«وسىنداي كەلىسىمدەردى جاساسۋ الەمدىك نارىققا ەكسپورتتى ىلگەرىلەتۋدىڭ ءبىر قۇرالى بولىپ تابىلادى. يرانمەن جاسالعان شارت ءبىزدىڭ تاۋارلار ءۇشىن 80 ملن حالقى بار مەملەكەتتىڭ نارىعىنا قول جەتكىزۋگە جول اشادى. سونىمەن قاتار, يران ءوزارا ساۋدانىڭ نەگىزىن قايتا وڭدەلگەن تاۋارلار قۇرايتىن بىرنەشە ەلدەردىڭ ءبىرى بولىپ تابىلاتىنىن اتاپ وتكەن ءجون», دەدى ەۋرازيالىق ۇكىمەتارالىق كەڭەسى وتىرىسىندا ساۋدا جانە ينتەگراتسيا ۆيتسە-ءمينيسترى جانەل كۋشۋكوۆا.
كەلىسسوزدەر قورىتىندىسى بويىنشا قازاقستاندىق ءونىمنىڭ يران نارىعىنا قول جەتكىزۋ شارتتارىن ەلەۋلى ىرىقتاندىرۋعا قول جەتكىزىلدى. يران دسۇ-عا مۇشە ەمەس ەكەنىن ەسكەرە وتىرىپ, وسى مەملەكەتتىڭ تاريفتىك قورعاۋدىڭ قولدانىستاعى دەڭگەيى ەڭ جوعارعى دەڭگەي بولىپ سانالاتىنىن اتاپ كەتكەن ءجون. كەلىسىم قازاقستان ءۇشىن ەكسپورتتىق قىزىعۋشىلىق تۋدىراتىن بىرقاتار تاۋارلار بويىنشا باج سالىعىن ازايتۋعا نەمەسە اعىمداعى دەڭگەيدە ساقتاۋعا مۇمكىندىك بەرەدى. بۇل رەتتە, ساندىق ماندە يران تاراپى ەڭ كوپ جەڭىلدىكتەر سانىن ۇسىنادى.
كەلىسىمگە سايكەس يران تارابى قازاقستانعا جانە باسقا ەاەو ەلدەرىنە 864 تاۋارعا قاتىستى (ونىڭ ىشىندە, 262 اوك تاۋارلارى, 602 وندىرىستىك تاۋارلار) يمپورت باجدارىن تومەندەتەدى.
يران نارىعىنا سيىر ەتى مەن قوي ەتى (باجدى 26%-دان 5-10%-عا دەيىن تومەندەتۋ), بۇرشاق داقىلدارى (55%-تەن 5-10% دەيىن), وسىمدىك مايى (20%-دان 10% دەيىن), ماكاروندار مەن كونديتەرلىك ونىمدەر (55%-تەن 14-20% دەيىن), بولات يلەگى (20%-دان 15%-دەيىن), رەلستەر (5%-تەن 4% دەيىن), اككۋمۋلياتورلار (32-55%-دان 10% دەيىن), ارماتۋرا, قۇبىر (32%-دان 4%-دەيىن) جانە ت.س.س تاۋارلاردى جەڭىل تاريفتەر بويىنشا جەتكىزۋگە بولادى. اتالعان تاۋارلار قازاقستان ءۇشىن ەكسپورتتىق قىزىعۋشىلىقتى بىلدىرەتىن ءداستۇرلى تاۋارلار بولىپ سانالادى.
اتالعان تاۋارلار بۇگىنگى تاڭدا اعىمداعى قازاقستاندىق ەكسپورتتىڭ جارتىسىنان استام كولەمىن قۇرايدى (292 ملن دوللار نەمەسە 54%).
ءوز كەزەگىندە, ەاەو ەلدەرى 502 تاۋار بويىنشا (126 اوك تاۋارلارى, 376 وندىرىستىك تاۋارلار) يمپورت باجدارىن تومەندەتەدى. بۇل تالشىن, قۇرما, ءىنجىر, مەيىز, كرەۆەتكىلەر, كونديتەرلىك ءونىم, ىدىس, جۋعىش زاتتار, كىلەمدەر, پلاستماسس بۇيىمدارى. ولاردىڭ كوپشىلىگى قازاقستان اۋماعىندا وندىرىلمەۋ سەبەبىنەن, يمپورتتىق قىزىعۋشىلىقتى بىلدىرەتىن تاۋارلار.
كەلىسىمنىڭ قولدانىس مەرزىمى – 3 جىل.
قۇجاتتا ەاەو مەن يران اراسىندا ەركىن ساۋدا ايماعى تۋرالى تۇراقتى كەلىسىم بويىنشا كەلىسسوزدەر جۇرگىزۋ مۇمكىندىگى قاراستىرىلعان.
ايتا كەتكەن ابزال, يرانمەن ءوزارا ساۋدا كولەمى 2018 جىلدىڭ قورىتىندىسى بويىنشا 516,3 ملن دوللاردى قۇرادى, ونىڭ 82,6% (426,7 ملن) ءبىزدىڭ يرانعا ەكسپورتىمىز (يمپورت – 89,5 ملن) بولدى. 2019 جىلدىڭ 8 ايى بويىنشا قازاقستان مەن يران اراسىنداعى تاۋار اينالىمى 226,2 ملن دوللاردى قۇرادى.
