جيىنعا پارلامەنت دەپۋتاتتارى, ورتالىق جانە جەرگىلىكتى اتقارۋشى ورگانداردىڭ باسشىلارى, قوعام قايراتكەرلەرى مەن عالىمدار قاتىستى. وڭىرلەردىڭ اكىمدەرى وتىرىس جۇمىسىنا سەلەكتورىق بايلانىس ارقىلى قاتىستى.
وتىرىستى اشقان مەملەكەتتىك حاتشى وسكەلەڭ ۇرپاققا مەملەكەتتىك سانا قالىپتاستىرۋ, ولاردى وتانشىلدىققا تاربيەلەۋ جونىندەگى باستى يدەولوگيالىق باعىتتاردىڭ ءتۇپ-توركىنىندە مەملەكەتتىك رامىزدەرگە دەگەن قۇرمەتتى ارتتىرۋ ماسەلەسى تۇرعانىن ەرەكشە اتاپ ءوتتى.باسقوسۋدا Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك, مادەنيەت جانە سپورت ءمينيسترى اقتوتى رايىمقۇلوۆا, ءبىلىم جانە عىلىم ءمينيسترى اسحات ايماعامبەتوۆ, شىمكەنت قالاسىنىڭ اكىمى ەرلان ايتاحانوۆ جانە تۇركىستان وبلىسىنىڭ اكىمى ومىرزاق شوكەەۆ ءسوز سويلەدى.
مادەنيەت جانە سپورت ءمينيسترى ا.رايىمقۇلوۆا مەملەكەت باسشىسىنىڭ مەملەكەتتىك رامىزدەر مەن ۆەدومستۆولىق ناگرادالار سالاسىندا بەرگەن تاپسىرمالارىنىڭ ورىندالۋى جانە رەسپۋبليكالىق كوميسسيانىڭ 2020 جىلعا جۇمىس جوسپارىن بەكىتۋ تاقىرىبىندا بايانداما جاسادى.
مينيستر مەملەكەتتىك رامىزدەردى دايىندايتىن شەتەلدىك كاسىپورىندار تۋرالى مالىمدەدى. ونىڭ ايتۋىنشا, 2019 جىلدىڭ 8 ايىندا ولاردىڭ يمپورت كولەمى 3,4 ملرد تەڭگەنى قۇراعان. وسى ورايدا اقتوتى رايىمقۇلوۆا ستاندارتقا ساي ەمەس رامىزدەردى يمپورتتاۋعا تىيىم سالۋ قاجەتتىگىن ايتىپ ءوتتى. سونىمەن بىرگە دايىن ءونىمدى شەتەلدەن ساتىپ الاتىن كاسىپورىنداردىڭ ليتسەنزياسىن قايتارىپ الۋ قولعا الىنعانىن حابارلادى. بۇل تۇرعىدا كوميسسيا توراعاسى قىرىمبەك كوشەرباەۆ ساۋدا جانە ينتەگراتسيا, ۇلتتىق ەكونوميكا, قارجى مينيسترلىكتەرىمەن بىرلەسىپ مەملەكەتتىك رامىزدەردى دايىنداۋشىلارعا ارنالعان بىلىكتىلىك تالاپتارىن كۇشەيتۋ ارقىلى مەملەكەتتىك رامىزدەردى ەلدىڭ اۋماعىندا عانا ءوندىرۋدىڭ تولىق تسيكلىن قامتاماسىز ەتۋدى جانە ولاردىڭ يمپورتىنا تىيىم سالۋ تۋرالى تاپسىرما بەردى.
مادەنيەت جانە سپورت ءمينيسترى ەلىمىزدەگى مەملەكەتتىك رامىزدەردى جاساپ شىعاراتىن كاسىپورىندار اراسىندا مونيتورينگ جۇرگىزىلگەنىن حابارلادى. ونىڭ قورىتىندىسى بويىنشا, ليتسەنزيالانعان 63 كاسىپورىننىڭ 29-ى عانا تالاپتارعا سايكەس جۇمىس ىستەگەن. ساۋدا جانە ينتەگراتسيا مينيسترلىگىنە قالعان كاسىپورىنداردىڭ جۇمىسىنا تىيىم سالۋ كەرەكتىگى ايتىلدى. ودان كەيىن مينيستر مەملەكەتتىك رامىزدەردى دارىپتەۋ ماقساتىندا بارلىق مەكتەپتەر مەن مەكتەپكە دەيىنگى مەكەمەلەردە, جوو-لاردا مەملەكەتتىك رامىزدەر بۇرىشى بارىن ەسكە سالدى. «دەگەنمەن, قازاقستاندا گەرالديكا, ۆەكسيللولوگيالىق كەشەندى زەرتتەۋلەر جوق. وسىعان قاتىستى بازالار, ەڭبەكتەر, ارنايى مەكتەپتەر, ءتىپتى ماماندار دا جوقتىڭ قاسى. بۇل رەتتە ارنايى ورتالىق اشۋ قاجەتتىلىگى تۋىنداپ وتىر», دەدى ا.رايىمقۇلوۆا.
سونىمەن بىرگە مينيسترلىك تاراپىنان ۆەدومستۆولىق ناگرادالاردىڭ دارەجەلەرىن الىپ تاستاۋ, ۇقساس ناگرادالاردى بىرىكتىرۋ, مەملەكەتتىك ۇيىمداردىڭ تاقىرىپتىق نەگىزىنە ساي ەمەس نەمەسە مەملەكەتتىك مەكەمەلەردىڭ بارلىعىنا ورتاق ناگرادالاردى الىپ تاستاۋ نە بىرىكتىرۋ ۇسىنىلدى. «مەملەكەتتىك ورگانداردىڭ ۆەدومستۆولىق ناگرادالاردىڭ جالپى سانى – 183. ونىڭ 103-ءى مەدال, 80-ءى توسبەلگى. ناگرادالاردىڭ ەڭ كوبى ىشكى ىستەر مينيسترلىگىنە تيەسىلى. ۆەدومستۆو اتىنا 36 ناگرادا تىركەلگەن, ال ۇلتتىق قاۋىپسىزدىك كوميتەتىندە 27 ناگرادا بار. كەيبىر مينيسترلىكتەردەگى «ۇزدىك اۆتوكولىك جۇرگىزۋشىسى» مەن «قۇرمەتتى اۆتوكولىك جۇرگىزۋشىسى» سياقتى ۇقساس ناگرادالار كوپ», دەدى مينيستر.
Nur Otan پارتياسى توراعاسىنىڭ ءبىرىنشى ورىنباسارى ب.بايبەك ءپاتريوتيزمدى ناسيحاتتاۋ تۋراسىندا ءسوز قوزعادى. ونىڭ ايتۋىنشا, Nur Otan پارتياسىنىڭ قولداۋىمەن 10 قازاندا الماتى قالاسىندا بيىكتىگى 40 مەتر بولاتىن تۋتۇعىر ورناتىلعان. سونىمەن قاتار ەلىمىزدە مەملەكەتتىك تۋدى قوعامدىق ورىنداردا پايدالانۋعا, ىلۋگە بولمايدى دەگەن جالعان ستەرەوتيپتىڭ بارىن ايتتى. «تۇركيادا, اقش-تا مەملەكەتتىك تۋ كوشە بويىندا, جەكە اۋلالاردا, قوعامدىق ورىنداردا ءىلۋلى تۇرادى. ال بىزدە ول زاڭمەن قۋدالانادى دەگەن قاتە تۇسىنىك بار. وسى ورايدا پارتيا «مەنىڭ تۋىم – مەنىڭ وتانىم» اكتسياسىن وتكىزىپ جاتىر. اكتسيا نەگىزىندە مەملەكەتتىك تۋىمىزدى قوعامدىق ورىنداردا, تۋريستىك جەرلەردە, ءتىپتى اۆتوبۋستاردا ءىلۋ قولعا الىندى», دەدى باۋىرجان بايبەك. سونىمەن بىرگە رەسپۋبليكامىزداعى وبلىس ورتالىقتارىنىڭ كوبىندە تۋ-تۇعىرلاردىن بارىن دا اتاپ ءوتتى.
ءبىلىم جانە عىلىم ءمينيسترى ا.ايماعامبەتوۆ ءبىلىم جۇيەسىندەگى مەملەكەتتىك رامىزدەردى ناسيحاتتاۋ جانە قولدانۋ سالاسىنداعى جۇمىستار تۋرالى بايانداما جاساسا, شىمكەنت قالاسىنىڭ اكىمى ە.ايتاحانوۆ, تۇركىستان وبلىسىنىڭ اكىمى ءو.شوكەەۆ پەن شىعىس قازاقستان وبلىسى اكىمىنىڭ ءبىرىنشى ورىنباسارى ە.ايمۇقاشەۆ مەملەكەتتىك رامىزدەردى ناسيحاتتاۋ جانە قولدانۋ بويىنشا جۇمىس تاجىريبەسى تۋرالى ءسوز سويلەدى. ال ورتالىق سايلاۋ كوميسسياسىنىڭ توراعاسى بەرىك يماشەۆ «سايلاۋ جۇيەسىن دامىتۋعا قوسقان ەرەكشە ۇلەسى ءۇشىن» مەدالىن ەنگىزۋدى ۇسىندى. ونىڭ ايتۋىنشا, بيىلعى پرەزيدەنت سايلاۋىنا 48 000 باقىلاۋشى قاتىسقان. ولاردىڭ ىشىندە مەكتەپ مۇعالىمدەرى دە, شەتەلدىك ساراپشىلار دا بار. ال بۇل ۇسىنىس قابىلدانعان جاعدايدا, دۇنيەجۇزىلىك سايلاۋ كۇنىندە, ياعني اقپان ايىنىڭ العاشقى بەيسەنبىسىندە تابىستالماق. ق.كوشەرباەۆ بۇل تۇرعىدا «گەرالديكا ورتالىعىن» قۇرۋ كەرەگىن ايتىپ, اتالعان ماسەلە ساراپشىلارمەن بىرگە تالقىلاناتىنىن جەتكىزدى.
جيىن سوڭىندا كوميسسيا توراعاسى, مەملەكەتتىك حاتشى ق.كوشەرباەۆ تاراپىنان وبلىستار, نۇر-سۇلتان, الماتى جانە شىمكەنت قالالارىنىڭ اكىمدەرىنە قازاقستان حالقى اسسامبلەياسىنىڭ حاتشىلىعىمەن بىرلەسىپ, بارلىق وبلىستار مەن قالالاردا مەملەكەتتىك رامىزدەردى ناسيحاتتاۋ ورتالىقتارىنىڭ اشىلۋىن قامتاماسىز ەتسىن دەگەن تاپسىرما بەرىلدى.
وعان قوسا Nur Otan پارتياسى باستاماسىمەن قولعا الىنعان «مەنىڭ تۋىم – مەنىڭ وتانىم!» رەسپۋبليكالىق پاتريوتتىق اكتسياسىنا جان-جاقتى قولداۋ كورسەتىلۋ كەرەكتىگىن ايتتى. «ۋاكىلەتتى ورگانداردىڭ, اۋداندىق جانە قالالىق اكىمدىكتەردىڭ, شالعايداعى اۋىلدىق وكرۋگتەردە مەملەكەتتىك رامىزدەردى قولدانۋ جانە ناسيحاتتاۋ سالاسىنداعى جۇمىسىنا باقىلاۋ كۇشەيتىلسىن», دەدى ق.كوشەرباەۆ. ال ۇلتتىق ەكونوميكا مينيسترلىگى, سىرتقى ىستەر, مادەنيەت جانە سپورت مينيسترلىكتەرىنە «جالپىەلدىك برەند» قۇرۋ بويىنشا جۇمىس ناتيجەسىن كوميسسيانىڭ كەلەسى وتىرىسىندا تانىستىرۋدى مىندەتتەدى.
وتىرىس سوڭىندا رەسپۋبليكالىق كوميسسيانىڭ توراعاسى تاراپىنان مادەنيەت جانە سپورت مينيسترلىگى, ادىلەت مينيسترلىكتەرىمەن بىرلەسىپ مەملەكەتتىك ورگانداردىڭ ۆەدومستۆولىق ناگرادالارىن وڭتايلاندىرۋ بويىنشا ناقتى ءىس-شارالار قابىلداپ, مادەنيەت جانە سپورت مينيسترلىگى ۇسىنعان رەسپۋبليكالىق كوميسسيانىڭ 2020 جىلعا ارنالعان جۇمىس جوسپارىن بەكىتۋ جانە ورىنداۋ جونىندە تاپسىرما بەرىلدى.
