بۇل وتباسى تۋرالى اڭگىمە قوزعاعاندا ەكى مۇشەل جاسىندا قاپيادا قازا تاپقان عازيزدىڭ ەسىمى ءتىل ۇشىنا الدىمەن ورالارى زاڭدى. جاستىقتىڭ الاۋ وتى بويىندا جالىنداپ, قوعام تىنىشتىعىن ساقتاۋداعى مازاسىز قىزمەتىن باستاعان ول ءومىردىڭ اۋىر تاۋقىمەتىن كوپ كوردى. اكە-شەشەسىنەن جاستايىنان ايىرىلىپ, ۇلكەن اعاسىنىڭ باۋىرىندا ءوستى. سەگىزىنشى سىنىپتى اياقتاعاننان كەيىن كوپ ويلانباستان وندىرىسكە ارالاسۋعا, ءسويتىپ شىڭدالۋ مەكتەبىنەن وتۋگە شەشىم قابىلدادى. وتان الدىنداعى ازاماتتىق بورىشىن وتەپ كەلگەن سوڭ كومسومولدىق جولدامامەن پەتروپاۆل قالالىق ىشكى ىستەر بولىمىنە ميليتسيونەر بولىپ ورنالاستى. ءا دەگەننەن ءوز ىسىنە جاۋاپتى, ۋادەگە بەرىك, جولداستىق-دوستىققا ادال قاسيەتتەرىمەن دارالانىپ, قىلمىسپەن كۇرەستە, الدىن الۋدا, بولدىرماۋدا باسىن تالاي قاتەرگە تىكتى. ۇنەمى العى شەپتە ءجۇردى. وتان دەگەن اسىل ۇعىمدى كوزىنىڭ قاراشىعىنداي قادىرلەي ءبىلدى. مارقۇمنىڭ كوپ ارماندارىنىڭ ءبىرى وقۋىن جالعاستىرۋ, ۇلگىلى وتباسىن قۇرۋ ەدى. الايدا تاعدىر وعان جازبادى. ويدا-جوقتا قاسكۇنەمدەردىڭ قولىنان اجال قۇشتى. 1951 جىلدىڭ 21 ماۋسىم كۇنى جارىق كۇنمەن ماڭگىلىككە قوشتاسارىن بىلمەگەن. پاترۋلدىك توپ قۇرامىندا كەشقۇرىم جۇرتشىلىق ءجيى جينالاتىن دەمالىس ساياباعىنا كەزەكشىلىككە بارعان. ءبىر-بىرىمەن ك ۇلىمدەي امانداسىپ, الاڭسىز سەرۋەندەپ جۇرگەن ادامداردىڭ تۇنگى تىنىشتىعىن الدەبىر جانداردىڭ اششى داۋسى بۇزىپ, اينالانى جاڭعىرىقتىرىپ جىبەرگەن. وقيعا ورنىنا ىلە-شالا جەتكەنى سول ەدى, ىشىمدىككە ەسىرىپ, اقىل-ەسىن جوعالتقان ەكى اسكەري ادام بي الاڭىندا جۇرگەندەردى قۋالاپ, سوققىنىڭ استىنا الىپ جۇرگەنىن قىراعى كوزى بىردەن شالعان. دەرەۋ بىرەۋىن جەرگە جىعىپ, كەرى قايرىلا بەرگەندە ەكىنشىسى مۇنىڭ مويىن تۇسىنا وتكىر كەزدىكتى بويلاتا سۇعىپ جىبەرگەن. قان ساۋلاپ قويا بەرسە دە ەت قىزۋىمەن بايقاماعان. ءادىس قولدانىپ, ونى دا ىرقىنا كوندىرە بەرگەندە كومەك توبى جەتىپ ۇلگىرگەن. بىراق ءبارى كەش ەدى. جەدەل جاردەم كورسەتىلگەنىنە قاراماستان اۋرۋحاناعا جەتپەگەن كۇيى اقتىق دەمى ءۇزىلىپ كەتكەن. سودان بەرى ارادا جەتپىس جىلعا جۋىق ۋاقىت وتسە دە قىزمەتتىك بورىشىن وتەۋ كەزىندە قاپىلىستا مەرت بولعان وعلاننىڭ ەسىمى ەسكەرۋسىز قالعان ەمەس. ۇنەمى جاس بۋىنعا ۇلگى ەتىلىپ, ەرلىك ىستەرى كەڭىنەن ناسيحاتتالىپ كەلەدى.
–كەڭەسكە 2240 ارداگەر مۇشە. ولاردىڭ 5-ءۋى– فاشيستىك گەرمانياعا قارسى قاھارماندىقپەن شايقاسسا, 28-ءى– تىل ەڭبەككەرى. قاي-قايسىسىنىڭ دا قوعامدىق ءتارتىپتىڭ قاۋىپسىزدىگىن قامتاماسىز ەتۋگە قوسقان ۇلەسى زور. ءارتۇرلى دارەجەدەگى مەملەكەتتىك ماراپاتتارمەن اتاپ وتىلگەن. دجۋرا كوبەلەۆ دەگەن مايدانگەرىمىز جۋىردا 102 جاسقا تولدى. سوڭعى ەكى جىلدا 128 ارداگەرىمىز ساناتوريلەردە, جەرگىلىكتى اسكەري گوسپيتالدا ەم-دوم الىپ, تىنىعىپ قايتتى.
ال عازيزگە ارنالاتىن ءىس-شارالاردىڭ ورنى بولەك. دەپارتامەنت عيماراتى قابىرعاسىندا مەموريالدىق تاقتا ورناتىلعان,–دەدى وبلىستىق پوليتسيا دەپارتامەنتى جانىنداعى ارداگەرلەر كەڭەسىنىڭ توراعاسى سۇراعان كوپەەۆ.
وسىدان ەكى جىل بۇرىن ىشكى ىستەر ورگاندارى جاس پوليتسەيلەردىڭ رەسپۋبليكالىق سلەتى قىزىلجار وڭىرىندە وتكەندە ەرلىكپەن قازا تاپقان ءتارتىپ ساقشىسىنىڭ قۇرمەتىنە ارنايى اللەيانىڭ تاسپاسى قيىلىپ, سالتاناتتى تۇردە اشىلىپتى. شىرشا كوشەتتەرى وتىرعىزىلىپتى. قازىر بۇل جەر ۇرپاقتار اراسىنداعى ساباقتاستىقتى جەتىلدىرۋدىڭ, وزىق داستۇرلەردى جاڭعىرتۋدىڭ, جاۋىنگەرلىك رۋحتى قاستەرلەۋدىڭ سيمۆولدىق بەلگىسى, جارقىن ۇلگىسى ىسپەتتەس. وقۋشىلار ەكسكۋرسياسى, جۇمىسقا ورنالاسقان جاس قىزمەتكەرلەر وسىندا كەلىپ, اعاش ەگۋ, گۇل شوقتارىن قويۋ سەكىلدى تانىمدىق, تاعىلىمدىق اكتسيالار جۇيەلى تۇردە ۇيىمداستىرىلىپ تۇرادى.
وسى اۋلەتتىڭ قادىرمەندى ءبىر مۇشەسى بولات عافيز ۇلىنىڭ دا سانالى عۇمىرى ىشكى ىستەر ورگانىمەن تىعىز بايلانىستى. ەڭبەك جولىن اۋداندىق ىشكى ىستەر بولىمىنەن باستاپ, وبلىستىق كوشى-قون قىزمەتى باستىعىنىڭ ورىنباسارىنا دەيىن كوتەرىلگەن. وڭىردە وسى سالانىڭ دامۋىنا, نىعايۋىنا سۇبەلى ۇلەسىن قوسقان. جان جارى الما جاپارقىزى دا قالالىق ىشكى ىستەر ءبولىمىنىڭ كەڭسەسىندە قىزمەت اتقارعان. ولاردىڭ ۇلدارى باحتيار اتا, اكە سوقپاعىن جالعاستىرۋدى ماقسات ەتىپ, تاڭداۋدان قاتەلەسپەگەن. ىشكى ىستەر مينيسترلىگى جانىنداعى اكادەميانى تامامداعاننان كەيىن تۋعان جەرگە ورالعان. قازىر قىزىلجار اۋداندىق ىشكى ىستەر ءبولىمى باستىعىنىڭ ورىنباسارى. پوليتسيا مايورى.
كەلىنشەگىم انار دا قالالىق ىشكى ىستەر بولىمىندە ءبىراز جىل ەڭبەك ەتتى. ءبارىن قوسىپ ەسەپتەسەك, اۋلەتىمىزدىڭ جالپى جۇمىس ءوتىلى جارتى عاسىردان اسىپ كەتەدى. ۇلىمىز ءامىر جەتى جاستا. مەنىڭ جولىمدى قۋىپ جاتسا, قۋانباسام, رەنجىمەيمىن. ويتكەنى اۋلەتىمىزدىڭ ۇشار باسىندا تۇرعان اتامىزدى ءبارىمىز ەرەن ەرلىكتىڭ وشپەس ەسكەرتكىشى, تەمىرقازىعى سانايمىز, دەيدى باحتيار بولات ۇلى ءتارتىپ ساقشىسىنا ءتان نىق, سەرگەك ۇنمەن.
سولتۇستىك قازاقستان وبلىسى
