ورتالىق جانە جەرگىلىكتى اتقارۋشى ورگانداردى تىڭداۋ قورىتىندىلارى جانە ينۆەستيتسيالار تارتۋ جونىندەگى جۇمىستاردىڭ ۇيىمداستىرىلۋى تۋرالى ۇلتتىق ەكونوميكا ءمينيسترى ر.دالەنوۆ, يمپورتتى الماستىرۋ تۋرالى «اتامەكەن» ۇكپ توراعاسى ا.مىرزاحمەتوۆ, احقو-نىڭ وڭىرلەردە ينۆەستيتسيالار تارتۋ ماسەلەلەرى بويىنشا احقو باسقارۋشىسى ق.كەلىمبەتوۆ باياندادى.
وتىرىستا ۇلتتىق ەكونوميكانىڭ وزىق قارقىن كورسەتۋىن جالعاستىرىپ جاتقانى اتالىپ ءوتتى. بيىلعى 9 ايدىڭ ناتيجەلەرى بويىنشا ءوسۋ قارقىنى 4,3%-دى قۇرادى. حالىقارالىق ۆاليۋتا قورى قازاقستان ەكونوميكاسىنىڭ ءوسۋ بولجامىن 2019 جىلى 3,2%-دان 3,8%-عا دەيىن, 2020 جىلى 3,2%-دان 3,9%-عا دەيىن ارتتىردى. ازيا دامۋ بانكى دە ەل ەكونوميكاسىنىڭ ءوسۋى بويىنشا 2019 جىلى كۇتىلەتىن ناتيجەلەردى 3,5%-دان 3,7%-عا دەيىن كوتەردى. مoody’s رەيتينگتىك اگەنتتىگى ەلىمىزدىڭ نەسيەلىك باعالانۋىن تۇراقتىدان پوزيتيۆتىگە ارتتىردى. دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىندە قازاقستاننىڭ پوزيتسياسى 59-دان 55-ورىنعا جاقساردى.
ەۋروپا قايتا قۇرۋ جانە دامۋ (ەققدب) بانكىنىڭ قازاقستانداعى باسشىسى ا.پرەيمانيس جانە قازاقستانداعى ازيا دامۋ بانكى (ادب) وكىلدىگىنىڭ ديرەكتورى دج. كاپاننەللي قازاقستاننىڭ ەكونوميكالىق جانە ينۆەستيتسيالىق ساياساتىنداعى وڭ قارقىندى اتاپ ءوتتى.
ەكونوميكا ءوسىمىنىڭ قازىرگى قارقىنىن قولداۋ مەن ارتتىرۋدىڭ اسا ماڭىزدى شارتتارىنىڭ ءبىرى ينۆەستيتسيالار تارتۋ جانە ەكونوميكانىڭ كاپيتال سىيىمدىلىعىن ارتتىرۋ. 2024 جىلعا قاراي نەگىزگى كاپيتالعا سالىنعان ينۆەستيتسيالار دەڭگەيىن ءىجو 30%-ىنا دەيىن جەتكىزۋ كوزدەلگەن. بۇگىندە 2020-2024 جىلدارى 41 ترلن-نان استام تەڭگە ينۆەستيتسيا تارتۋعا مۇمكىندىك بەرەتىن ينۆەستيتسيالىق جوبالار پۋلى قۇرىلعان. ينۆەستيتسيالار ءوسىمىنىڭ نەگىزگى درايۆەرلەرى بازالىق يندۋستريالاندىرۋ, اوك, كولىك, تۋريزم جانە ساۋدا بولادى.
«ەلباسى نۇرسۇلتان نازارباەۆ پەن پرەزيدەنت قاسىم-جومارت توقاەۆتىڭ تاپسىرمالارىنا سايكەس, ەكونوميكا دامۋىنىڭ وزىق قارقىنىن قامتاماسىز ەتۋ ءۇشىن ەلىمىزگە تىكەلەي شەتەلدىك ينۆەستيتسيالاردى تارتۋ جۇمىسىن ساپالى تۇردە كۇشەيتۋ قاجەت», دەدى ا.مامين.
ۇكىمەت باسشىسى جۇمىس ىستەپ تۇرعان ينۆەستيتسيالىق ينفراقۇرىلىمدى جەتىلدىرۋدى, ەلىمىزدىڭ ارنايى ەكونوميكالىق جانە يندۋستريالىق ايماقتارىندا ينۆەستورلار ءۇشىن ارتىقشىلىقتاردى بىرىزدەندىرۋدى, مەملەكەت-جەكەمەنشىك ارىپتەستىكتىڭ دامۋىن جانداندىرۋدى, جوعارى قوسىلعان قۇنى بار ەكسپورتقا باعىتتالعان جوبالاردىڭ ۇلەسىن ارتتىرۋدى تاپسىردى.
«ينۆەستيتسيالىق جوبالاردى ازىرلەۋ جانە دايىنداۋ ماسەلەسىنە نەعۇرلىم ساپالى قاراۋ قاجەت. بۇل ءۇشىن كونسالتينگتىك كومپانيالاردىڭ جانە ەققدب, ەادب, يدب, ادب ءتارىزدى حالىقارالىق قارجى ينستيتۋتتارىنىڭ جانە باسقالارىنىڭ الەۋەتىن ەلىمىزگە كورسەتىلەتىن تەحنيكالىق كومەك اياسىندا پايدالانۋ قاجەت», دەدى ا.مامين.
پرەمەر-مينيستر وڭىرلەردەگى ينۆەستيتسيالىق بەلسەندىلىكتى دامىتۋ ماقساتىندا احقو قۇقىعىمەن جانە ونىڭ يۋريسديكتسياسىن قولدانۋ ارقىلى قۇرىلىمدالعان جوبالاردى ىسكە اسىرۋ بويىنشا ماسەلەلەردى پىسىقتاۋدى تاپسىردى.
«وڭىرلەردە اكىمدەردىڭ ينۆەستيتسيالىق جوبالارمەن تىكەلەي اينالىساتىن ورىنباسارلارى بار. احقو-نىڭ قارجى نارىعىنىڭ قولدا بار الەۋەتى مەن قولدانىستاعى قۇرالدارىن بارىنشا پايدالانۋدىڭ ماڭىزى زور. ۇيلەستىرۋ كەڭەسىنىڭ وتىرىسى وڭىرلەردىڭ احقو-مەن ىنتىماقتاستىعىنىڭ ساپالى دامۋىنا باستاۋ بولادى دەپ سەنەمىن», دەدى ا.مامين.
ۇكىمەت باسشىسى ورتالىق مەملەكەتتىك ورگاندارعا, ۇلتتىق كومپانيالارعا جانە اكىمدىكتەرگە ينۆەستيتسيالار تارتۋ بويىنشا بەكىتىلگەن نىسانالى ينديكاتورلارعا قول جەتكىزىپ, العا قويىلعان مىندەتتەردى ورىنداۋدى قامتاماسىز ەتۋدى تاپسىردى.
