كوپ بالالى ءۇيدىڭ وتاعاسى سەرىك جادىگەر 2017 جىلى ەلدىڭ سولتۇستىك وڭىرلەرىنىڭ بىرىنە كوشۋ تۋرالى شەشىم قابىلدادى. قونىس اۋدارۋعا بىردەن-ءبىر سەبەپ بالا كەزىنەن مۇگەدەكتىگى بار, 5 كۇردەلى وتا جاساتقان, 5 سىنىپتا وقيتىن قىزى اسەماي كارىم ەدى. قىز بالانىڭ دەنساۋلىعى شۇعىل تۇردە كليمات جاعدايىنىڭ اۋىسۋىن قاجەت ەتتى.
ء«بىزدىڭ التى بالامىز بار. بيىل ءساۋىر ايىندا بىزگە 1 ملن 567 مىڭ 200 تەڭگە سوماسىندا اتاۋلى الەۋمەتتىك كومەك تاعايىندالدى. اي سايىن 130 600 تەڭگە الامىز. سونداي-اق بىزگە جەكە قوسالقى شارۋاشىلىقتى دامىتۋعا 176 750 تەڭگە كولەمىندە كومەك كورسەتىلدى. بۇل قارجىعا سيىر ساتىپ الدىق. ەندى دۇكەننەن ءسۇت ونىمدەرىن ساتىپ المايمىز, وزىمىزدە تابيعي ءسۇت بار. سونداي-اق بىزگە «وتاۋ تۆ» تەلەۆيزيالىق قوندىرعىسىن ورناتىپ بەردى. ارينە تۋعان ولكەمىزدى ساعىنامىز, بىراق بۇل جاق تا بىزگە قاتتى ۇنايدى», دەدى سەرىكتىڭ جۇبايى مارجان نالىباەۆا.
ەرتىس اۋداندىق ءماسليحاتىنىڭ شەشىمى بويىنشا بۇل كوپ بالالى وتباسىنىڭ 4 بالاسىن مەكتەپكە دايىنداۋعا 50 500 تەڭگە كولەمىندە بىرجولعى الەۋمەتتىك تولەم جاسالدى.
«سەرىك جادىگەر تۇراقتى جۇمىسپەن قامتاماسىز ەتىلدى. ەندى ول «مايقوڭىر اۋىلى اكىمىنىڭ اپپاراتى» كمم-دە جۇرگىزۋشى بولىپ جۇمىس ىستەيدى. ونىڭ جۇبايى مارجان نالىباەۆا مايقوڭىر اۋىلدىق كلۋبىنا تەحنيكالىق قىزمەتكەر بولىپ جۇمىسقا ورنالاستى», دەپ حابارلادى پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ورىنباسارى گۇلنار كامالوۆا.
سونىمەن قاتار ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىنىڭ ەكىنشى باعىتى اياسىندا سەرىك جادىگەرگە ۇساق مال ءوسىرۋ ءۇشىن 1 ملن 500 مىڭ تەڭگە سوماسىندا ميكروكرەديت الۋعا كومەك كورسەتىلدى. بۇل قاراجاتقا ول ءوزىنىڭ جەكە قوسالقى شارۋاشىلىعى ءۇشىن 50 باس قوي ساتىپ الدى.
ء«بىزدىڭ وتباسىمىزعا جاڭا ورىندا ناقتى كومەك كورسەتىلدى, بالالاردىڭ مەكتەپكە كەرەك-جاراعىن الۋعا دا كومەكتەستى, جۇمىسقا دا ورنالاستىردى. ال ااك-ءتىڭ ارقاسىندا وتباسىمنىڭ ءال-اۋقاتى ايتارلىقتاي جاقساردى. ەندى ءبىز جاقسى ءومىر ءسۇرىپ جاتىرمىز», دەپ سەرىك جادىگەر ءوز ويىمەن ءبولىستى.
گ.كامالوۆانىڭ اقپاراتى بويىنشا, قازىرگى ۋاقىتتا 59 وتباسى جالپى سوماسى 19 ملن 200 مىڭ تەڭگە سوماسىندا الەۋمەتتىك كومەك الادى, ونىڭ ىشىندە 42 وتباسىعا 100 اەك كولەمىندە, جالپى سوماسى 10 ملن 600 مىڭ تەڭگە, 17 وتباسىعا ارقايسىسىنا 200 اەك-تەن, جالپى سوماسى
8 ملن 600 مىڭ تەڭگە تولەنەدى.
ەستەرىڭىزگە سالا كەتەيىك, بيىلعى 15 تامىزداعى جاعداي بويىنشا اتاۋلى الەۋمەتتىك كومەكپەن 1,8 ملن قازاقستاندىق قامتىلعان. جاردەماقى الۋشىلاردىڭ ەڭ كوبى تۇركىستان وبلىسىندا – 498,7 مىڭ ادام, الماتى وبلىسىندا – 225,4 مىڭ ادام, شىمكەنت قالاسىندا – 216,3 مىڭ ادام تۇرادى. بيىل 1 تامىزداعى جاعداي بويىنشا 103 ملرد تەڭگە كولەمىندە ااك تولەندى. ءبىر وتباسىنا تولەمنىڭ ورتاشا مولشەرى ايىنا 86 مىڭ تەڭگەنى قۇراپ وتىر.
