اۋەلى وڭىردەگى ءىرى جوبالارعا قولداۋ ءبىلدىرىپ, الەۋمەتتىك از قامتىلعان وتباسىلارعا كومەك قولىن سوزىپ كەلە جاتقان «اراي-سترويماركەت-2030» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ارمان ەدىلباەۆقا «جىل مەتسەناتى» اتاعى تابىس ەتىلدى. كاسىپكەر تالاي جىلدان بەرى قارتتار ءۇيى مەن بالالار ۇيىنە قارجىلاي كومەك كورسەتىپ كەلەدى. سونىمەن قاتار ول اعىمداعى جىلى قايتا جاڭعىرتۋدان وتكەن تاراز قالاسىنداعى «جاستار اللەياسىنىڭ» قۇرىلىس جۇمىستارىنا 224 ميلليون تەڭگە بولگەنىن دە ايتۋ كەرەك.
ال «تۋعان ولكە» اتالىمىن قوردايلىق كاسىپكەر, «سسسر» جاۋاپكەرشىلىگى شەكتەۋلى سەرىكتەستىگىنىڭ ديرەكتورى سارسەبەك سالىباەۆ يەلەندى. كاسىپكەر سوڭعى 3 جىل ىشىندە از قامتىلعان وتباسىلارعا 41,9 ميلليون تەڭگەگە 8 تۇرعىن ءۇي سالىپ بەرگەن ازامات. سونداي-اق 17 قوردايلىقتىڭ باسپانالى بولۋىنا قارجىلاي كومەك كورسەتىپ, 10 تۇرعىنعا قاجەتتى قۇرىلىس ماتەريالدارىن الىپ بەردى. ءوزىنىڭ سپورتتىق مانسابىندا 12 رەت الەم رەكوردىن جاڭعىرتقان داڭقتى سپورتشى زۋلفيا گابيدۋللينا «جىل تۇلعاسى» اتالىمىن جەڭىپ الدى. سونداي-اق ول تالاي رەت ەل قورجىنىنا ولجا سالعان جان. جيىن بارىسىندا «جىلدىڭ ۇزدىك ۇيىمى» اتالىمى «قازفوسفات» جاۋاپكەرشىلىگى شەكتەۋلى سەرىكتەستىگىنە بۇيىردى. سەرىكتەستىك باسشىسى, قازاقستاننىڭ ەڭبەك ەرى مۇقاش ەسكەندىروۆ تە تالاي ۋاقىتتان بەرى ءوڭىر تۇرعىندارىنا الەۋمەتتىك-ماتەريالدىق تۇرعىدا كومەك كورسەتىپ كەلەدى. ءوز ءونىمىن الەمنىڭ 27 ەلىنە ەكسپورتتايتىن «قازفوسفات» سوڭعى جىلدارى قايىرىمدىلىق جۇمىستارىنا 46 ميلليون تەڭگە جۇمساعان.الەۋمەتتىك ماڭىزى بار ۇزدىك جوبالاردى جۇزەگە اسىرعاندارعا عانا تابىس ەتىلەتىن «ەرەن ەرىكتىلىك» اتاعى تاراز ىرگەسىندەگى قۇمشاعال, ءشولدالا تۇرعىندارىنا كومەك قولىن سوزىپ جۇرگەن «وركەن-نيەت» قايىرىمدىلىق قورىنىڭ توراعاسى ساعدات اينابەكوۆكە بۇيىردى. اتالعان سىيلىقتاردى يەلەنگەن ازاماتتاردىڭ ءبارى دە اۋليەاتا ءوڭىرىنىڭ الەۋەتىن كوتەرۋگە اتسالىسىپ جۇرگەن ازاماتتار دەۋگە بولادى.
جامبىل وبلىسى
