سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيار ۇلى شارانى اشا كەلىپ, ەلىمىزدە مەديتسينا سالاسىنا قوماقتى قارجى ءبولىنىپ جاتقانىنا قاراماستان شەشىمىن تاپپاعان ماسەلەلەر مەن قوردالانعان تۇيتكىلدەر ازايماعانىن اتاپ ءوتتى. مەديتسينالىق كادرلار دايارلاۋدا ساپا ەمەس, بىلىمدىلىگى مەن بىلىكتىلىگى جەتىسپەيتىن دارىگەرلەر دە پايدا بولۋدا. ء«بىر توپ سەنات دەپۋتاتتارىنىڭ قاتتى سىنىنا قاراماستان اقمولا مەن سولتۇستىك قازاقستان وبلىستارىندا مەديتسينا سالاسىنا قاتىسى جوق جوعارى وقۋ ورىندارى جانىنان مەديتسينالىق فاكۋلتەتتەر اشىلدى», - دەدى سەناتور.
م.باقتيار ۇلى قازىرگى كەزدە كەيبىر دارىگەرلىك قاتەلىكتەردەن بولعان كوپتەگەن ماسەلەلەر ءتيىستى تۇردە رەتتەلمەگەن دەپ سانايدى. «بۇل مينيسترلىكتىڭ الداعى كەزدە شەشەتىن باستى جۇمىستارىنىڭ ءبىرى بولۋى ءتيىس», - دەدى سەنات كوميتەتىنىڭ توراعاسى.
دەنساۋلىق ساقتاۋ ءمينيسترى ەلجان ءبىرتانوۆ بايانداما جاسادى. ول مينيسترلىك دەنساۋلىق تۋرالى جاڭا كودەكس جوباسىن ازىرلەگەنىن حابارلادى. وندا بىرقاتار نەگىزگى بولىمدەر قاراستىرىلعان.
«قوعامدىق دەنساۋلىقتى قامتاماسىز ەتۋدە ازاماتتاردىڭ ورتاق جاۋاپكەرشىلىگى بەلگىلەندى, مەديتسينا قىزمەتكەرلەرىنىڭ مارتەبەسى كۇشەيتىلەدى, ەلەكتروندىق دەنساۋلىق ساقتاۋدىڭ قازىرگى زامانعى كورىنىستەرى انىقتالادى», - دەدى مينيستر.
ە.ءبىرتانوۆ سونداي-اق سەناتتىڭ ۇسىنىسى بويىنشا كودەكس جوباسىندا حالىقتىڭ دەنساۋلىق جاعدايى تۋرالى بايانداما دايىنداۋ جانە ونى ەلىمىزدىڭ پرەزيدەنتىنە بەرۋ جونىندە مينيسترلىكتىڭ جاڭا قۇزىرەتى قاراستىرىلعانىن اتاپ ءوتتى.
«2019 جىلعى 6 ساۋىردەگى پارلامەنتتىك تىڭداۋدىڭ قورىتىندىسى بويىنشا سەنات قازاقستان رەسپۋبليكاسىنىڭ ۇكىمەتىنە 13 ۇسىنىس, دەنساۋلىق ساقتاۋ مينيسترلىگىنە 26 ۇسىنىس بەردى, ولاردىڭ بارلىعى ورىندالدى», - دەدى ە.ءبىرتانوۆ.
الەۋمەتتىك-مادەني دامۋ جانە عىلىم كوميتەتىنىڭ حاتشىسى سەرىك بەكتۇرعانوۆ ءوز سوزىندە وتاندىق دەنساۋلىق ساقتاۋدىڭ جاي-كۇيى مەن پروبلەمالارىنا جان-جاقتى تالداۋ جاسادى, ولاردى شەشۋگە پارلامەنت پەن ۇكىمەتتىڭ بەلسەندى قاتىسۋى تالاپ ەتىلەتىنى ايتىلدى. ول مەديتسينا قىزمەتكەرلەرىن قىزمەتتىك مىندەتتەرىن ورىنداۋ كەزىندە اگرەسسيا مەن شابۋىلدان قورعاۋ شارالارىن قابىلداۋ قاجەتتىگىن اتاپ ءوتتى.
«ۋاكىلەتتى ورگانعا وسى ماسەلە بويىنشا زاڭنامانى وزگەرتۋگە باستاما جاساۋ كەرەك دەپ سانايمىن. مەملەكەت مەديتسينالىق قىزمەتكەرلەردىڭ جۇمىسى ءۇشىن قاۋىپسىز جاعدايلاردى قامتاماسىز ەتۋى ءتيىس», - دەدى سەناتور.
س.بەكتۇرعانوۆ سونداي-اق دارىگەرلىك قاتەلىكتەردى قىلمىسقا بالاۋ جەڭ ۇشىنان جالعاسۋعا دۋشار ەتتى دەپ سانايدى, سوندىقتان بۇل جاعدايلار كوبىنەسە ۇجىم ىشىندە قالىپ كەلەدى.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا, ءاربىر ونىنشى پاتسيەنت مەديتسينالىق تۇرعىدا كەلىسپەۋشىلىكتەرگە تاپ بولادى, ونى الەمدە دارىگەرلىك قاتەلىك دەپ اتايدى.
«اقش-تا جۇرەك-قان تامىرلارى اۋرۋلارى مەن ونكولوگيادان كەيىنگى ءولىم-ءجىتىمنىڭ ءۇشىنشى سەبەبى – بۇل مەديتسينالىق جانجالدار مەن كەلىسپەۋشىلىكتەر, سودان كەيىن عانا جول-كولىك وقيعالارى مەن جاراقاتتار بار ەكەنىن اشىق ايتادى. قازاقستانداعى جاعدايدىڭ قانداي ەكەنىن ءبىز بىلەمىز بە؟ جاۋاپتىڭ ەكىتالاي ەكەنى انىق», - دەدى س. بەكتۇرعانوۆ.
ونىڭ ايتۋىنشا, دارىگەرلىك قاتەلىكتەر ءۇشىن جاۋاپكەرشىلىك بولۋى كەرەك, دارىگەر قانداي جاعدايدا جانە قانداي جازاعا تارتىلۋى كەرەك – ول ناقتى ءارى ابدەن سارالانىپ انىقتالۋى قاجەت.
س.بەكتۇرعانوۆ دەنساۋلىق ساقتاۋ مينيسترلىگىنە وسى ماسەلەنى رەسمي تالقىلاۋدى باستاۋدى ۇسىندى.
ۇكىمەت ساعاتى بارىسىندا قاراعاندى, تۇركىستان وبلىستارى اكىمدەرىنىڭ ورىنباسارلارى ءسوز سويلەدى.
سەناتورلار دەنساۋلىق ساقتاۋ جۇيەسىن جەتىلدىرۋ, تسيفرلاندىرۋدى ەنگىزۋ, ونكولوگيالىق ناۋقاستاردى ەمدەۋ جانە باسقا دا ماسەلەلەر بويىنشا ءوز ەسكەرتۋلەرى مەن ۇسىنىستارىن ايتتى.
