تاراپتار مەملەكەتتەر اراسىندا قارقىندى ساياسي ۇنقاتىسۋ قالىپتاسقانىن, ەكونوميكالىق تىعىز بايلانىستار ورناعانىن, بارلىق سالالداعى ىنتىماقتاستىق ءوزارا ءتيىمدى دامىپ كەلە جاتقانىن اتاپ ءوتتى. ونەركاسىپ كووپەراتسياسىن دامىتۋ, قازاقستان مەن رەسەي كاسىپورىندارى اراسىنداعى ەكى جاقتى جوبالاردى ىسكە اسىرۋ كوزدەلىپ وتىر.
تالقىلاۋ بارىسىندا قازاقستان ازاماتتارىنىڭ رەسەي اۋماعىندا ءجۇرىپ-تۇرۋ جانە بولۋ جاعدايلارىن قۇقىقتىق قامتاماسىز ەتۋ, شەكارالىق وتكىزۋ بەكەتتەرىنىڭ مارتەبەسىن وزگەرتۋ, جالپىلاما ەكولوگيالىق ۇلگى كودەكستى ازىرلەۋ, قازاقستان اۋماعىنداعى پوليگونداردىڭ ەكولوگياسى, سونداي-اق سۋ رەسۋرستارىن, ونىڭ ىشىندە ترانسشەكارالىق وزەندەردى ءبولۋ ماسەلەلەرى قوزعالدى.
داريعا نازارباەۆا كەزدەسۋ بارىسىندا سونداي-اق قازاقستاندىق كومىردى رەسەي مەن ۋكرايناعا جەتكىزۋ ماسەلەسىن دە كوتەردى. سەنات توراعاسىنىڭ ايتۋىنشا, جۇكتى رەسەي اۋماعىنان شىعارۋعا جانە سول اۋماقتان ۋكرايناعا ترانزيتكە شەكتەۋلەر ەنگىزىلگەننەن كەيىن بىرىنشىدەن قازاقستاندىق كاسىپورىندارعا ۋكراين نارىعىنا كىرۋ مۇمكىندىگى جابىلدى, ەكىنشىدەن رەسەي نارىعى ايتارلىقتاي قىسقارىپ قالدى.
«قازاقستاندىق كومىردى وتكىزەتىن باسقا نارىقتار جوق. باعانىڭ قۇلدىراۋى مەن كولىك شىعىندارىنىڭ وسۋىنە بايلانىستى ەۋروپالىق باعىت ءىس جۇزىندە توقتادى. رەسەيلىك شارالار ءبىزدىڭ كومىر ءوندىرۋشى كاسىپورىنداردى وسىنداي جاعدايمەن توقتاۋدىڭ شەگىنە اكەلىپ وتىر», - دەدى د. نازارباەۆا.
رەسەي ۇكىمەتىنىڭ توراعاسى دميتري مەدۆەدەۆ قازاقستان پارلامەنتى سەناتىنىڭ توراعاسى ساپارىنىڭ ماڭىزدىلىعىن اتاپ ءوتتى جانە رەسەي مەن قازاقستان اراسىنداعى بايلانىس اۋقىمدىلىعىمەن جانە تەرەڭدىگىمەن ەرەكشەلەنەتىنىن ايتتى.
رەسەي فەدەراتسياسى ۇكىمەتىنىڭ باسشىسى تالقىلانعان بارلىق تاقىرىپتار بويىنشا ءتيىستى تاپسىرمالار بەرىلگەنىنە ەرەكشە نازار اۋدارتتى.
«بۇگىن كوتەرىلگەن ماسەلەلەر وڭ شەشىمىن تابادى. جايىق وزەنى بويىنشا بىرلەسكەن كوميسسيا قۇرۋ جونىندەگى قاجەتتى ءىس-قيمىلدىڭ ءبارىن ءوز ورىنباسارىم الەكسەي گوردەەۆكە جۇزەگە اسىرۋدى تاپسىرامىن. ورتاق ماسەلەلەردى ءوزارا ءتيىمدى جاعدايدا شەشۋ قاجەت», - دەدى د. مەدۆەدەۆ.
