ەكىباستۇزداعى ەستاي اتىنداعى مۋزىكا مەكتەبىندە زەكەن جانابىلقىزىنىڭ 90 جىلدىعىنا ارنالعان رۋحاني مادەني شارا ءوتتى.
بىلتىر ەستاي بەركىمباي ۇلىنىڭ 150 جىلدىعى تويلانعان ەدى. وبلىس اكىمى بولات باقاۋوۆتىڭ باستاماسىمەن مۋزىكا مەكتەبىنە ەستايدىڭ ەسىمى بەرىلگەن-ءدى.
انسۇيەر, ونەرسۇيەر حالىق جينالىپ, زەكەن اجەگە ۇلكەن قۇرمەت كورسەتتى.
–اۋليەلى اقكول-جايىلمانىڭ انشىلىك ورتاسى اتامىزعا دا انشىلىك عۇمىر بەردى, بويىنا دارقان دارىن سىيلادى, – دەدى اجەمىز ساحنا تورىنەن ءۇن قاتىپ.
ايتقانداي-اق ەستاي ءانشى قورلان قىزعا قولى جەتپەي, ۇمسىنعانعا ۇيلەنەدى. ۇمسىنعان ەكەۋىنەن قوس اجەنىڭ اكەلەرى ءجانابىل بار ءتورت بالا ومىرگە كەلەدى. ءجانابىل 41-ءدىڭ سوعىسىندا قازا تابادى. انالارى دا قايتىس بولادى.
ءسويتىپ ەكەۋى ەستاي مەن ونىڭ ەكىنشى ايەلى زاعيشانىڭ قولىندا وسەدى.
اۋىلداستارى كەزىندە ەستاي «سارىتورعايىم» دەپ ەركەلەتكەن زەينەش اجەمىز جاس كۇنىندە كەرەمەت ءان ايتقانىن, بۇگىندە ول كىسىنىڭ دە 80 جاستان اسىپ بارا جاتقانىن ەسكە الدى. جاسى 90-عا كەلگەن زەكەن اجەنىڭ دە ىڭىلداپ ءان ايتاتىن ادەتى بار ەكەن.
وسىنداي قىزىقتى ەستەلىك-اڭگىمەلەردەن-اق ءانشى ەستاي جايلى قوس اجەنىڭ كورىپ-بىلگەندەرى جازىپ الارلىق دۇنيە ەكەنىن ۇعاسىز.
وسى كۇنگە دەيىن تابىلماعان قورلان قىز سىيلاعان جۇزىكتىڭ ءوزى ءبىر حيكاياتقا تۇرارلىق.
–ەكىباستۇز قالالىق تاريحي-ولكەتانۋ مۋزەيىنەن ەستاي زالى اشىلدى. اقىن-ءانشىنىڭ تۇتىنعان جەكە زاتتارى, ۇرپاقتارىنان الىنعان ەسكى دۇنيەلەر, دومبىراسى, شامادانى بار. نەمەرە ءىنىسى كارىبايدىڭ دا دومبىراسى وسىندا تۇر. ەستاي ءىنىسىنىڭ ۇيىنە قىدىرىپ بارعاندا سول دومبىرانى تارتىپ, ءان شىرقايدى ەكەن, – دەيدى اقىننىڭ ۇرپاعى, جۋرناليست فارحات امىرەنوۆ.
ايتۋىنشا, اۋلەتتەرىنە قۇندى جادىگەر – ەكى شاماداندى دا مۋزەيگە بەرگەن. ەستاي اقىن 1939 جىلى الماتىعا بارعاندا اكەلگەن ەكەن. ءبىرىن زەكەن اپاعا, ەكىنشىسىن نەمەرە ءىنىسى قىزداربەك اتاعا تارتۋ ەتىپتى.
ال زەكەن اجەنىڭ 90 جىلدىعىنا ارنالعان كەشتە ەستەلىكتەر, عيبرات الارلىق اڭگىمەلەر ايتىلدى. كەشتە مەدعات ماناپ, امانگەلدى قوجانوۆ, جانبولات بايسولتان, نۇرجان سارقامباەۆتار اۋەلەتە ءان سالدى.
كۇيشى قايرات ايتباەۆ كۇمبىرلەتىپ كۇي شەرتتى. مۋزىكا مەكتەبىنىڭ جاس تالانتتارى دا ءوز ونەرلەرىن كورسەتتى.
كەش سوڭىندا 90 جاستاعى زەكەندەي اسىل اجەمىز جينالعان قاۋىمعا العىس ايتىپ, باتاسىن بەردى.
پاۆلودار وبلىسى,
ەكىباستۇز قالاسى
