مىنە, ەندى «پەتەربۋرگ تراكتور زاۋىتى» اق (پتز) قۋاتى جوعارى تراكتورىنىڭ جاڭارتىلعان, جاڭعىرتىلعان نۇسقاسى قوستاناي تراكتور زاۋىتىنان شىعارىلا باستادى. جوبا ەكى ەل اراسىندا وسى جىلدىڭ ءساۋىر ايىندا كەلىسىلگەن بولاتىن. جاڭا قوستاناي تراكتور زاۋىتى وبلىس ورتالىعىنداعى يندۋستريالىق ايماققا ورنالاستىرىلعان. جاڭا زاۋىتتىڭ اشىلۋ راسىمىنە ەلباسى نۇرسۇلتان نازارباەۆ باستاماشى بولعان يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ىسكە اسىرىلۋىنا, سونداي-اق مەملەكەت باسشىسى قاسىم-جومارت توقاەۆتىڭ قوستاناي وبلىسىنىڭ ونەركاسىپتىك الەۋەتىن دامىتۋ جونىندەگى تاپسىرمالارىنىڭ ورىندالۋىنا باقىلاۋ ورناتۋ اياسىندا وڭىرگە جۇمىس ساپارىمەن كەلگەن پرەمەر-مينيستر اسقار مامين قاتىستى. ۇكىمەت باسشىسى جوبانى جوعارى باعالادى.
–بۇل ءوندىرىس ەلىمىزدىڭ اۋىل شارۋاشىلىعىن وتاندىق جانە سەنىمدى, ساپالى تەحنيكامەن قامتاماسىز ەتەتىن بولادى. پەتەربۋرگ تراكتور زاۋىتىمەن ىنتىماقتاسا جۇمىس ىستەۋ قازاقستان مەن رەسەيدىڭ ونەركاسىپتىك كووپەراتسياعا قاتىسۋىن نىعايتتى. ءبىزدىڭ رەسەيلىك ارىپتەسىمىزگە ونەركاسىپ كووپەراتسياسىنا بەلسەندى قاتىسقانى ءۇشىن ريزاشىلىعىمدى بىلدىرەمىن. قازاقستان اۋىلشارۋاشىلىق تەحنيكالارىن ءوندىرۋدى كەڭەيتۋگە مۇددەلى. الداعى ۋاقىتتا ونى ەكسپورتقا شىعارۋىمىز, جەرگىلىكتەندىرۋدى كەڭەيتۋىمىز, سەرۆيس دەڭگەيىن كوتەرۋىمىز كەرەك. بۇل جوبا وتاندىق ماشينا قۇراستىرۋ ءىسىنىڭ ستراتەگياسى ەكەنىن كورسەتتى, ال بۇل مەملەكەت تاراپىنان ءار ۋاقىتتا قولداۋعا يە بولا بەرەدى, – دەدى اسقار مامين قۇتتىقتاۋ سوزىندە. «پەتەربۋرگ تراكتور زاۋىتى» اق (پتز) باس ديرەكتورى سەرگەي سەرەبرياكوۆ الداعى ۋاقىتتا ەكى جاقتىڭ ىنتىماقتاستىعىمەن نارىقتى جوعارى ساپالى تەحنيكالارمەن قامتاماسىز ەتۋگە سەنىمدى ەكەنىن ايتتى.
–بۇگىندە الدىمەن ارىپتەستەر تاراپىنان جوعارى جاۋاپكەرشىلىكتى سەزىپ تۇرمىن. جاڭا تەحنولوگيالىق دەڭگەيگە جەتۋ, كادرلاردى دايارلاۋ, ءىس باستاۋ وڭاي ەمەس ەدى. سونىڭ بارلىعى دا تۋرا ايتقان ۋاقىتتا جۇزەگە اسىپ جاتىر, وعان قازاقستان ۇكىمەتى, وبلىس اكىمدىگى, قوس زاۋىتتىڭ ماماندارى مۇمكىندىك جاسادى. الداعى ۋاقىتتا قول قويىلعان كەلىسىمدەر شەڭبەرىندە ءبىزدىڭ بايلانىسىمىز ارتا بەرەتىن بولادى, – دەدى سەرگەي سەرەبرياكوۆ.
قوستاناي تراكتور زاۋىتىنىڭ جۇمىسىن باستاعان تسەح ءوندىرىستىڭ العاشقى ساتىسى بولىپ تابىلادى, وعان 2 ميلليارد تەڭگە ينۆەستيتسيا سالىندى. ەكىنشى, ءۇشىنشى ساتىسى 2025 جىلى اياقتالادى. ول كەزدە جىلىنا 700 تراكتور ساپقا قويىلاتىن بولادى, 500 قوستانايلىق جۇمىسپەن قامتىلادى. ەڭ باستىسى, تسەحتا تراكتور ساپقا قويىلعانعا دەيىنگى جۇمىستىڭ 50 پايىزى جەرگىلىكتەندىرىلەدى. كەلەسى جىلى قوستاناي زاۋىتىندا «كيروۆەتس» قۋاتى جوعارى تراكتورىنىڭ پلاستيكالىق بولىكتەرىن شىعارۋ قولعا الىنادى. 2021 جىلدان باستاپ جوعارى قىسىم, باللاست جۇكتەرىنىڭ تۇتىكتەرىن, 2025 جىلدان باستاپ, كابينالار, باكتار, كوتەرگىش جاقتاۋلار, ديسكىلەر, كاردان بىلىگى, تەڭدەستىرگىش دايىنداۋ جانە تاعى باسقا قاجەتتى بولىكتەردىڭ بارلىعى وندىرىلەدى. ءۇش كەزەڭدە ىسكە اسىرىلاتىن جوباعا سالىنعان ينۆەستيتسيالاردىڭ جالپى كولەمى 7 ميللياردتان استام تەڭگەنى قۇرايدى. بىرتە-بىرتە جەرگىلىكتەندىرۋدىڭ تارازى باسى وسىلاي سالماقتانا بەرمەك. بۇگىنگە دەيىن 40 شاقتى تراكتور ساپقا قويىلعان, ونىڭ التاۋى ساتىلىپ تا ۇلگەردى.
قوستاناي تراكتور زاۋىتىنىڭ اشىلۋ راسىمىندە پرەمەر-ءمينيستردىڭ قاتىسۋىمەن «پەتەربۋرگ تراكتور زاۋىتى» اق (پتز) باس ديرەكتورى سەرگەي سەرەبرياكوۆ جانە قازاقستان اۆتوبيزنەس قاۋىمداستىعىنىڭ پرەزيدەنتى اندرەي لاۆرەنتەۆ «پتز» اق-نىڭ قوستاناي تراكتور زاۋىتىنىڭ جارعىلىق كاپيتالىنا كىرۋى تۋرالى كەلىسىمگە قول قويدى. وسىدان كەيىن اسقار مامين مەن سەرگەي سەرەبرياكوۆ «كيروۆەتس» قۋاتى جوعارى تراكتورىنا ءمىنىپ, سىناپ كوردى.
ۇكىمەت باسشىسى اسقار مامين وبلىس اكىمى ارحيمەد مۇحامبەتوۆپەن بىرگە قوستاناي قالاسىنداعى «قوستاناي-مبي» ءۇي قۇرىلىسى كومبيناتىنا, قايتا جاڭعىرعان «بولشەۆيچكا» ونەركاسىپ كووپەراتيۆىنە باردى.
قوستاناي
