پاۆلودار ساحناسىندا العاش رەت, امەريكالىق بالەت نەگىزىن قالاعان دجوردج ءبالانچيننىڭ «سەرەناداسى» كورسەتىلەدى. سپەكتاكلدىڭ قۇپيا سيۋجەتى تۋرالى سۇراقتاردى توقتاتۋ ءۇشىن, حورەوگرافتىڭ ءوزى پ. چايكوۆسكي مۋزىكاسىنا قويىلعان بالەتىن - «ونىڭ جالعىز عانا سيۋجەتى – سەرەنادا, قالاساڭىز, بۇل – اي استىنداعى» دەپ سيپاتتاعان-تىن. 1934-ءشى جىلى سىنىپتاعى دارىستەرىنىڭ نەگىزىندە «سەرەنادا» بالەتى قويىلعانىن ەستەرىڭىزگە سالامىز. بالەتتەگى بارلىق سيۋجەت يىرىمدەرىن بالانچين وسى سىنىپتاعى دارىستەرىنەن العانىن ايتاتىن: بالەرينانىڭ كەشىگىپ قالۋى, ساحنادا جىعىلۋى جانە ت.ب.
2017 جىلى بالانچين قورىمەن شىعارماشىلىق ىنتىماقتاستىقتا ءارى حورەوگراف ءستيلى مەن تەحنيكاسىنىڭ ستاندارتتارىنا ساي جاسالعان بالەتتىڭ پرەمەراسى نۇر-سۇلتان قالاسىندا ءوتتى. «استانا بالەت» دجوردج بالانچين بالەتتەرىن ساحنالاعان ورتا ازياداعى جالعىز تەاتر.
ەكىنشى بولىمدە, پاۆلودارلىق كورەرمەن نازارىنا برازيليالىق حورەوگراف ريكاردو امارانتەنىڭ - «Love Fear Loss» جانە «A Fuego Lento» اتتى ءبىر اكتىلى بالەتتەرى ۇسىنىلادى.
«Love Fear Loss» (ماحاببات ۇرەي ايىرىلۋ) – ەديت پياف مۋزىكاسىنا قويىلعان, سەزىم ورنەكتەرىنەن ورىلگەن ءۇش دۋەت. ونىڭ ارقايسىسى وسى ۇلى سەزىمنىڭ ءتۇرلى ساتىلارىن سيپاتتايدى: العاش سەزىمگە ەلىتۋ, ەكەۋارا قاتىناستاعى قيىنشىلىقتار, سۇيگەن جانىڭىزدان ايىرىلعان شاقتا بويىڭىزدى كەرنەگەن ۇرەي.
«A Fuego Lento» - «باياۋ جالىن» دەگەن ماعىنا بىلدىرەدى. بۇل – ارگەنتينانىڭ ۇلى كومپوزيتورلارىنىڭ تۋىندىلارى مەن برازيليالىق سامبو ەلەمەنتتەرىنەن ورنەكتەلگەن بالەت. ىشكى قۋاتى مەن حاريزماسىنىڭ ارقاسىندا بۇل بالەتتى ارتىستەر عانا ەمەس, كورەرمەن قاۋىم دا جىلى قابىلدادى. «A Fuego Lento» تەاتردىڭ بارلىق گاسترولدىك باعدارلامالارىندا كورسەتىلەدى. بۇل بالەت كوۆەنت-گاردەن كورولدىك تەاترىنىڭ (لوندون), لينكولن-ورتالىعىنىڭ (نيۋ-يورك), موناكوداعى گريمالدي فورۋمنىڭ (مونتە-كارلو) جانە وزگە دە ايگىلى تەاترلاردىڭ ساحنالارىندا قويىلعان.
