30 تامىزدا رەسەي فەدەراتسياسى ۆورونەج وبلىسىندا «پاتريوت» ىزدەستىرۋ جاساعى حابارسىز كەتكەندەردىڭ تىزىمىندە بولعان ساربازدىڭ سۇيەگىن تاپقان. بەلگىلى بولعانداي ول 1941 جىلى الماتى وبلىسىنان سوعىسقا اتتانعان ءسۇيىنباي مازىباەۆ بولىپ شىقتى.
رەسمي دەرەكتەردە ۇلى وتان سوعىسىنا قازاق دالاسىنان 1 ميلليون 366 مىڭ ادام اتتانعان. 601 مىڭ جاۋىنگەر ۇرىس دالاسىنان ورالماسا, 271 مىڭ 500 سارباز بەن وفيتسەر حابارسىز كەتكەن. وسى جىلدىڭ مامىر ايىندا قۇرىلعان «اتامنىڭ اماناتى» قوعامدىق بىرلەستىگىنە سوعىستان ورالماعان اتا-باباسىن ىزدەگەندەردەن 200-دەن استام ۇسىنىس ءتۇسىپتى.
«اتالارىمىزدىڭ سۇيەگىن تاپساق دەگەن ويىمىز بار. قازىر رەسەيدە, باتىستا كوپ ارحيۆتار اشىلىپ جاتىر. «براتسكايا موگيلا» دەيمىز عوي سول جەردە جاتىر. بابالارىمىزدىڭ كوبى قولىنداعى قارۋمەن جاتىر. وسى ءسۇيىنباي اتامىز دا سولاي تابىلدى. ءبىزدىڭ ماقساتىمىز – ول كىسىلەردىڭ تۋعان-تۋىستارىنا اتا-انالارىن تابۋعا كومەكتەسسەك دەگەن نيەت», – دەدى «اتامنىڭ اماناتى» قوعامدىق بىرلەستىگىنىڭ مۇشەسى ءاليا ساعىمباەۆا.
سوعىس وتى تۇتانعان جىلى ءسۇيىنباي مازىباەۆ ەكى باۋىرىمەن بىرگە الماتى وبلىسىنان مايدانعا اتتانعان. سودان بەرى اعايىندى ۇشەۋدەن ەش حابار بولماپتى. تەك اراعا 78 جىل سالىپ قانا ءسۇيىنبايدىڭ جەرلەنگەن جەرى تابىلىپ, رەسەيلىك ىزدەستىرۋ جاساعىنىڭ كومەگىمەن قازىلىپ الىنعان. وزىمەن بىرگە اتى-ءجونى جازىلعان مەدالوندا قوسا جەرلەنىپتى.
«مازىباي ۇلى ءنۇسىپباي, ناعاشى اپامىز مازىباي كەلىنى اسپەن. بۇل كىسىلەردىڭ وتباسىنان مازىباي ۇلى ءسۇيىنباي 1913 جىلعى, ءنۇسىپباي ۇلى تۇڭعىشباي 1921 جىلعى, مازىباي ۇلى ۇزاقباي 1921 جىلى. وكىنىشكە وراي ولاردىڭ ەشقايسىسى سوعىستان ورالعان جوق. ءبارى حابار-وشارسىز كەتتى», دەدى س.مازىباەۆتىڭ تۋىسى نۇكەەۆ.
الماتى
