردى دەگەن كۇدىكپەن ۇستالدى. بريتانيا اقپارات قۇرالدارىنىڭ جازۋىنشا, جۇرگىزۋشى مۇردەلەردى كورگەن بويدا پوليتسياعا حابارلاسقان. بۇگىندە قۇقىق قورعاۋ ورگاندارى ەۋروپادان زاڭسىز جۇمىسشى تاسيتىن توپتاردىڭ دا قىلمىسقا قاتىسى بار-جوعىن انىقتاپ جاتىر. جۇك كولىكتەرىنىڭ جۇرگىزۋشىلەرى سوڭعى ايالداماعا كەلگەنشە جۇك تيەلگەن كونتەينەرلەردى اشىپ قاراۋعا قۇقىعى جوعىن ايتادى. بۇل مالىمدەمەنى بەلگياداعى بريۋگگە قالاسىنىڭ باسشىسى دا قولدادى. «كۇن سايىن ءبىزدىڭ پورتقا 4 مىڭعا جۋىق ماشينا كەلەدى. ءار كولىكتەگى جۇكتى تەكسەرەتىن بولساق, كەزەكتىڭ سوڭى بريۋسسەلگە دەيىن جەتەر ەدى», دەدى ديرك دە فاۋ.
بريتانيا اقپارات قۇرالدارىنىڭ بولجامىنا سۇيەنسەك, ادەتتە قىتايدان كەلەتىن ازاماتتاردى ۇلىبريتانياعا كۇشتەپ الىپ كەلەدى ەكەن. ولاردىڭ كوبى ەۋروپالىق قىلمىستىق توپتاردىڭ قولىنا قۇمار ويىن ءۇشىن العان قارىزدارىن وتەمەگەننەن تۇسەتىن كورىنەدى.
بۇل وقيعا ۇلىبريتانيا پرەمەر-ءمينيسترى بوريس دجونسوننىڭ باقىلاۋىندا. ول مارقۇمداردىڭ جاقىندارىنا كوڭىل ايتىپ, ەسسەكس پوليتسياسىمەن بىرلەسىپ ءىستىڭ انىق-قانىعىنا جەتەتىنىن حابارلادى. ازىرگە كولىكتىڭ بولگاريادا يرلانديا ازاماتىنا تيەسىلى كومپانيا اتىنا تىركەلگەنى ءمالىم بولدى.
كولىك جۇرگىزۋشىلەرى اسسوتسياتسياسىنىڭ اتقارۋشى ديرەكتورى ريچارد بەرنەتت جۇك تاسۋعا ارنالعان كولىكتەردەگى اۋا تەمپەراتۋراسى ادەتتە -25°س-گە دەيىن باراتىنىن ايتتى. «ماشينالار ادامدار ءۇشىن مۇلدە قولايسىز», دەدى ول ۆۆس-گە بەرگەن سۇحباتىندا. ال ەسسەكس پوليتسيا باسشىسىنىڭ ورىنباسارى پيپپا ءميلليستىڭ ايتۋىنشا, قازا تاپقاندار تۋرالى ناقتى اقپاراتقا قول جەتكىزۋ ۇزاققا سوزىلۋى مۇمكىن. «ازىرگە قازا تاپقانداردىڭ 8-ءى ايەل, 31-ءى ەركەك ەكەنى ءمالىم. وعان قوسا ولاردىڭ بىرەۋى كامەلەتتىك جاسقا تولماعان. پوليتسيا ءتيىستى جۇمىستاردى جۇرگىزۋ ۇستىندە. زەرتحانا قىزمەتكەرلەرى ءار ءمايىتتى جەكە قاراپ جاتىر. سوندىقتان ءبىراز كۇتۋگە تۋرا كەلىپ تۇر. تۇتقىندالعان كۇدىكتىنىڭ ۇيىندە جانە تاعى ءبىر ۇيدە ىزدەۋ جۇرگىزىلدى», دەدى پيپپا ميلليس.
