جيىن بارىسىندا «استانا جاستارى» جاستار رەسۋرستىق ورتالىعىنىڭ باسشىسى چينگيز مارات ۇلى اتالعان جوبا ەلوردادا تۇڭعىش رەت ۇيىمداستىرىلىپ وتىرعانىن جەتكىزدى.
«مەيكاتون جوباسى رەسپۋبليكادا بىرنەشە رەت ۇيىمداستىرىلعانىمەن نۇر-سۇلتان قالاسىندا تۇڭعىش رەت وتكەلى وتىر. سونىمەن قاتار «استانا جاستارى» جاستار رەسۋرستىق ورتالىعى نۇر-سۇلتان قالالىق اكىمدىگىنىڭ قولداۋىمەن, «قازاقستانداعى تەل-اۆيۆ ۋنيۆەرسيتەتىنىڭ دوستار قاۋىمداستىعىمەن» كەلىسىمشارتقا وتىرعان بولاتىن», دەدى ول.
TOM: Nur-Sultan مەيكاتون مارافونى بۇگىن باستاۋ الادى, وندا 3,5 كۇن بويىنا مۇمكىندىگى شەكتەۋلى جانداردىڭ ومىرلەرىن جەڭىلدەتۋگە ارنالعان پروتوتيپتەر جاسالادى. مەيكاتون جوباسى نازارباەۆ ۋنيۆەرسيتەتىنىڭ يننوۆاتسيالىق كلاستەرىنىڭ «Fab Lab» زەرتحاناسىنىڭ الاڭىندا وتەدى. بۇل ۋنيۆەرسيتەت نۇر-سۇلتان قالاسىنداعى الدىڭعى قاتارلى ۋنيۆەرسيتەتتەردىڭ ءبىرى بولىپ تابىلادى جانە يننوۆاتسيالىق كەڭ اۋقىمدى ءىس-شارا فورماتىن وتكىزۋگە تەحنيكالىق جانە ماتەريالدىق بازاسى, جوبانى وتكىزۋگە مۇمكىندىك بەرەدى.
«مەيكاتون – جاس ونەرتاپقىشتار مەن مۇمكىندىگى شەكتەۋلى جانداردىڭ باس قوساتىن الاڭى دەۋگە بولادى. جانە سول ونەرتاپقىشتاردىڭ جاساعان قۇرىلعىلارى مەن جوباسى مۇمكىندىگى شەكتەۋلى جانداردىڭ قالىپتى ءومىر سۇرۋىنە ىقپال ەتەدى. ءبىز بۇل جوبانى قازاقستاندا ىسكە اسىرۋدى 2017 جىلى زەرتحانا جۇزىندە قولعا العان بولاتىنبىز. اتالعان جوبانىڭ اكىمدىكتەر تاراپىنان قولداۋ تاپقانىنا قۋانىشتىمىز. پاۆلودار قالاسىنان باستاۋ العان مارافون قاراعاندى, الماتى, اقتاۋ, شىمكەنت قالالارىندا جالعاسقان بولاتىن. ماسەلەن, بىلتىر وتكەن مەيكاتونداردا مەيكەرلەر سۋردو-اقپاراتتى داۋىستاپ جەتكىزەتىن «اقىلدى قولعاپ», مۇگەدەكتەردىڭ اياققا تۇرىپ كەتۋىنە ارنالعان ەكزوقاڭقا, ناشار ەستيتىندەرگە تۇرمىستىق جاعدايلاردى باعدارلاۋ ءۇشىن بىلەزىك جانە تاعى باسقالاي پايدالى قۇرىلعىلار ۇسىنعان. ءتىپتى قوس جانارىنان ايىرىلعان زاعيپ جاندارعا ارنايى تاياق تا ويلاپ تاۋىپ, قۇراستىرىلىپتى. بۇل قۇرىلعى ولارعا كوشەدە وي-شۇڭقىر نەمەسە جولداعى ءتۇرلى كەدەرگىلەردى جارتى مەتر قالعاندا دىبىستىق بەلگى بەرىپ, ەسكەرتەدى ەكەن. بيىل اۋقىمدى جوبانى وتكىزۋ ءۇشىن نازارباەۆ ۋنيۆەرسيتەت يننوۆاتسيالىق كلاستەرىنىڭ «Fab Lab» تسيفرلى پروتوتيپتەۋ زالى ءۇش كۇنگە زەرتحاناعا اينالىپ, مەيكەرلەر ءوز يدەيالارىن جۇزەگە اسىرادى. ويتكەنى اتالعان زال ءتۇرلى تەحنولوگيالىق زەرتتەمەلەر جۇرگىزۋگە ارنالعان زاماناۋي قۇرال-جابدىقتارمەن قامتىلعان» دەدى «قازاقستانداعى تەل-اۆيۆ ۋنيۆەرسيتەتىنىڭ دوستار قاۋىمداستىعى» زتب ۆيتسە-پرەزيدەنتى سانيا اراپوۆا.
ۇزدىك يدەيالارىن ۇسىنعان 7 كوماندا ءبىرىنشى كەزەڭنەن ءوتتى جانە ەكىنشى كەزەڭدە وزدەرى ۇسىنعان يدەيالار بويىنشا جۇمىس ىستەۋگە مۇمكىندىك الدى. ولاردىڭ ىشىندە GEAR UP – «مەحانيكالىق كولياسكالاردى مودەرنيزاتسيالاۋ. ەلەكتروندى قوندىرمالار مەن بەسىنشى دوڭگەلەكتەردى قوسۋ», CHAIN – «ChainStep – بالداق جانە مۇزعا قارسى اياق كيىم», NUKBTU – «TyndApp – زاعيپتارعا ارنالعان قوسىمشا. قوعامدىق كولىكپەن سينحرونداۋ (astrabus/citybus), برايل نەگىزىندەگى دىبىستىق جۇيەنى ۇيرەتۋ», KEEP GOING – «مۇگەدەكتەر اربالارىنا ارنالعان ەلەكتر قوندىرعىسى», HEALTHOCRACY – «مۇگەدەك سپورتشىلاردىڭ اياقتارىن بۇلشىق ەتتەرىن جىلىتۋعا ارنالعان ەلليپس جاتتىقتىرۋشىسى», DEUX EX MACHINE – «قولجەتىمدى قالپىنا كەلتىرۋ جاتتىعۋى ۆەلوسيپەدى. «سال اۋرۋى بار اياق-قولداردىڭ بۇلشىق ەتىن جانە بۋىندارىن دامىتۋ ءۇشىن ۆەلوسيپەدتى پەداليزاتسيالاۋ قاعيداتىنا نەگىزدەلگەن قالپىنا كەلتىرۋ اپپاراتى», جاردەم – «قوسىمشا مۋلتيفۋنكتسيونالدى وپتسيالارمەن ەلەكتر كولياسكاسىن جاقسارتۋ» جوباسى بار.
ەكى كەزەڭدە دە كوماندالارعا نيدنوۋەرلەردەن جانە پروتوتيپتەردى ارنايى جاساپ جاتقان مۇمكىندىگى شەكتەۋلى جاندار تاراپىنان كەڭەستەر بەرىلگەن. نيدنوۋەر-كەڭەسشىلەردى ىرىكتەۋدە «قازاقستان مۇگەدەكتەر كونفەدەراتسياسى» رەسپۋبليكالىق قوعامدىق قاۋىمداستىعىنىڭ اتقارۋشى ديرەكتورى الما قۋاندىققىزى جانە «قازاقستان مۇگەدەكتەر كونفەدەراتسياسى» رەسپۋبليكالىق قوعامدىق قاۋىمداستىعىنىڭ اتقارۋشى ديرەكتورىنىڭ ورىنباسارى الەكساندر حوركين مىرزامەن بىرلەسە جۇمىس اتقارىلعان.
اتالعان شارانى «استانا جاستارى» جاستار رەسۋرستىق ورتالىعى, نازارباەۆ ۋنيۆەرسيتەتتىڭ يننوۆاتسيالىق كلاستەرىنىڭ Fab Lab زەرتحاناسى جانە قازاقستانداعى تەل-اۆيۆ ۋنيۆەرسيتەتىنىڭ دوستارى قاۋىمداستىعى ۇيىمداستىرىپ وتىر. «مەيكاتون TOM: Nur-Sultan» جوباسى جاستار جىلى اياسىندا نۇر-سۇلتان قالاسى اكىمدىگىنىڭ قولداۋىمەن جۇزەگە اسىرىلۋدا.
