رەسپۋبليكالىق گازەتتەردىڭ ۇزدىك بەستىگىنە «ەگەمەن قازاقستان», «جاس الاش», «انا ءتىلى», «كازاحستانسكايا پراۆدا» جانە «ۇيعىر اۆازي» باسىلىمدارى كىردى. ايماقتىق كوشباسشىلار اراسىندا – «جەتىسۋ», «اقتوبە», «وگني الاتاۋ», «اq Jol», «يۋجنىي كازاحستان» گازەتتەرى بار.
ەل بويىنشا بارلىعى 204 رەسپۋبليكالىق جانە 521 ايماقتىق گازەت جازىلىم بويىنشا تاراتىلادى. جازىلۋدىڭ جالپى كولەمىندەگى رەسپۋبليكالىق باسىلىمداردىڭ ۇلەسى 45%-دى, وڭىرلىك باسىلىمداردىڭ ۇلەسى 54%-دى قۇرادى. تيراجدىڭ 1%-ى حالىقارالىق مەرزىمدى باسىلىمدارعا تيەسىلى. قازاقستاندىقتار قازاقستان, رەسەي, بەلارۋس جانە ۋكراينانىڭ 3 مىڭنان استام گازەت-جۋرنالدارىنا قازپوشتا ارقىلى جازىلۋ مۇمكىندىگىنە يە.
گازەت-جۋرنالعا جازىلۋ اۋىلداردا كوپ تىركەلگەن. اۋىل تۇرعىندارى وبلىستىق, قالالىق جانە اۋداندىق باسىلىمدارعا جازىلعاندى (جالپى تيراجدىڭ 58%-ى) ءجون كورەدى. جازىلۋ بويىنشا قازاقستاننىڭ وڭىرلەرى اراسىندا الماتى, قىزىلوردا, قاراعاندى جانە جامبىل وبلىستارى كوش باستاپ تۇر.
«ستاتيستيكا جازىلۋ تيراجىنىڭ تومەندەگەنىن كورسەتتى. وتكەن جىل قورىتىندىسى بويىنشا جازىلۋدىڭ جالپى كولەمى 127,8 ملن. دانانى قۇرادى. بيىل قاراشا مەن جەلتوقسان ايلارىنا جازىلۋ ءالى جالعاسۋدا جانە جىل سوڭىندا كورسەتكىشتەر شامالى وسەدى. بىراق تۇتاستاي العاندا وتكەن جىلدىڭ كورسەتكىشىنەن اسپايدى. ءبىز ەلەكتروندى باسىلىمدارعا كوشۋدىڭ قازاقستاندىق ستاتيستيكانى راستايتىن جالپى الەمدىك ترەند ەكەنىن تۇسىنەمىز», دەدى قازپوشتانىڭ «پوشتالىق سەرۆيس» فيليالىنىڭ ديرەكتورى نۇرجان جاباەۆ.
قازىردىڭ وزىندە 2020 جىلعا جازىلۋ باستالىپ كەتتى. باسپاسوزگە جازىلۋدى كەز كەلگەن قازپوشتا بولىمشەسىندە رەسىمدەۋگە بولادى.
